Suraxanı rayonu Bahar qəsəbəsinin sakinləri qış əzabı çəkirlər. Qəsəbənin adı bahar olsa da, üzləşdikləri çətinliklər üzündən bundan əsər-əlamət yoxdu. Problem ondadır ki, minlərlə insanın yaşadığı qəsəbədə nə kanalizasiya sistemi var, nə asfalt yol, nə də XXI əsrin tələblərinə uyğun şəhərsalma. Hamısı qarışıb bir-birinə.
Sakinlər bildirir ki, payız-qış mövsümündə onların evlərini tez-tez su basır. Buna səbəb qəsəbədə kanalizasiyanın olmamasıdır. Həyətlərdə “şambo”ların ümidinə qalan sakinlər quyuların tez-tez dolmasından şikayətlənirlər. Bir tərəfdən tullantı suları, o biri tərəfdən yağıntılar nəticəsində yaranan qrunt suları quyuların dolmasına səbəb olur. Minlərlə insanın yaşadığı qəsəbədə nəinki kanalizasiya, asfalt yol, küçə işıqları belə yoxdur. Axşamlar sakinlər telefon işığı ilə evə gəlir. Sakinlər evlərini təmir etsələr də, suyun yaratdığı nəmişlik üzündən əziyyətləri hədər gedir. Palçıq üzundən valideynlər azyaşlı uşaqları qucağında aparmalı olur. Uşaqlar palçığın içində məktəbə gedir. Sakinlər deyir ki, təcili yardım maşını çağıranda ünvanı tapa bilmir. Səbəb odur ki, küçələrin ünvanı yoxdur.
“Azərsu” ASC-dən bildirilib ki, Bakı şəhərinin qəsəbələrinin kanalizasiya sistemi paytaxtın baş planına uyğun olaraq qurulur. Bu çərçivədə Bahar qəsəbəsinin tullantı sularını ötürmək üçün kanalizasiya sistemi çəkiləcək. Suraxanı İcra Hakimiyyəti bildirir ki, nə yoldakı bərbad vəziyyətə, nə evlərin sənədsiz olmasına, nə də ki, küçələrin ünvansız olmasına onlar cavabdehdir.
Görünən odur ki, bir sıra qurumların ötür-ötür oyunu nəticəsində qəsəbənin problemləri bu gedişlə həllini tapmayacaq.
“Zamanında Suraxanı İH kommunal infrastrukturun olmadığı ərazidə pərakəndə...”
Məsələyə münasibət bildirən ekspert Rəsul Cahangirlinin fikrincə, Bahar qəsəbəsində yaranan sosial problemlərə görə əsas cavabdeh qurum Suraxanı İcra Hakimiyyətidir: “Hər bir icra hakimiyyəti borcludur ki, tabeliyindəki qəsəbənin, kəndin sosial problemlərini həll etsin. İcra qurumu bunu həll edə bilmirsə, o zaman müvafiq qurumlr qarşısında məsələni qaldırmalıdır. Nəzərə almaq lazımdır ki, “Yerli icra hakimiyyətləri” haqqında əsasnaməyə görə, qurum ərazidə olan avtomobil yollarının təmirinə, yaşıllaşdırmaya, təmizlik və işıqlandırmaya, eyni zamanda, qəsəbədəki küçələrin ünvanlanması məsələsinə cavabdehlik daşıyır. Qurum borcludur ki, infrastrukturun qurulmasında birbaşa iştirak etsin. Onu da qeyd edim ki, belə qəsəbələrdə tikintinin pərakəndə şəkildə aparılması kommunal məsələlərin həllində və digər infrastruktur layihələrin icrasında problemlərə səbəb olur. Nəticədə yenə əziyyət çəkən sakinlər olur. Bu məsələnin bir tərəfi. Ancaq iş ondadır ki, pərakəndə tikililərə görə məsuliyyət İcra Hakimiyyətinin üzərinə düşür. Zamanında Suraxanı İH kommunal infrastrukturun olmadığı ərazidə pərakəndə tikinti işlərinin qarşısını alsaydı, indi insanlar bu zillətə düşməzdilər. Məgər onlardan xəbərsiz tikinti işləri aparılıb? Əsla yox”.
Bu səbəbdən ekspert hesab edir ki, yaranan problemlərə görə icra sturukturunun günahı çoxdur.
Vidadi ORDAHALLI
