Ölkəmizdə təhsilin inkişafı, onun maddi-texniki bazasının möhkəmləndirilməsi daim dövlətin diqqət mərkəzindədir. Təhsil sahəsində aparılan islahatlar, qəbul olunan Dövlət Proqramları bunun göstəricisidir.
Qeyd edək ki, ölkədə keyfiyyətli və bərabərhüquqlu təhsil imkanının yaradılması üçün, peşəkar kadr potensialı ilə yanaşı, müasir standartlara cavab verən təhsil müəssisələrinin olması da əsas şərtdir. Məlumdur ki, son illər Azərbaycanda bu istiqamətdə həyata keçirilən tədbirlər yararsız məktəblərin sayını xeyli azaltsa da, yenə də təmirsiz, tədrisə yararsız məktəblər var. Qəzalı vəziyyətdə olan məktəblər üçün yeni binaların tikilməsi və əsaslı təmir işlərinin aparılması ilə problem tədricən həllini tapır.
Ancaq yenə də ölkədə qəzalı, tədrisə yararsız vəziyyətdə olan məktəblər var. Təəssüf ki, Lənkəran şəhəri 9 nömrəli tam orta məktəbinin binası təhlükəli vəziyyətdədir. Məktəbin pəncərələri qırıq, hətta bəziləri şüşə ilə yox, sellofanla örtülüb. Döşəmə və tavanlar isə hər an uça bilər. Məlumat üçün bildirək ki, məktəb ötən əsrin 70-ci illərində tikilib və istifadəyə verilib. Bina yarım əsrlik müddət ərzində, kosmetik işlər nəzərə alınmasa, təmir olunmayıb. Məktəbin taxta döşəməsi çürüyüb, sinif otaqlarında dərin çatlar yaranıb. Belə bir məktəb binasında indi 524 şagird təhsil alır. Onların təlim-tərbiyəsi ilə 73 müəllim məşğul olur. Şagirdlər kimi müəllimlər də bu vəziyyətdən narazıdır. Çünki yararsız və imkanları məhdud olan məktəbdə dərs vermək də, almaq da problemə çevrilib. Kifayət qədər təcrübəli müəllimlər şəraitsizlikdən istədikləri keyfiyyətdə tədris edə bilmirlər. Şagirdlər də məcbur olub yeni, təmirli və imkanları geniş olan məktəbələrə üz tuturlar.
Lənkəran şəhər Təhsil Şöbəsi: “Məktəbin tikilməsi 2019-2023-cu il dövlət proqramına salınıb, həmin məktəbin inşasına bu il başlanılacaq”
Lənkəran şəhər Təhsil Şöbəsindən bildirildi ki, Lənkəran şəhəri 9 nömrəli tam orta məktəbində hazıda 524 şagird təhsil alır: “Məktəbin tikilməsi 2019-2023-cu il dövlət proqramına salınıb. Həmin məktəbin inşasına bu il başlanılacaq”.
Nizami Hüseynov: “Tədrisin keyfiyyətinə birbaşa məktəbin infrastrukturu təsir göstərir”
Təhsil eksperti Nizami Hüseynov bildirdi ki, hazırda ölkədə 4447 ümumtəhsil məktəbi var. Bu isə o deməkdir ki, 900-ə yaxın məktəbin yenidən tikilməsinə və ya bərpasına ehtiyac var: “Hazırda bölgələrdə qəzalı vəziyyətdə olan və hər an uçma təhlükəsi ilə üzləşən məktəblər var. Bu isə insanların həyatı üçün olduqca təhlükəlidir. Ölkəmizdə modul tipli məktəblərin sürətlə inşası həyata keçirilərsə, uşaqlar yaxşı şəraiti olan təhsil müəssisələrində təhsilini davam etdirər”.
Həmsöhbətimiz onu da əlavə etdi ki, tədrisin keyfiyyətinə birbaşa məktəbin infrastrukturu təsir göstərir. Bu gün qəzalı vəziyyətdə olan məktəblərin yetirmələrinin nəticəsi elə də yüksək deyil. Bu istiqamətdə dövlət proqramını daha da genişləndirmək lazımdır.
Günel CƏLİLOVA
