Bu günlərdə redaksiyamıza 3-cü qrup əlil, İkinci Qarabağ müharibəsi iştirakçısı, qazi, Goranboy rayonu Qızılhacılı qəsəbə 1 saylı tam orta məktəbinin texniki işçisi Xəlfəyev Amil Vidadi oğlunun Prezident İlham Əliyevə, surəti isə Birinci vitse-prezident Mehriban Əliyevaya, təhsil naziri Emin Əmrullayevə, Baş prokuror Kamran Əliyevə, Hesablama Palatasının sədri Vüqar Gülməmmədova, Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevaya ünvanladığı müraciətin bir nüsxəsi daxil olub.
Qazinin müraciətində bildirilir: “44 günlük müharibədə iştirak etmişəm, sağlamlığımı itirmişəm, 3-cü qrup əliləm, gənc ailəm və himayəmdə iki azyaşlı uşaqlarım var. İşlə təmin olunmağım üçün Goranboy Rayon İcra Hakimiyyətinə müraciət etdim, məni Goranboy rayonu Qızılhacılı qəsəbə 1 saylı tam orta məktəbinə texniki şöbəyə işçi qəbul etdilər”.
Qazi məktubunda qeyd edib ki, Goranboy rayonu Qızılhacılı qəsəbə 1 saylı tam orta məktəbinin direktoru Nailə Allahverdiyeva ona problem yaradır, sıxışdırır: “Məktəbin direktoru Nailə Allahverdiyeva məktəbin təsərrüfat müdürü Rövşən Zeynalovla əlbir olaraq məni sıxışdırırlar, hüquqlarımı pozurlar, Qazi olaraq mənə hörmətsizlik edirlər...”
Qazinin məktubunda məktəb direktoruna yönəlik əlavə ittihamlar da yer alıb.
Məktubu araşdırmaq məqsədilə əvvəlcə A.Xəlfəyevin özü ilə əlaqə saxladıq. O bildirdi ki, məktubda qeyd edilənləri təsdiqləyir və probleminin həlli üçün mətbuat vasitəsilə ölkə başçısından kömək istəyir.
Nailə Allahverdiyeva: “Amil Xəlfəyev bizim məktəbdə işləyir, onunla bağlı heç bir problem yoxdur”
“Bakı-Xəbər” olaraq qazi Amil Xəlfəyevin müraciətinə həssaslıq göstərdik və qazinin barəsində şikayət etdiyi Goranboy rayonu Qızılhacılı qəsəbə 1 saylı tam orta məktəbin direktoru Nailə Allahverdiyeva ilə əlaqə saxladıq. N.Allahverdiyeva “Bakı-Xəbər”ə bildirdi ki, artıq problem öz həllini tapıb və qazinin heç bir problemi yoxdur. “Qazinin problemi öz həllini tapıb. Dünən bu problemə nöqtə qoyulub. Amil Xəlfəyev bizim məktəbdə işləyir, onunla bağlı heç bir problem yoxdur. O məktubu yazmaq Amilin öz ideyası olmayıb, kimlərsə ona bu müraciəti yazdırıb. Amillə bağlı hər hansı bir problem yoxdur”.
Direktorla danışdıqdan sonra A.Xəlfəyev özü bizimlə əlaqə saxlayıb bildirdi ki, problem artıq qaydasına salınıb: “Mənim şikayətimi araşdırmaq üçün dünən məktəbə yoxlama gəlmişdi, məsələni araşdırıb, problemi həll edib getdilər. Üzləşdiyim problem öz həllini tapıb. Mənim artıq bu məsələdə heç bir problemim yoxdur. Siz də sağ olun ki, problemə həssas yanaşdınız. İndi heç bir problem qalmayıb, şikayətim yoxdur” .
Qeyd edək ki, qazinin məktubunda əks olunan fikirlərin çox böyük hissəsini işıqlandırmadıq, çünki onu araşdırıb qiymət vermək bizim yox, əlaqədar qurumların işidir.
İradə SARIYEVA
