Sosial şəbəkədə 7 il erməni əsirliyində olan və ötən il Azərbaycana qaytarılan Şahbaz Quliyevin aksiya keçirdiyinə dair videogörüntülər yayılıb. Videoda o, əlil kimi pensiya və veteranlıq statusu ala bilmədiyini deyir. Bildirir ki, Məşğulluq Xidmətindən ona aylıq 160 manat maaşla süpürgəçi işi təklif edilib. Ş. Quliyev həmçinin çox çətin vəziyyətdə yaşadığını bildirib: “Evimin qazını və işığını kəsiblər. 1 manat pulum olmadığından Müşfiq qəsəbəsindən Bakının mərkəzinə piyada gəlmişəm. 1 il yeddi aydır çox çətin vəziyyətdə yaşayıram...”
Mətbuatda Ş.Quliyevin əlillik dərəcəsi ala bilməməsi ilə bağlı səsləndirdiyi problemlərə Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinə sorğu ünvanladıq. Agentlikdən baki-xeber.com-a bildirdilər ki, vətəndaş doğru danışmır. “Vətəndaş düz danışmır. 2021-ci ildən ikinci dərəcə əlilliyi var”.
Şahbaz Quliyev: “Əgər onlar dediyi sübut olunsa çıxıb televizorda xalqdan üzr istəyəcəyəm ki...”
Dövlət Məşğulluq Agentliyinin Strateji Kommunikasiya departamentinin müdiri Mayis Musayev də Ş.Quliyevin etirazına münasibət bildirib. “Bu gün (aprelin 1-i) Bakı şəhərinin mərkəzində etiraz edərək bir neçə sosial şəbəkə səhifəsinə müsahibə verən Tərtər rayon Qarağacı kəndində qeydiyyatda olan Quliyev Şahbaz Cəlal oğluna 17.06.2021-ci il tarixdən ümumi səbəbdən II qrup əlillik təyin edilmişdir. Buna görə o, aylıq olaraq 180 manat məbləğində müavinət alır. Çıxışında ödənişdən imtina edildiyi barədə fikir səhvdir. Belə ki, müavinətini aylıq olaraq vətəndaş öz bank kartı vasitəsilə əldə edir. Bununla yanaşı, onun həyat yoldaşı Qarayeva Təranə şirniyyat sahəsi üzrə, bacısı oğlu Qarayev Rəşad inkubator zərfi üzrə özünüməşğulluq proqramına cəlb edilib. Yaxın vaxtlarda hər ikisinin aktivlərlə təmin edilməsi nəzərdə tutulub. Şahbaz Quliyevə isə bu ilin 30 martında heyvandarlıq sahəsi üzrə təsərrüfatın qurulması təklif edilib. O öz təsərrüfatını Tərtər rayonunda quracağını, gələn həftə məşğulluq filialına yaxınlaşacağını bildirib. Həmçinin, ailəsinə 4 dəfə səfər olunaraq psixo-sosial dəstək göstərillib. Ş.Quliyevin işlə təmin edilmək üçün 10 il staj tələbi iddiası isə həqiqəti əks etdirmir”.
Rəsmi dairələrin fikirlərindən sonra Şahbaz Quliyevlə əlaqə saxladıq. Ş.Quliyev bizimlə söhbətində bildirdi ki, barəsində deyilənlər əsassızdır: “Birincisi, mən aksiya keçirməmişəm. Düzdür, mənə ikinci qrup əlillik dərəcəsi veriblər. Mən qaytarıldıqdan sonra bir dənə salamat yerim yox idi. Onlar hospitala gəliblər, yazıb-pozublar ki, sənə mülki şəxs kimi yox, hərbiçi kimi ikinci qrup əlillik veriləcək. Sonra bir aydan sonra zəng ediblər ki, səni hərbiçi kimi qeydiyyata ala bilmirik. Çünki bütün dünya bilir ki, siz ora ziyarətə getmisiniz, sənə mülkü vətəndaş kimi əlillik dərəcəsi veriləcək. Sonra mənə zəng etdilər ki, sizə stajla pensiya vermək istəyirik, amma 7 iliniz çatmır, 130 manat sosial müavinət təyin ediləcək, indi 180 manatdır. O pul karta köçmüşdü almışıq. Son 7 il də ona görə çatmır ki, o müddətdə erməni əsirliyində olmuşam. Amma sizə açıqlama verənlər bunu nəzərə almaq istəmirlər. Sizcə, indiki zamanda 180 manata dolanmaq olar? Buna etiraz edəndə isə Əmək və Əhalinin Sosial Müdafiə Nazirliyindən dedilər ki, get əsirlikdə olduğuna dair arayış gətir, mən də gedib DTX-dən arayış gətirib nazirliyə verdim. Oradan da məni Yasamal rayonundakı DOST mərkəzinə göndərdilər ki, apar bu arayışı ora ver və sosial müavinətin təyinatı dəyişəcək, ikinci qrup əlilliklə 600-700 manat pensiya alacaqsan. DOST mərkəzindən bildirdilər ki, ancaq sosial müavinət məsələsinə baxarıq, bizi başqa şeylərə qatmayın. Sonra dedilər ki, get Sovet orsusunda xidmətinə dair arayış gətir. Onu da gətirdim, axırda mənə məktub gəldi ki, sizə hərbiçi kimi pensiya verə bilmirik. 1992-ci ildən 1994-cü ilə qədər də döyüşdə olmuşam. Bu gün nə müharibə veteranı statusu, nə də hərbiçi kimi ikinci qrup əlillik pensiyası ala bilirəm. Baxmayaraq ki, bunları almaq üçün əlimdə bütün əsaslarım var”.
