Cari ilin mart ayının 16-da Azərbaycan Respublikasının Qırğız Respublikasındakı Səfirliyi Novruz bayramı münasibətilə Hyatt Regency Bişkek otelində bayram şənliyi keçirmişdir.
Bayram tədbirində Qırğızıstan ictimaiyyətinin tanınmış nümayəndələri, soydaşlarımız və jurnalistlər iştirak etmişlər.
Səfir Lətif Qəndilov tədbirlərdə çıxış edərək tədbir iştirkaçılarını Novruz bayramı münasibətilə təbrik etmiş və xalqımız Azərbaycan Prezidenti, Müzəffər Ali Baş Komandan cənab İlham Əliyevin və rəşadətli Azərbaycan Ordusunun sayəsində bu il bayramı xüsusi sevinclə, başını dik, qalib xalq kimi qarşıladığımızı vurğulamışdır. Qeyd etmişdir ki, ümummilli lider Heydər Əliyevin hələ Sovet Ittifaqı dövründə Azərbaycana rəhbərlik etdiyi zaman xalqımız tərəfindən Novruzun geniş şəkildə qeyd olunmasına imkan yaradıb. Səfir Azərbaycanda Novruzun yüksək səviyyədə qeyd edildiyini və ölkəmizin təşəbbüsü ilə dünyaya tanıtdırıldığını bildirərək, milli-mədəni irsimizin təbliği istiqamətində Azərbaycanın Birinci vitse-prezidenti Mehriban Əliyevanın təşəbbüsü ilə Novruz bayramının UNESCO-nun Ümumdünya İrs Siyahısına salındığını, 2010-cu ildə isə ölkəmizin təşəbbüsü və Novruzu qeyd edən digər ölkələrin dəstəyi ilə 21 mart tarixinin BMT-nin 64-cü sessiyasında Beynəlxalq Novruz Günü elan edildiyini söyləmişdir. Bu bayram günlərində diaspor nümayəndələrini milli birlik və azərbaycançılıq məfkurəsi ətrafında birləşməyə çağırmışdır.
Mərasimdə Qırğız Respublikasının Prezident Aparatının keçmiş rəhbəri, Qazaxıstan, Tacikistan Respublikalarında Qırğızıstanın səfiri olmuş Janış Rustenbekov, Qırğızıstandakı “Azəri” İctimai Birliyinin sədri, Qırğızıstanın Əməkdar hüquqşünası Əzizağa Əliyev və tanınmış diplomat, görkəmli qırğız yazıçısı Çingiz Aytmatovun oğlu Askar Aytmatov çıxış etmişlər. Onlar Azərbaycan xalqını Novruz bayramı münasibətilə təbrik və xalqımıza xoşbəxtlik, rifah və əmin-amanlıq arzu etmişlər.
Bütün tədbir boyu Novruz bayramından bəhs edən videoçarx nümayiş olunmuş və Azərbaycan musiqiləri səsləndirilmişdir. Həmçinin mərasimdə rəngarəng milli rəqslərimiz nümayiş olunmuşdur.
Bayram tədbirində Azərbaycan mətbəxinin ləziz xörəkləri, o cümlədən şah plov iştirakçılar tərəfindən çox bəyənilib. Azərbaycan diasporunun üzvləri tərəfindən nəfis şəkildə bəzədilmiş xonçalarla bərabər, paxlava və şəkərbura kimi Azərbaycan şirniyyatları da çox böyük maraqla qarşılanıb.
