Vəzifəsindən aşlı olmayaraq, kim öz bacarığını, əməyini elinin, obasının xeyrinə yönəldir, o, tarixə çevrilərək əbədiyaşarlıq qazanır. Şirvan Muradov da gözəl dünya yaratmağa qadir olan belə insanlardan idi. Qısa ömür yaşasa da, Vətən, yurd sevgisinin ona bəxş etdiyi mənəvi ucalığı zaman-zaman heç bir qüvvə ürəklərdən silib apara bilməz, həyat durduqca, Azərbaycan var olduqca yaşayacaq. Şirvan Muradov indi cismən aramızda olmasa da, sağlığında gördüyü işlər örnəyə çevrilməklə harada günəş müqəddəsliyi var, sorağı oradan gəlir.
Bir insan xalqına, millətinə nə qədər xidmət edə bilərsə Şirvan müəllim onu edib, bəlkə mümkün olandan daha çox. Onun xeyirxah əməlləri hər kəsin dadına çatıb. Odur ki, təkcə onun adı çəkiləndə həyata əzəmət, ülviyyət gəlir, mehr, məhəbbət görünür. Bu çətin günün kişisində olan qeyrət, namus həm də indikilər üçün işıqlı dünyada insan tək yaşamaqda əsl məktəbdir.
Xalqın gələcəyini düşünməklə zəngin biliyi, mənəvi saflığı, nəcib əməlləri ilə ad qoyan Şirvan Muradov 1924-cü ildə Lerik rayonu, Lərmərud kəndində anadan olmuşdu. Dövrün çətinliyinə baxmayaraq, həyatı dərk edən gündən mənəvi zənginlik, vətənpərvərlik ona yol yoldaşı olur. Özünəməxsus mənəviyyat fəlsəfəsi günlər axıb getdikcə başqasına gərək olmaq, qurub-yaratmaq həvəsi ilə formalaşır. Nəhayət, ağıllı, zəkalı gəncin fitrətən xalq adamı olması 1942-ci ildə tam bilinir. Orta məktəbi yüksək qiymətlərlə bitirib, elə öz doğma rayon xalq məhkəməsində texniki katib vəzifəsinə işə düzəlir. Fəaliyyətə başladığı gündən nəcib istəyini, niyyətini xalq, dövlət naminə yönəldir. Üzərinə düşən tapşırıqları layiqincə yerinə yetirir. Elini, yurdunu həqiqi məhəbbətlə sevən vətəndaş olduğu aydın görünür. Zamanın səfində yalnız yaxşı izlər qoyur. Bu keyfiyyətləri nəzərə alıb Şirvan Muradovu müharibənin ən ağır vaxtında Lerik Rayon Partiya Komitəsinə dəvət edirlər. Burada kargüzar kimi çalışır. İnsanlarla mehriban ünsiyyət yaradır, çətin anlarda xeyirxah əməlləri çoxunun dadına çatır, cəmiyyətdə mövqe sahibi olmaqla şəxsən tanınır.
Bir ildən sonra Şirvan Muradovu Zaqafqaziya Ali Partiya məktəbinə oxumağa göndərirlər. Burada təhsil aldığı 3 il müddətində xalqa fayda vermək amalı, ən əsası Azərbaycan ailəsinə xas təməllər üzərində qurulan insanlıq mədəniyyəti ona layiqli ucalıq qazandır. 1946-cı ildə böyük arzularla məktəbi başa vurub, işıqlı zəka sahibi tək dağlar diyarına qayadır. Gənc Şirvanı Lerik Rayon Partiya Komitəsində təlimatçı vəzifəsinə irəli çəkirlər. O, da üzərinə düşən sosial məsuliyyətini düzgün başa düşür. Yurdunun qaranlıqlarına nurlu çıraq olmaqla qapısı adamların üz tutduğu ümid yerinə dönür. 7 il bu vəzifəni vicdanlı, qüsursuz, nöqsansız yerinə yetirir. Daim insanların xoş güzəranını, firavan həyatını, rayonun oba-oba tərəqqisini düşünməklə irəliyə üz tutur. Haqqı, ədaləti sevən adam kimi ağıllı təklifləri, tövsiyələri, məsləhətləri, təşəbbüsləri xalqın gərəkli oğlunu gördüyü dəyərli, səmərəli işlərə görə bütün rayonda kiçiyin də, böyüyün də sevimlisi edir.
Vətən sevgisi, işıqlı sabahlar haqında arzuları tükənməz olan, düzlük, mərdlik iç dünyasından qaynaqlanan Şirvan müəllimi 1954-cü ildən Rayon Partiya Komitəsində təşkilat şöbəsinin müdiri vəzifəsinə seçirlər. Özündə yüksək mənəvi-əxlaqi keyfiyyətləri cəm etməklə Vətəni, milləti naminə gecə, gündüz bilmədən iş görür. Vicdanlı əməyi, hədsiz dərəcədə yurduna bağlılığı dağlar diyarında çox problemləri yoluna qoyur. Yaxşı işlər, nurlu əməllər sanki mərkəzdən uzaq bir rayonun həyatına yeni nəfəs gətirir. Şirvan müəllim adamlara qarşı mərhəmətli olur, zamanın nəbzini tutur, cəmiyyətdə sağlam mənəvi idealların möhkəm olmasına səy göstərir, gün-güzəran gözəl olsun deyə ətrafındakı insanları nəcib məqsədlərə yönəldə bilir. Ayağı dəyən yerdə hər şey yaxşılığa doğru dəyişir. O, rayonun sosial-iqtisadi inkişafına dəyərli töhfələr verməklə Azərbaycan Kənd Təsərrüfatı İnstitutunu də bitirir.
