Tovuz rayonunda şəkər xəstəliyindən əziyyət çəkən pasiyentlər dərmanlarını ala bilmirlər. Mətbuatın verdiyi məlumata görə, şəkərli diabetdən əziyyət çəkən pasiyentlər dərman almaq üçün Tovuz Rayon Mərkəzi Xəstəxanasının qarşısına toplaşırlar.
Xəstəxananın qarşısında növbə gözləyən insanlar çox vaxt dərmansız evlərinə dönməyə məcbur olduqlarını bildirirlər. Bir iş günü ərzində azı 150 nəfərə yaxın xəstə dərman üçün növbə gözləyir.
Tovuz Rayon Mərkəzi Xəstəxanasında cəmi bir endokrinoloq var. Dərmanlar isə əvvəllər kəndlərdəki tibb məntəqələrində paylanırdı. Sonradan bütün dərmanlar yalnız xəstəxananın özündə verilməyə başlayıb. Bundan sonra da kəndlərdəki xəstələr günlərə bölünüb ki, bu cür mənzərə yaranmasın. Amma növbəlilik prinsipi də özünü doğrultmayıb.
Tovuzlu şəkər xəstələri dərmanlarını nə üçün ala bilmirlər? Problemin kökündə nə dayanır? Tovuzun Mərkəzi Xəstəxanasında şəkər dərmanı qıtlığını kim yaradır?
“Gözləyirik, yəqin ki, əlaqədar qurumlar bizə bu məsələdə kömək edəcəklər”
Problemi araşdırmaq üçün İcbari Tibbi Sığorta Agentliyinə sorğu göndərdik, Tovuz Rayon Mərkəzi Xəstəxanasının baş direktoru Paşa Muradovla isə əlaqə saxladıq.
Paşa Muradov “Bakı-Xəbər”ə açıqlamasında bildirdi ki, yaranmış problemin səbəbi xəstələrin sayının çox olmasıdır və nəticədə sıxlıq yaranıb: “Bizim 5 minə yaxın şəkər xəstəmiz və cəmi bir endokrinoloqumuz var. Dərmanlar gələndə də bütün şəkər xəstələri gəlir. Biz müalicə üçün növbəlilik prinsipi ilə şərait də yaratmışıq. Amma bu qədər xəstəni müalicə etmək, onları yola salmaq bir həkimin gücü daxilində deyil. Modul proqramı var və ona əsasən şəkər həkimi xəstələrə dərmanlar yazır, onlar da gedib dərmanlarını aptekdən götürürlər. Problemin yaranmasının başlıca səbəbi xəstə sıxlığı ilə bağlıdır. Biz aidiyyəti qurumlara müraciət etmişik. Təklifimiz odur ki, kəndlər üçün modullar olsun, 7-8 kənddə şəkər xəstələri üçün imkanlar yaradılsın ki, belə sıxlıq yaranmasın. Səbəb sıxlıqdır. Amma dərmanlar var. Sizə bir şey deyim. İndi dərmanların verilməsi İcbari Tibbi Sığorta Agentliyinə keçdi. Əvvəllər Səhiyyə Naizrliyinə aid idi. Dərmanlar kifayət qədər gəlmirdi, onda da problemlər vardı. Amma artıq dərmanların verilməsi düzəlib. Çətinliklərimiz xəstə sıxlığı və endokrinoloq həkim çatışmazlığı ilə bağlıdır, başqa çətinliyimiz yoxdur. 5 minə yaxın xəstəyə bir həkim necə xidmət edə bilər? Əlavə bir nəfər də terapevti köməkçi kimi təyin etmişəm. Bizim cəmi bir modul proqramımız var, dəfələrlə müraciət etmişik ki, modulların sayını artırın bir neçə yerdə şəkər xəstələrinə xidmət olunsun ki, belə sıxlıq yaranmasın. Gözləyirik, yəqin ki, əlaqədar qurumlar bizə bu məsələdə kömək edəcəklər. Bizə bu sahədə kömək lazımdır”.
Sıxlıq nəticəsində narazı qalan xəstələri qəbul edib onlarla söhbətlər apardığını deyən P.Muradovun sözlərinə görə, çox çətinlik çəkirlər. “Təklifim odur ki, modul sisteminin sayını artırsınlar, kəndlərdə həkimlərə səlahiyyət verilsin və onlar şəkər xəstələrinin müalicəsi ilə məşğul olsunlar, xəstələr kəndlərdən bura gəlməsin. Tovuz böyük rayondur, ucqar dağ kəndləri var. Kənd həkim məntəqələrinə, ailə sağlamlıq mərkəzlərinə şəkər xəstələrinə dərman vermək hüququ verilsin. Bu dərmanlar hamısı xəstələrə reseptlə verilir. Bu baxımdan bütün xəstələrin sənədi olmalıdır. Audit gəlib bir-bir yoxlayır. Ona görə də gərək rəsmi icazə olsun ki, biz şəkər xəstələrinə baxmaq, dərman yazmaq imkanlarını kənd həkimlərinə də verək. Yoxsa bir xəstəxana bu qədər xəstəyə xidmət etməyi çatdıra bilmir. Bu çətinliyi aradan qaldırmaq üçün əlimizdən gələni edirik və eyni zamanda bunun üçün bizə əlaqədar qurumların köməyi lazımdır”- deyə P.Muradov qeyd etdi.
İcbari Tibbi Sığorta Agentliyinə göndərdiyimiz sorğuya yazı çapa hazırlandığı müddətdə cavab gəlmədiyi üçün qurumun açıqlamasını təqdim edə bilmədik. Amma açıqlama nə zaman təqdim edilərsə, işıqlandıracağıq.
İradə SARIYEVA