Ş.Quliyevin sözlərinə görə, sosialdan deyiblər ki, guya həyat yoldaşı şirniyyat sahəsi üzrə, bacısı oğlu Qarayev Rəşad inkubator zərfi üzrə özünüməşğulluq proqramına cəlb edilib. Ş.Quliyev deyir ki, bunların heç biri həqiqətə uyğun deyil: “Mənim hay-küyümdən sonra sosial qurumlardan deyirlər ki, guya arvadımın şirniyyat sexi, mənim isə rayonda mal fermam var, bacım oğluna isə inkubator veriblər. Amma bunun heç biri doğru deyil. Faktiki olmayan, gözünlə görmədiyin məsələ ilə bağlı müsahibə vermək olar? Guya bizə sosial qurumlar hər şey verib, amma əslində heç nə yoxdur. Jurnalistsiniz, gəlin özünüz araşdırın görün varmı? Gəlin özünüz baxın, araşdırın, lap sizi rayona aparım, görün nəsə var? Sübut olunsun ki, onlar var, mən də görüm, bəlkə elə veriblər mənim xəbərim yoxdur. Gedək göstərsinlər ki, buranı sənə vermişik. Əgər onlar dediyi sübut olunsa çıxıb televizorda xalqdan üzr istəyəcəyəm ki, veriblər mən yalan danışmışam”.
Barəsində yanlış məlumat yaydığı və fikirlərini təhrif etdiyi üçün bəzi media orqanlarını məhkəməyə verəcəyini deyən Ş.Quilyev deyir ki, bəziləri ona şər atıb “Şahbazın hər şeyi var, gözü doymur” deyir. O qeyd etdi ki, maşını, başqa şeyləri əlindən çıxıb, onları istəmir, bircə sağlam canını qaytarsınlar, bundan başqa bir arzusu yoxdur, sağlamlığını isə qaytarmaq mümkün deyil. İl yarımdır hospitalda müalicə aldığını deyən Ş.Quliyevin sözlərinə görə, sağlamlığını itirib. “Mən müharibə veteranı statusumu və hərbiçi kimi ikinci qrup əlillik tələb edirəm. Mənə şər atanları məhkəməyə verəcəyəm”-deyə qeyd edən Ş.Quliyev bildirdi ki, ölkə başçısının göstərişi ilə müalicə olunur, amma sosial sahə üzrə məmurlardan ciddi narazılığı var. Hazırda Müşfiqabad qəsəbəsində keçmiş məcburi köçkünlər üçün salınan Yeni qəsəbədə yaşayır: “Bu evi isə mən əsir düşdükdən sonra cənab prezident ailəmə verib. Bu gün mən “Qaçqınkom”dan o evin sənədini ala bilmirəm. Mən burada olmadığıma görə o vaxt evin müqaviləsi anamın, keçmiş yoldaşımın adına bağlanıb. Boşanandan sonra məhkəmədən sənəd apardım ki, biz boşanmışıq, keçmiş həyat yoldaşım çıxıb gedib evi mənim öz adıma keçirin. Ev mənim adıma olsun, etmirlər”- deyə Ş.Quliyev qeyd etdi.
İradə SARIYEVA