Aldığı ali savad onun fədakar əməli fəaliyyətinə daha da mənəvi stimul verir. Necə deyərlər, halal zəhməti, zəkası, aydın mövqeyi, dürüst amalı, uzaqgörənliyi Lerik camaatın düşüncə tərzində yaxşılığa doğru bir inqilab yaradır. Şirvan Muradova böyük ehtiram göstərib 1957-ci ildə Lerik Rayon İcraiyyə Komitəsinin sədri vəzifəsini ona tapşırırlar. Bu vəzifədə də insanlara fayda verməklə hörmət qazanır. Nümunəvi, vicdanlı əməyi hər bir leriklinin həyatında hiss olunur. Və həm də saflığına görə qarşı tərəfdən gördüyü doğmalıq, sonsuz sədaqət, məhəbbət Şirvan Muradovu ürəkdən, ilahi bir sevgi ilə doğma rayonuna bağlayır. İllərin səfində leriklilərin yolunda şam tək əriyir, dağlar diyarının abadlıq, quruculuq tarixinə yeni-yeni səhifələr yazır. 8 illik fəaliyyəti ərzində öz camaatına sədaqətlə qulluq edir, nəticədə rayonun bütün sahələrdə inkişaf özünü göstərir, insanların yaşayış tərzi yaxşılaşır.
Bir haşiyə. “Lerik” qəzetinin 20 dekabr 2017-ci tarixli sayı qarşımdadır. Burada İdris Şükürlünün “Parlaq bir sima” yazısından oxuyuram: “Şirvan Muradov hələ ahıllıq yaşına dolmamış müdrik ziyalı zirvəsinə qalxa bildi. O, əsrin dizini qatlamış nurlu ağsaqqal Mahmud Eyvazovun görüşünə dünyanın hər yerindən gəlmiş dövlət, mədəniyyət xadimləri, alimlərlə şəxsən görüşür, işlədiyi rayonun problemlərini həll etməyi onlardan xahiş edirdi. Çox vaxt belə xahişlər nəticəsiz qalmırdı. Mahmud babanın işığına toplaşan hörmətli adamlar öz nüfuz və səlahiyyətləri daxilində İcraiyyə Komitəsinin sədrinə kömək edirdilər. Hər dəfə bir iş həllini tapanda Şirvan Muradov hədsiz dərəcədə sevinirdi...”
Şirvan Muradov bir müddət Kənd Təsərrüfatı İstehsalat İdarəsində böyük iqtisadçı vəzifəsində çalışır. Yalnız insanların mənafeyini düşünür, bütün varlığı ilə özünü, gücünü nəcib əməllərə verir. Halallığa, haqqa tapınmaqla işini görür, hər kəsi öz dilində danışdırır, günlərini yaxşılıq gözündə ucala-ucala yaşayır, ən əsası doğma Lerikə olan övladlıq məhəbbətini quru sözlərdə yox, dünyaya gözəllik gətirən əməllərdə sübuta yetirir.
Ömrünü halallıqla keçirən, xoşbəxtliyini, həyatının mənasını Vətəninə, xalqına gərək olmaqda görən, bütün rayonun birliyini, bir nöqtəyə vurmasını təmin edən, xeyirxahlıq simvolu kimi ad qoyan, kamilliyin, müdrikliyin örnəyi olan Şirvan müəllim Azərbaycan Dövlət Bankının Lerik rayon şöbəsinə rəhbərlik etdiyi vaxtda da özünəməxsusluğu qoruyub saxlaya bilir. Təvazökarlığı, ziyalılığı, yüksək insanlıq mədəniyyəti, əsl vətəndaşlıq mövqeyi onu daha da ucaldır. 1966-cı ildən ömrünün sonunadək, yəni 1978-ci ilə qədər bu məsuliyyətli işi icra edir. Yeganə umacağı millətə, Vətənə ləyaqətlə xidmət göstərmək, gördüyü yaxşı işlə insanların sevgisini qazanmaq olur. Və xalqına ilahi sevgidən doğan bəşəri dəyərləri özündə yaşadan bu istəyinə də çatır. Mənəvi ucalığın zirvəsinə qalxaraq ləyaqətli şəxsiyyət kimi tarixdə izini qoya bilir.
Şirvan Muradov “Fəxri bank işçisi” diplomuna layiq görülür, dəfələrlə rayon sovetinə deputat seçilir. “Lerik rayonunun iqtisadi inkişaf etdirilməsinin yolları” elmi iş yazır... Deməyim odur ki, bu dəyərli insan heç vaxt biliyini, bacarığını, xeyirxahlığını xalqdan əsirgəməyib, yurduna, doğma torpağına sədaqətli bir ömür yaşayıb. Elə bu sədaqətdir ki, işıqlı dünyadan getdiyi 44 il olsa da, bu gün də onun adı qəlblərdə yaşayır.
Zəfər ORUCOĞLU Azərbaycan Jurnalistlər Birliyinin üzvü
