Son zamanlar vətəndaşlar arasında bəzi dövlət xəstəxanalarda xidmətin səviyyəsindən narazılıq edənlərə rast gəlmək olur. Bəzi vətəndaşlar mətbuat vasitəsilə şikayət edirlər ki, dövlət xəstəxanaları xəstələrə sistem köçürməkdən imtina edir.
Bu barədə mətbuata şikayət edən vətəndaşların yerli mətbuata bildirdiyinə görə, qazdan zəhərləndiyi üçün təcili olaraq Sabunçu rayon xəstəxanasına çatdırılıb, lakin xəstəxana ona sistem köçürməkdən imtina edib. Bildirilib ki, dövlət tərəfindən buna icazə verilmir.
Doğrudanmı dövlət xəstəxanalarında xəstələrə sistem köçürülməsinə icazə verilmir? Xəstələrə sistem köçürülməməsinin səbəbi nədir? Bir insan aptekdən sistem alıb evində köçürtdürə bilirsə, bu xəstəxanada nə üçün mümkün olmasın?
Elnarə Baxış: “Xəstəxanalarda vətəndaşa sistem həkim tövsiyəsi və resepti əsasında köçürülür”
Məsələ ilə bağlı TƏBİB-in İctimaiyyətlə əlaqələr və marketinq şöbəsinin əməkdaşı Elnarə Baxışla əlaqə saxladıq. E.Baxış “Bakı-Xəbər”ə açıqlamasında qeyd etdi ki, dövlət xəstəxanalarında sistem yalnız həkim tövsiyəsi və resepti əsasında vətəndaşa köçürülür: “Qeyd etməliyik ki, xəstəxanalarda vətəndaşa sistem həkim tövsiyəsi və resepti əsasında köçürülür. Bəzi hallarda isə reseptsiz şəkildə vətəndaş sistem köçürülməsini tələb edir ki, bu da yolverilməzdir”.
E.Baxışın sözlərinə görə, həkim tövsiyəsi və resept əsasında hansısa müraciət edən xəstəyə sistem köçürülməməsi mümkün deyi, əgər belə bir fakt varsa onu quruma təqdim etsinlər və qurum bu barədə araşdırma aparsın. “Məsələnin araşdırılması üzrə konkret fakt göstərilməsini xahiş edirik. Belə fakt olarsa biz onu araşdırarıq”.
Ədalət Rüstəm: “Təyinat olmadan heç bir xəstəyə sistem köçürülə bilməz”
Azərbaycan Həkimlər Birliyinin İdarə Heyətinin üzvü, professor Ədalət Rüstəm də bildirdi ki, dövlət xəstəxanalarında həkim göstərişi, təyinatı olmadan xəstələrə sistem köçürülməsi qadağandır. Professorun sözlərinə görə, son zamanlar kor-koranə sistem köçürtdürmək dəbə minib, amma bu yolverilməzdir: “Məsələ bundadır ki, bizim insanlar elə bilirlər istənilən xəstəlik zamanı sistem köçürmək onları xilas edir. Sistem köçürmək yalnız həkim təyinatı əsasında olmalıdır. Adətən 99 faiz hallarda sistem yemək qəbul edə bilməyən xəstələrə təyin olunur. Yəni insan qidalana bilmirsə ona o zaman sistem köçürülməlidir. Sistem yalnız həkim təyinatı və göstərişi əsasında köçürülməlidir. Kimə gəldi sistem köçürmək olmaz, elmdə belə bir şey yoxdur. Sistem müalicə vasitəsi deyil. Xəstəxanalar tamamilə düzgün edib həkim göstərişi olmadan xəstələrə sistem köçürmürlər. Təyinat olmadan heç bir xəstəyə sistem köçürülə bilməz”.
İradə SARIYEVA
