Mətbuatda yayılan məlumatlara görə, Bakının Xətai rayonu, Gəncə prospekti 89 ünvanında təhlükəli vəziyyət yaranıb. Belə ki, Əhmədli qəsəbəsində dağ yamacında yaşayış binasının tikintisi sakinlər üçün əməlli-başlı təhlükə mənbəyinə çevrilib.
Bu barədə danışan sakinlər bildiriblər ki, vaxtilə tikinti məqsədilə aparılan qazıntı işlərindən sonra torpaq sürüşməsinin qarşısının alınması üçün qabaqlayıcı tədbirlər görülməyib. Əvvəllər sakinlər və məktəblilərin istifadə etdiyi pilləkənli piyada yolu dağılaraq qəzalı hala düşüb.
Qeyd edilir ki, Xətai rayonu, Gəncə prospekti 89 ünvanında yerləşən çoxmərtəbəli yaşayış binasının sakinlərinin həyatı təhlükədədir və bu barədə rəsmən hələ bir tədbir görülməyib. Qeyd edilənə görə,
sürüşmə nəticəsində məktəbə gedən yolun böyük hissəsi uçub. Sürümənin aktivləşməsinə dağ yamacında sözügedən yaşayış binasının və avtomobil dayanacağının tikilməsi səbəb olub.
Sakinlər məsələ ilə bağlı Xətai rayon İcra Hakimiyyətinə müraciət ediblər.
Vətəndaşların üzləşdiyi problemlemi araşdırmaq məqsədilə Xətai Rayon İcra Hakimiyyətinə dəfələrlə zəng vursaq da (tel nömrələri 012 4900851, 4900808)Ə, zənglərimizə cavab verən olmadı.
Bu səbəbdən sakinlərin üzləşdiyi ağır problemlə bağlı Xətai rayon İcra Hakimiyyətinin mövqeyini öyrənə bilmədik. Qurumun bu istiqamətdə hər hansı bir tədbir görüb-görmədiyi məlum deyil.
Bu günlərdə ölkə başçısı icra başçılarına səsləndi ki, qanunsuz tikililərin qarşısını alsınlar, işbazlarla sövdələşməyə getməsinlər. Göründüyü kimi, yenə də hansısa bir işbazın əməlindən sakinlər, vətəndaşlar əziyyət çəkir.
“...Qənaətimə görə, bunun hamısının başında dayanan yalnız korrupsiya faktorudur”
Sosial-iqtisadi sahə üzrə ekspert İlqar Hüseynli “Bakı-Xəbər”ə bildirdi ki, Bakıda belə hallar geniş yayılıb. “Çox təəssüflər olsun ki, Bakıda belə neqativ hallar geniş vüsət alıb, çox geniş şəkildə bu tipli hallar baş verir. Tikinti şirkətləri vətəndaşların gündəlik istifadə etdiyi infrastrukturu dağıdırlar, sonra isə məsuliyyətdən yayınırlar. Sanki bu adi bir haldır və bu şirkətlər istədikləri kimi davranırlar, bunların hədəfi vətəndaşların maraq və mənafeləri deyil, bir binanı maksimum dərəcədə tez tikib və maksimum baha satıb ordan gəlirlərini çoxaltmaqdır. Bu səbəbdən də, təəssüflər olsun ki, bizim tikinti şirkətləri ilə bağlı normativlərə əməl olunmur. İstər şəhərsalma imkanları, istər tikinti ərazisində infrastrukturun qorunması, yenilənməsi, seysmik göstəricilər baxımından problemlər var. Bu hələ də problem olaraq qalır. Çünki burada torpaq sahələrinin, eləcə də tikintiyə icazənin alınması məsələsində ciddi korrupsiya faktorları var. Yəni tikinti şirkətinin sahibi ərazidə tikinti aparmaq üçün əlaqədar qurumlardan icazə almaq üçün böyük məbləğdə rüşvət verir, burada böyük rüşvətdən, korrupsiyadan söhbət gedir. Korrupsiya zəncirində həm də tikinti şirkəti iştirakçıya çevrildiyinə görə onda bir arxayınçılıq yaranır. Çünki o tikintini orada baş verən hallara cavabdeh olan dövlət qurumları gəlib yoxlayacaq. Həmin orqanlar tikinti şirkətindən rüşvət alıbsa, təbii ki, kimə kimdən şikayət olunacaq? Yəni buna görə də, tikinti şirkətləri, işbazlar çox arxayın davranırlar, vətəndaşların hüquq və mənafelərini nəzərə almırlar, şəhərin ümumi arxitekturasını pozurlar. Bu problemlər o qədər dərindir ki, qənaətimə görə, bunun hamısının başında dayanan yalnız korrupsiya faktorudur. Əgər ortada hər hansı bir korrupsiya olmasa, maddi maraq müqabilində tikintilər başlanmasa, onlara icazə verilməsə, qanunun aliliyi hər yerdə gözlənilsə belə olmaz. O cümlədən də Əhmədli ərazisindəki o problemin baş verməməsi üçün bütün amillər nəzərə alınsaydı vətəndaşlar bu halı yaşamazdılar”.
Bu məsələlərin baş verməsinin ölkədəki korrupsiya faktorunun tikinti sektorunda zəncirinin olmasından xəbər verdiyini deyən İ.Hüseynlinin sözlərinə görə, biz çox gecikmişik və Bakını bərbad vəziyyətə salıblar, əhalinin mənafeyinə zidd addımlar atılır. “Bu qədər danışılır, ekspertlərin rəyi öyrənilir, çox təəssüflər olsun ki, dövlətin aparıcı qurumları, o cümlədən də Baş Prokurorluq MTK-larla bağlı şikayətlərə heç ciddi reaksiya vermir” - deyə İ.Hüseynli qeyd etdi.
İradə SARIYEVA
