Məlum olduğu kimi, Dövlət Məşğulluq Agentliyi tərəfindən icra olunan özünüməşğulluq proqramı həyata keçirilir. Proqram çərçivəsində iştirakçılara kənd təsərrüfatı və istehsal-xidmət yönümlü çoxlu sayda iqtisadi fəaliyyət sahəsi üzrə biznes paket təqdim edilir. Proqrama işsiz və işaxtaran şəxs cəlb edilir.
44 günlük Vətən müharibəsi qazisi Orxan Abdullayev Dövlət Məşğulluq Agentliyinin özünəməşğulluq proqramına müraciət etmişdi. Proqram çərçivəsində bərbərlik peşəsi üzrə kursları uğurla tamamlayıb, imtahan verib. Amma ona söz verilən bərbərlik avandıqlarını hələ də ala bilmir. Qazi qeyd edir ki, müharibədən qabaq bərbərlik peşəsi üzrə fəaliyyət göstərib: “Könüllü olaraq müharibəyə getdim. Döyüş zamanı yaralandığıma görə öz bərbərlik avandıqlarımı satıb müalicəmə xərcləməyə məcbur oldum. Müalicəm bitdikdən sonra 2021-ci ilin oktyabrında Dövlət Məşğulluq Agentliyinin proqramlarına qoşulub bərbərlik kurslarını uğurla bitirdim. Mənə söz verdilər ki, dekabra kimi mənə bərbərliklə bağlı avandanlıq veriləcək. Yanvardan bugünə qədər götürdüyüm icarə yeri üçün sadəcə boş pul ödəyirəm. Avadanlıqlarım olmadığına görə işimlə məşğul ola bilmirəm. Məni hər ay söz verib sadəcə vaxtımı uzadırlar".
Qeyd edək ki, Orxan Abdullayev 44 günlük müharibədə Füzuli,Cəbrayıl,Xocavənd və Hadrut istiqamətində gedən döyüşlərdə iştirak edib. "Xocavəndin azad olunmasına görə” medalı ilə təltif olunub.
“Cari ilin aprel ayı ərzində "kişi bərbərxanası" zərfi üzrə avadanlıqlarla təmin olunacaq”
Məsələ ilə bağlı Dövlət Məşğulluq Agentliyinin Strateji Kommunikasiya departamentindən bildirildi ki, Nizami rayon sakini Abdullayev Orxan Rasim oğlu Dünya Bankı ilə birgə əməkdaşlıq çərçivəsində həyata keçirilən "Azərbaycanda Məşğulluğa Dəstək" layihəsinin iştirakçısı olub və bu təlimləri 2021-ci il dekabrın 28-də bitirib. O, cari ilin aprel ayı ərzində "kişi bərbərxanası" zərfi üzrə avadanlıqla təmin olunacaq.
Günel CƏLİLOVA
