Məlum olduğu kimi, 90-cı illərdə Azərbaycanda əksər rayonlarda işıq fasilələrlə verilirdi. Kəndlərin çoxuna qaz çəkilməmişdi. Bunun da səbəbi bəlli idi. SSRİ dağılmışdı, ölkə yeni müstəqillik ələ etmişdi. Bununla yanaşı, Ermənistanla qanlı müharibə nəticəsində ərazilərimiz işğal altına düşdü, 1 milyon qaçqın və məcburi köçkünün olduğu bir ölkədə belə problemlərin olması təbii idi.
Neft pulları ölkəyə daxil olduqca böyük infrastruktur layihələri həyata keçirildi. O cümlədən, elektrik xətləri yeniləndi, rayonlar qazlaşdırıldı. Əfsuslar olsun ki, bütün bunlardan Lerik rayonunun bir sıra kəndləri yararlana bilmədi. Daha doğrusu, kəndlərin sadalanan problemləri həll edilmədi. Bu səbəbdən Lerikin bir sıra kəndləri ötən əsrin 90-cı illərinə yenidən qayıdır. Problem ondadır ki, rayon mərkəzindən məsafəcə uzaq olan kəndlərdə elektrik enerjisinin fasilələrlə verilməsi adi hal alıb. Bir balaca hava dəyişən kimi, Əliabad, Gürdəsər, Şingədulan, Ərdəbilə, Soru, Lərmərud, Kirəvud, Boykəndil və digər kəndlərdə elektrik olmur. Səbəblərdən biri də elektrik dirəklərinin ağacdan olması ilə əlaqədardır. Külək olan kimi, nasaz elektrik xətlərində açılmaların baş verməsi qaçılmaz olur. Havanın soyuq olduğunu nəzərə alsaq, bu, sakinlərə ciddi problemlər yaradır. Digər problem ondadır ki, adıçəkilən kəndlər həm də qazlsaşdırılmayıb. Əvvəl heç olmasa meşədən odun gətirmək mümkün idi. Neçə illərdir buna da imkan verilmir. Kimin imkanı varsa, baha qiymətə də olsa odun tədarük edə bilir. İmkanı olmayan, necə deyərlər, qalır soyuqda.
“XXI əsrdə yaşayırıq, amma kəndlərdə işıq dirəklərinin bir qismi çürümüş ağacdandır”
Əslən Lerikdən olan Dirçəliş və Tərəqqi Partiyasının sədri Ramil Hüseynov belə acınacaqlı vəziyyətin yaranmasını rayon İcra Hakimiyyətinin laqeyidliyi ilə əlaqələndirdi: “Rövşən Bağırov 14 il rayona rəhbərlik etdi. Bu müddət ərzində dəfələrlə sözügedən problemlərin həlli ilə bağlı məsələ qaldırıldı. Ancaq hər dəfə, başda Rövşən Bağırov olmaqla, rayon rəhbərliyi bunu görməzdən gəldi. Həmin kəndlər rayon mərkəzindən uzaqda yerləşir. Nəinki elektirik-qaz təminatı pis vəziyyətdədir, heç o kəndlərin düz-əməlli yolları belə yoxdu. Üstəlik, artıq iki ildir rayona icra başçısı təyin olunmayıb. İcra başçısının səlahiyyətləri birinci müavin Cəlil Baxşıyevə tapşırılıb. Rayonun bərbad günə düşməsində onun “müstəsna” xidmətləri var. Elə bu bərbad idarəçiliyin nəticəsidir ki, Lerik kəndləri sürətlə boşalır. Doğulduğum Soru kəndi rayonun ən böyük kəndlərindən biri idi. Bir vaxtlar bu kənddə 400 ev təsərrüfatı var idisə, hazırda 90 evdə yaşayış var. İş yox, qaz yox, bu tərəfdən də elektrik fasilələrlə verilir. Havaların soyuq keçdiyi bir vaxta bunun nə demək olduğunu geniş izah etməyə ehtiyac yoxdur. XXI əsrdə yaşayırıq, amma kəndlərdə işıq dirəklərinin bir qismi çürümüş ağacdandır. Aydın məsələdir ki, belə olan halda küləkli-yağmurlu havada dayanıqli elektrik təchizatından söhbət gedə bilməz. Məgər rayon rəhbərliyi bunları bilmir? Çox yaxşı bilir, sadəcə əhaliyə əzab verməkdən zövq alırlar”.
Bu səbəbdən partiya sədri hesab edir ki, bu gedişlə Lerik kəndlərində adam qalmayacaq.
Vidadi ORDAHALLI
