Məlum olduğu kimi, bir neçə gün əvvəl xaricdə təhsil almış bir qrup həkim Səhiyyə Nazirliyi qarşısında aksiya keçirib. Həkimlərin etiraz etməsinə səbəb onların Azərbaycanda işlə təmin oluna bilməməsidir. Həkimlər qeyd edir ki, xaricdə həkimlik ixtisası üzrə təhsili başa vurduqdan sonra doğma ölkələrində çalışmaq istəyirlər. Lakin onların bu istəyi gerçək olmur.
Səhiyyə Nazirliyi xarici ölkələrdə klinik ordinatura və internatura təhsili alan bir qrup həkimin etiraz aksiyasına münasibət bildirib.
Nazirliyin yaydığı məlumatda qeyd olunur ki, qurumun nümayəndələri həmin şəxsləri qəbul edib, onların müraciətləri dinlənilib: “Müraciət həmin həkimlərin aldıqları klinik ordinatura və internatura təhsilinə əsasən tibb fəaliyyəti ilə məşğul olmalarına icazə verilməsi ilə bağlı olub. Bildirilib ki, Səhiyyə Nazirliyi məsələnin tənzimlənməsi üçün normativ hüquqi akt layihəsi hazırlayıb və razılaşdırılması üçün Təhsil Nazirliyinə təqdim edib. Müraciət edən həkimləri prosesin gedişatı ilə mütəmadi olaraq məlumatlandırmaq üçün əlaqə nömrələri götürülüb. Hər bir mərhələ barədə onlarla əlaqə saxlanılacaq".
Onu da qeyd edək ki, bu gün bölgələrdə həkim çatışmazlığı yaşanır. Bunu rəsmi şəxslər də etiraf edib. Qeyd edilib ki, əksər bölgələrdə həkim çatışmır. Maraqlıdır, belə bir problem yaşandığı halda xaricdə həkimlik ixtisası üzrə təhsil almış şəxslərin bölgələrdə çalışması üçün niyə şərait yaradılmır?
“Həkimlər Azərbaycan vətəndaşıdırlarsa, əlbəttə, işlə təmin edilməlidirlər, onların ölkədə çalışmasına şərait yaradılmalıdır”
Həkim ekspert Pərvanə Mustafayeva qeyd etdi ki, həkimlər Azərbaycan vətəndaşıdırlarsa, əlbəttə, işlə təmin edilməlidirlər, onların ölkədə çalışmasına şərait yaradılmalıdır: “Həkimlik ixtisası üzrə bakalavr, klinik ordinatura təhsili və internatura müddətindən sonra hər bir həkim işləmək, qazandığı bilikləri təcrübədə tətbiq etmək istəyir. Yüksək tibb təhsili almış həkimlərin potensialından düzgün istifadə edilməlidir”.
Həmsöhbətimiz onu da əlavə etdi ki, bu gün bölgələrdə həkim çatışmazlığı yaşanır. Gənclərin kənd yerlərində çalışmamasının isə müəyyən səbəbləri var: “Bölgələrlə müqayisədə paytaxtda gəlir daha çoxdur. Bu səbəbdən ixtisaslı həkimlər də ya paytaxta üz tutur, ya da xarici ölkələrə. Çünki özəl tibb müəssisələrinin böyük əksəriyyəti Bakıda cəmlənib. Bölgələrdə həkimlərin qazanc imkanı Bakı ilə müqayisəolunmaz dərəcədə aşağıdır. Bakıda bir deyil, bir neçə yerdə işləmək imkanı var. Çünki həkimlər dövlət xəstəxanaları ilə yanaşı, özəl klinikalarda işləmək imkanına sahib olurlar. Kənd yerlərində isə belə imkan yoxdur və ona görə də gənc həkimlərin regionlara marağı azdır. Bölgələrdə həkim çatışmazlığının kökündə dayanan problem əsasən bununla bağlıdır. Bu kimi problemlər həll olunarsa gənclər bölgələrdə çalışmağa maraq göstərər”.
Günel CƏLİLOVA
