Azad İstehlakçılar Birliyinin sədri Eyyub Hüseynov yerli mətbuata iliginc açıqlama verib. E.Hüseynov bildirib ki, paltar ağartmaq üçün İrandan gətirilən maddəni qarışdıraraq kəllə qənd hazırlayırlar.
“…Qənd istehsalı zamanı qəndin kimyəvi maddələrlə ağardılması ilə bağlı məsələ qaldırmışıq. Bir aydan çoxdur ki, məktub vermişik və hələ AQTA-dan heç bir xəbər yoxdur. Həmin qəndlər bu gün də satılmaqda davam edir. İstehlakçılar onun nümunəsini də mənə gətiriblər. Kimyəvi maddələr, paltar və dəri ağartmaq üçün, xalça yumaq üçün istifadə edilən, İrandan gətirilən kimyəvi maddəni ərimiş şəkər tozuna qarışdıraraq, ağ kəllə qənd hazırlayırlar. 2019-cu ildə biz bu məsələni qaldırdıq və Baş Prokurorluq cinayət işi qaldırdı, adamlar həbs edildi. Maddəni gətirənlər həbs edildi. Ancaq görürük ki, yenə həmin maddə satılır. AQTA-nın işində ardıcıllıq müşahidə edilmir. Yəni bir işi başlayıb ardıcıl şəkildə yerinə yetirsin, bu yoxdur”.
Məsələnin ciddiliyini nəzərə alaraq onu daha geniş şəkildə araşdırmaq qərarına gəldik və bu səbəbdən yenidən Eyyub Hüseynovla və AQTA ilə əlaqə saxladıq.
Eyyub Hüseynov: “Bu il yenidən bazarı araşdırdıq və gördük ki, həmin zərərli ağardıcı maddələrlə ağardılan qəndlər yenə də satılır”
Eyyub Hüseynov “Bakı-Xəbər”ə “bəli, dediklərimin hamısı həqiqətdir, bu yolla düzəldilən kəllə qəndlər hələ də satılır. 2019-cu ildə biz məsələ qaldırdıq Baş Prokurorluq, AQTA bu sahədə iş apardı, müxtəlif insanlar, o cümlədən də bu maddəni Azərbaycana gətirən şəxs həbs olundu və sair. Bu sahədə iş aparılsa da, təəssüf ki, dayanıqlılıq təmin olunmadı. Azad İstehlakçılar Birliyi olaraq bu il yenidən bazarı araşdırdıq və gördük ki, həmin zərərli ağardıcı maddələrlə ağardılan qəndlər yenə də satılır, bu əməllər yenə də davam etdirilir. Azad İstehlakçılar Birliyinin sədri olaraq o qəndi qanuni, standartlara uyğun yolla ağardan o müəssisəni yaxından görmək üçün ora getdim. Gördüm ki, sentrafuqa deyilən bir cihaz var və sarılaşmış kəllə qəndi ağartmaq üçün həmin cihaza qoyulur, çox böyük sürətlə fırladılır və o sarı maddə ayrılır. Bu, mexaniki üsulla, yaxud standartlara uyğun formada kəllə qəndi ağartmaqdır. Amma 20-yə yaxın müəssisə yenə də davam edir. Mən 20 gündən çoxdur ki, Baş Prokurorluğa, Gömrük Komitəsinə, Qida Təhlükəsizliyi Agentliyinə, Antiinhisar və Bazarlara Nəzarət Dövlət Xidmətinə rəsmi məlumatlar vermişəm, həmin qəndlərin markalarını göstərmişəm və harada satıldığını qeyd etmişəm. Yalnız Baş Prokurorluqdan mənə zəng vurublar, bu məsələ ilə yalnız bir dövlət qurumu maraqlanıb. Mən onlara lazımı məlumatları verdim, lakin digər qurumlar partizan susan kimi susurlar. Yenə də bu zəhərli, təhlükəli qənd yas və toy məclislərində, evlərdə, hər yerdə istifadə olunur. Çox-çox təəssüf edirəm ki, AQTA guya qidanın təhlükəsizliyini təmin edən iş görür, bundan təhlükəli bir şey ola bilməz. Nə üçün bəs onda maraq göstərmirlər? Mən orada ictmai şuranın üzvüyəm, heç mənimlə müzakirə də aparmayıblar ki, bu hansı qənddir? Bu zəhərli qəndlər hər yerdə, geniş şəbəkələrdə satılır, istehsal yeri də üzərinə yazılıb. Bu qəndləri istehsal edən müəssisələrdən birini qeyd etmək istəyirəm. Qəndin üzərində yazılır ki, fiziki şəxs Rüstəmov K.F, ünvan Sumqayıt şəhəri, M.Ə.Sabir küçəsi. Açıq şəkildə ünvanı göstərilib. Bu zəhərli qəndlərdən biri “Dad bir” adlanan qənddir. İstehsalçılar müxtəlif distribütor şirkətlərə qəndi verirlər, onlar da ölkənin hər yerinə dağıdırlar, nəticədə də əhalinin kütləvi zəhərlənməsi baş verir. Təkcə qənd deyil, bu kimi bir çox mallar var. Çox təəssüflər olsun ki, AQTA susmaqla məşğul olur. Bunların başqa işlərinin nə olduğunu bilmirəm.
Yadımdan çıxmamış deyim ki, mən DİN-in Baş Cinayətkarlqıla Mübarizə İdarəsindən rəsmi məktub almışam. Bunu da qeyd etməliyəm ki, göründüyü kimi, bu məsələyə birbaşa dəxli olmayan dövlət qurumları bizə rəsmi cavab verir, amma Antiinhisar və AQTA ümumiyyətlə əhəmiyyət vermir. Bu qurumlar nə üçün belə edirlər, bunların böyük dövlət vəsaiti hesabına qurduqları laboratoriyaları var. Amma nə üçün əməkdaşlıq etmək istəmirlər? KİV-də gedən məlumatlara onlar reaksiya verməlidirlər. Lakin bu barədə mətbuatda kifayət qədər yazı dərc olunsa da, AQTA bu məqalələri izləmir, təqib etmir ki, ölkədə nə baş verir”.
AQTA: “Son günlər görürük ki, Eyyub müəllim bu barədə açıqlamalar verir…”
Qeyd etdiyimiz kimi “Bakı-Xəbər” olaraq AQTA-ya bu barədə sorğu göndərmişik, lakin hələ də AQTA-dan rəsmi cavab almamışıq. Qurumun mətbuat xidmətindən yalnız “Son günlər görürük ki, Eyyub müəllim bu barədə açıqlamalar verir. Sorğunuza cavab verəcəyik” bildirdilər. Amma yazı çapa hazırlanana qədər AQTA-dan cavab gəlmədiyi səbəbindən qurumun rəsmi mövqeyini təqdim edə bilmədik. AQTA nə zaman sorğumuza cavab verərsə, sizə təqdim edəcəyik.
İradə SARIYEVA
