Ötən il, bütün dünyada olduğu kimi, Azərbaycanda da koronavirus pandemiyası ilə bağlı məhdudiyyətlər gözə çarpırdı. Rəsmi rəqəmlərə görə, 2021-ci ildə ölkədə 398 min 247 nəfər koronavirusa yoluxub. Həmin il boyunca 3 milyon 668 mindən çox koronavirus testi aparılıb, 5 min 717 nəfərsə bu xəstəlik ucbatından həyatını itirib.
Nazirlər Kabinetinin 2021-ci ildəki fəaliyyətinə dair hesabatından məlum olur ki, ötən il Azərbaycanda koronavirus pandemiyasına qarşı mübarizə tədbirlərinə 800 milyon 800 min manat xərclənib. Bu vəsaitin 521 milyon manatı dövlət büdcəsi hesabına qarşılanıb. Yerdə qalan 280 milyon manat isə İcbari Tibbi Sığorta Fondunun vəsaiti hesabına qarşılanıb. Hökumətin koronavirus pandemiyası ilə bağlı xərclərini nəzərdən keçirəndə məlum olur ki, əsas xərc istiqaməti vaksinlərin alınması olub. 2021-ci ildə Azərbaycanda vaksinlərin alınmasına 314 milyon manat - pandemiya ilə bağlı bütün xərclərin 35 faizi sərf edilib. Nazirlər Kabinetinin hesabatında müxtəlif vaksinlərə xərclənən vəsait də göstərilib. Məsələn, COVAX platforması vasitəsilə əldə edilən 2 milyon doza vaksin (Pfizer) üçün 47 milyon 400 min manat xərclənib.
Hesabatda diqqəti çəkən məqam odur ki, indiyədək ölkəyə pandemiya ilə mübarizə çərçivəsində xaricdən 361 həkim dəvət edilib. Onların 236 nəfəri kubalı olub. Maraqlıdır, niyə əcnəbi həkimlərin üçdə ikisi Kubadan olan həkimlər olub? Belə baxanda, Çin bizə məsafəcə daha yaxındır, üstəlik orada COVİD üzrə həkimlər daha çoxdur. Kuba həkimlərinə üstünlük verilməsi hansı amillərlə bağlı ola bilər?
“Öz həkimlərimiz ola-ola, niyə məhz Kubadan olan həkimlərə üstünlük verildiyi bəlli deyil”
Sözügedən məsələyə aydınlıq tibb elmləri doktoru, professor Adil Qeybulla bununla bağlı bir sıra məqamlara toxundu: “Azərbaycanda pandemiya ilə mübarizədə xeyli işlər görülüb. Məsələ ondadır ki, Azərbaycan Cənubi Qafqazda öz vətəndaşlarını vaksinasiya edən ilk ölkə olub. Baxmayaraq ki, COVAX platforması çərçivəsində bizə yardım olmadı. Ancaq buna baxmayaraq qardaş Türkiyənin köməkliyi ilə biz xeyli işlər gördük. Nəticədə biz bu gün kollektiv immunitetə demək olar çatmışıq. Ölkədə epidemioloji vəziyyət demək olar stabildir. Lakin pandemiyanın gedişində xeyli problemlər də oldu. Bu, dərman bazarında xaos idi. O cümlədən, xaricdən həkimlərin dəvət olunmasında problemlər vardı. Azərbaycandaki həkimlərin resurslarından yetərincə istifadə olunmadı. Halbuki, bizim yetərincə potensialımız var idi və ondan istifadə etmək olardı. Öz həkimlərimiz ola-ola, niyə məhz Kubadan olan həkimlərə üstünlük verilməsi bəlli deyil. Düzdür, Kuba kasıb ölkə olsa da səhiyyəsi xeyli güclüdür. Ola bilsin ki, orada bu sahə ilə bağlı mütəxəssislər olub. Ancaq nəzərə almaq lazımdır ki, pandemiya ilə əlaqədar xüsusi qabiliyyətə malik əcnəbi həkimlərə ehtiyac yox idi. O baxımdan biz öz resurslarımızdan istifadə etməli idik. Xaricdən həkim gətirmək daha çox vəsait tələb edir. O baxımdan niyə məhz Kuba həkimlərinə üstünlük verilməsi bizə də aydın deyil. Səhiyyə rəsmiləri buna aydınlıq gətirməlidir”.
Bir sözlə, professor hesab edir ki, məsələyə aydınlıq gətirilməlidir.
Vidadi ORDAHALLI
