Bakı qəsəbələrindən birində pendir sexində havaya qalxan qara tüstü yerli sakinləri dəhşətə gətirib. Havaya qalxan tüstü Maştağa qəsəbəsinin Savalan adlanan ərazisində yerləşən pendir sexinə aiddir. Sakinlər iddia edir ki, sexdə pendir bu yolla hazırlanır.
Sakinlər qeyd edir ki, zavod işlək olanda ətrafa zəhərli tullantılar yayılır. Həmin tullantılar havanın çirklənməsinə, insanların zəhərlü tüstü ilə nəfəs almasına səbəb olur: “Zavod işləməyə başlayanda ətrafa qara tüstü yayılır. Bununla bağlı aidiyyəti qurumlara müraciət etsək də, bizə hər hansı bir cavab verilməyib”.
Sakinlər onu da bildirir ki, isti havalarda, yay vaxtı buna dözə bilmirlər: “Nə qədər qapımızı-pəncərəmizi bağlayıb evdə oturmalıyıq?”.
“Sexlər, hər hansı bir fəaliyyət müəssisələri yaşayış yerlərindən aralıda fəaliyyət göstərməlidir”
Sosioloq Aytəkin Kamranqızı bildirdi ki, sexlər, hər hansı bir fəaliyyət müəssisələri yaşayış yerlərindən aralıda fəaliyyət göstərməlidir: “Yaşayış evlərinin tam yaxınlığında hər hansı bir sexin olması düzgün deyil, həm sakinlərin sağlığı, həm də rahatlığı baxımından fəaliyyət müəssisələrin yaşayış yerlərindən kənarda olmalıdır. Yaşayış evlərinin arasında olan sexlər çox güman ki, küstar şəkildə fəaliyyət göstərir. Aidiyyatı qurumlar həmin ünvanda araşdırma aparsalar, sexin standartlara uyğun şəraitdə fəaliyyət göstərmədiyi müəyyən olunar. Müasir dövrün tələbinə cavab verən fəaliyyət müəssisələrindən ətrafa qara tüstü yayılmır. Atmosfer havasının mühafizəsi haqqında qanuna görə, açılan hər bir müəssisəyə nazirlik tərəfindən atmosferə atılan zərərli maddələrin miqdarını təyin edən xüsusi icazə sənədi verilir. Təbii ki, hər bir müəssisə fəaliyyət göstərən zaman atmosferə də müəyyən miqdarda təsir göstərir. Bunun üçün müəssisələr qanunvericiliyin tələblərinə əməl etməli, filtrlər quraşdırmalı və atmosfer havasına atılan zərərli maddələrin dəqiq hesabatını aparılmalıdır. Belə müəssisələr insanların yaşadığı ərazidən kənarda olmalıdır”.
Günel CƏLİLOVA
