Artıq bir neçə gündür sosial şəbəkələrdə ölkədəki A4 formatlı kağızların qiymətlərinin artımı ilə bağlı ciddi müzakirələr gedir. Əvvəllər A4 formatlı kağızlar 4-5 manata satılırdısa, hazırda həmin qiymət 9-10 manat təşkil edir.
Hətta qeyd edə bilərik ki, bir çox məktəb ləvazimatları satılan mağazalarda A4 formatlı kağızlar yoxa çıxıb. Hansı mağazada varsa, onun da qiymətini ikiqat artırıblar.
Bahalaşmanın səbəbini isə bir çox insanlar Rusiya-Ukrayna müharibəsi, yerli istehsalın olmaması ilə əlaqələndirir. Rusiyanın Ukraynaya hərbi müdaxiləsindən sonra Almaniyanın ixracı dayandırması Azərbaycanda da kağız ixracını dayandırıb.
Onu da qeyd edək ki, Moskva Birjasında “VK Company”nin kağızları artıq 70-80% bahalaşıb. Bundan əvvəl qiymətlərin, orta hesabla, 30-40 faiz artırıldığı qeyd edilirdi.
Bildirək ki, ötən həftədən etibarən Rusiya bazarında da sözügedən formatda olan kağızın qiymətinin beş dəfəyədək yüksəlməsi ilə bağlı məlumatlar yayılıb. Bildirilir ki, təxminən bir ay əvvəl 500 vərəqlik A4 kağızı 300 rubla satılırdısa, hazırda 1000-2000 rubla satılır.
Kağız idxalçıları bildirirlər ki, hazırda ölkənin bu məhsula olan tələbatını Çin, Hindistan və ya Portuqaliyadan alınan məhsulla ödəmək olar. Ən asan yol isə Çindən idxaldır ki, bu da ən azı bir neçə ay zaman və əlavə xərc tələb edir.
Ekspertlər qeyd edir ki, Azərbaycan bazarında ən çox istehsalı Rusiyada olan “Sveto Copy” və "Snequroçka" A4 kağızları satılır. Artıq Rusiya istehsalçıları bu məhsulları Azərbaycana göndərməyi dayandırıblar və səbəb kimi kifayət qədər A4 kağız olmadığını bildirirlər. Artıq zavodlar dilerlərinə A4 kağızları xaricə satmamaları barədə xəbərdarlıq da edib.
Natiq Cəfərli: “Kağız daha çox Rusiyadan alınılırdı, indi Rusiyanın özündə istehsal dayandığı üçün vəziyyət daha da ciddiləşir”
Məsələ ilə bağı fikir bildirən iqtisadçı Natiq Cəfərli qeyd etdi ki, kağız daha çox Rusiyadan alınılırdı. İndi Rusiyanın özündə istehsal dayanıb: “Çünki Rusiya komponentləri xaricdən alırdı. Yəni kağız istehsal etmək üçün kimyəvi maddələri Finlandıiyadan alırdı. İndi Finlandiya həmin kimyəvi maddələrin Rusiyaya verilməsinə qadağa qoyub. Bu da kağız qiymətlərinə çox mənfi təsir göstərdi. Bundan başqa, çox böyük ehtimal, tikinti materiallarının qiymətində də artım müşahidə olunacaq. Rusiyadan ən çox aldığımız taxta-şalban məmulatlarıdır ki, onların da qiymətin də artımın olması gözlənilir. Yəni hərtərəfli ərzaq və qeyri-ərzaq məhsullarında qiymət artımının olması, təəssüf ki, artıq baş verir və bundan sonra da sürətlənə bilər”.
Şahbaz Xuduoğlu: “Belə davam edərsə, çap məhsulları sıradan çıxacaq, çünki…”
"Qanun” Nəşriyyatının direktoru Şahbaz Xuduoğlunun sözlərinə görə, belə davam edərsə, çap məhsulları sıradan çıxacaq. Çünki əsasən kağız idxal edən ölkələr müharibə şəraitindədir: “Azərbaycana kağız Rusiya və Ukraynadan gəlirdi. Hazırda gəlmir, bircə Çin qalır. Çindən də kağız 2-3 aya gəlib çatır. Orda da qiymətlər həddindən artıq bahalaşıb. Avropa kağızını müxtəlif yerlərdən, İndoneziya və Çindən alır. Ölkəmizə baha qiymətə gəlir. Almaniya, Finlandiya istehsalçı ölkədir, lakin həmin ərazilərdən də gətirmək qiyməti yüksəkdir.
Əvvəldən nəşr edilən kitabların qiyməti olduğu kimi satılacaq. Yeni qiymətlər mütləq qalxacaq. Ay yarım əvvəl qəzet, kitab kağızının qiymətinin 1700 dollara qalxmasını demişdim. Amma artıq 1700 deyil, 2100 dollara yüksəlib. 1 ton offset ( mətbəə ) çapı kağızının qiyməti durmadan artır”.
Günel CƏLİLOVA
