Lənkəranın Göyşaban kənd məktəbi inanılmaz dərəcədə bərbad vəziyyətdədir. Problem ondadır ki, tavanı uçub-dağılmaq üzrə olan, döşəməsi yararsız, odun sobası ilə qızdırılan qəzalı tam orta məktəbdə 56 müəllim dərs deyir, 326 şagird oxuyur.
Tövlədən də pis gündə olan məktəbdə təhsil üçün faktiki olaraq heç bir şərait yoxdu. Müəllimlər deyir ki, ötən əsrin 60-cı illərindən məktəb demək olar qəzalı vəziyyətdədir. Hazırda isə istənilən vaxt uça bilər. Üstəlik, 3 korpusdan ibarət olan məktəb 225 yerlikdir, amma 326 nəfər orada təhsil alır. Sobalar yansa da siniflər soyuq olur. Çünki divarlar aşınıb, yağış yağanda su siniflərə damır. Lənkəran Təhsil Şöbəsindən bildirilib ki, vəziyyətdən xəbardardılar. Ancaq nə zaman yeni məktəbin tikiləcəyi ilə bağlı bir söz deyilmir. Sadəcə bildirirlər ki, yaxın illərdə yeni məktəbin tikilməsi nəzərdə tutulub. O cümlədən o da qeyd edilib ki, hər hansı bir hadisə baş verərsə, rayon Təhsil Şöbəsi buna görə məsuliyyət daşıyır. Bütün hallarda, yarım əsrdir təmir üzü görməyən qəzalı məktəbin nə zaman yeni bina ilə əvəz olunacağı bəlli deyil. Belə görünür ki, yüzlərlə şagird elmə-biliyə hələ uzun müddət belə acınacaqlı şəraitdə yiyələnməli olacaq.
“Rayonun təhsil qurumu buna görə məsuliyyət daşıyır”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı hesab edir ki, çoxsaylı şagirdin təhsil aldığı məktəbin yarım əsrdir təmirsiz olmasının günahı rayon Təhsil Şöbəsindədir: “Adətən əhalisi az olan kəndlərdə böyük məktəblər inşa edimir. Şagird azlığına görə, belə kəndlərdə tez başa gələn modul tipli məktəblər tikilir. Göyşaban kəndi böyük olduğuna görə, orada modul tipli məktəb inşa etmək doğru olmaz. Çünki məktəbdə şagird sayı çoxdur. Gərək Lənkəran Təhsil Şöbəsi bununla bağlı vaxtında məsələ qaldıraydı. İcra Hakimiyyəti də bu işə kömək etməli idi. Tutaq ki, rayonun yerli icra qurumunun buna imkanı yox idisə, o zaman Təhsil Nazirliyinə təqdimat göndərilməli idi. 2004-cü ildən sonra ölkədə 3 mindən çox məktəb yenidən tikilib və əsaslı təmir edilib. Belə olan halda necə olur ki, Göyşaban kənd tam orta məktəbi yenilənmir? Deməli, müvafiq mərkəzi qurumlara zamanında müraciət olunmayıb, təqdimat verilməyib. Ona görə də rayonun təhsil qurumu buna görə məsuliyyət daşıyır. Şagird sayı çox olan məktəbin qəzalı vəziyyətdə qalması biabırçılıqdır. Bu baxımdan hesab edirəm ki, təcili tədbirlər görülməlidir”.
Professor onu da qeyd etdi ki, təhsil vacib sahə olduğuna görə, bu kimi məsələlərə son dərəcə həssas yanaşmaq lazımdır.
Vidadi ORDAHALLI
