Azərbaycanda hələ də dərslik məsələsində ciddi nöqsanlar, çatışmazlıqlar müşahidə edilir. Baxmayaraq ki, bu məsələ hər zaman müzakirə edilib və əlaqədar qurumlar tərəfindən onun aradan qaldırılması üçün tədbir görüləcəyi vəd olunub, amma hələ də bu sahədə ayrı-ayrı dərsliklərin timsalında problem özünü göstərməkdədir.
Orta məktəb dərslikləri hazırlanarkən süzgəcdən keçirilməli, nəşrə qədər bütün problemlər, uyğunsuzluqlar aradan qaldırılmalıdır ki, dərslik nəşr edilərək şagirdlərin ixtiyarına verilsin. Dərsliklər sahəsində ciddi problemlərin davam etməsi təəssüf doğurur.
Bu günlərdə sosial şəbəkədə 1-ci sinif dərsliyindəki çalışma müzakirəyə səbəb olub. Uşaqların məntiqi təfəkkürünü inkişaf etdirmək üçün nəzərdə tutulan çalışmada Qarabağ sözü qeyri-adi şəkildə təsvir olunur. Belə ki, xüsusi ismin birinci hissəsi qara rənglə, bağ sözü isə ayaqqabı bağı ilə təsvir edilib.
Qarabağ adının bu cür izahla şagirdlərə öyrədilməsi ictimaiyyət arasında narazılığa səbəb olub.
“Kitabda əxlaqsız ifadə, şəkil olması yolverilməzdir və bu, xalqa qarşı cinayətdir”
Təhsil eksperti Kamran Əsədov bildirdi ki, 2008-ci ildən etibarən Azərbaycan orta ümumtəhsil məktəblərində tədris prosesi kurikulum standartları ilə qurulmağa başlayıb: “Kurikulum, təəssüflər olsun ki, Azərbaycan dərsliklərində və təhsilində reallaşa bilməyib. Biz elə düşünürük ki, ən yaxşı dərslik ağır dərslikdir. Dərsliklərimizin informasiya yükü şagirdlərimizin yaşına və psixologiyasına uyğun deyil. Bü gün Azərbaycanda dərsliklər təhsilə yox, repetitorluğa xidmət edir. Bizim dərsliklərimizi müəlliflər ona görə ağırlaşdırır ki, şagirdlərə çətin olsun, valideynlər də kömək edə bilməsin. Nəticədə valideynlər müəllimlərə müraciət etsinlər”.
Təhsil ekspertinin sözlərinə görə, dərsliklərə nəzarət edən qurum yoxdur. Təhsil Nazirliyi sadəcə sifariş verir və dövlətin standartlarına cavab verən dərsliklər yazılmasını tələb edir: “Həmin o standart reallaşmasa belə, nazirliyin elan etdiyi tenderə bir neçə müəllif daxil olur. Dövlətin müəyyən etdiyi qiymətləndirmə balını (100) keçən müəllif qalib hesab olunur. Yəni pislərin içərisindən biraz yaxşısını götürüb məktəblərə veririk. Dövlətin dərslik üzrə müəyyən idarəsi, qurumu olmalıdır. Mən özüm də dərslik müəllifiyəm. İki ay müddətinə dərslik yaza bilmərik. Bizə iki ay vaxt verilir. Dünya təhsil sistemində ortaya normal dərslik çıxarmaq üçün 3-4 il vaxt verirlər”.
Ekspert onu da əlavə etdi ki, kitabda əxlaqsız ifadə, şəkil olması yolverilməzdir və bu, xalqa qarşı cinayətdir. Təhsil haqqında qanunda nəzərdə tutulur ki, orta məktəb şəxsiyyət yetişdirir, dərsliklər milli dövlətçilik və dəyərlərə sadiq olan vətəndaşların yetişdirilməsinə xidmət edir, amma reallıq bunun əksini göstərir.
Günel CƏLİLOVA
