Paytaxtın Yasamal rayonu, Badamdar qəsəbəsi, Mikayıl Müşfiq küçəsi, M1, ev 2 ünvanında yaşayan sakinlər günlərini qorxu içərisində keçirir. Çünki yaxınlıqda tikinti işləri gedir və sakinlərin yaşadığı evin üzərində qaldırıcı kran quraşdırılıb. Sakinlər kranın aşma təhlükəsi olması ilə bağlı narahatlıq keçirir.
Xatırladaq ki, Bakının Nərimanov rayonunda Azadlıq prospekti ilə Nəsib bəy Yusifbəyli küçəsinin kəsişməsində inşa olunan yeni tikilidə kran aşdı. Tikinti şirkətlərindən birinə məxsus qülləli kran yaxınlıqdakı 9 mərtəbəli binanın və qarşısında dayanan avtomobillərin üzərinə aşmışdı.
“Yaşayış binalarının inşasında təhlükəsizliyə tikintiyə nəzarət edən aidiyyəti qurumlar tərəfindən nəzarət gücləndirilməlidir”
Iqtisadçı Kamran Məmmədli bildirdi ki, yaşayış binalarının inşasında təhlükəsizliyə tikintiyə nəzarət edən aidiyyəti qurumlar tərəfindən nəzarət gücləndirilməlidir: "Bəzi tikinti şirkətləri var ki, bütün texnikaları var. Onlar bina inşa edərkən öz texnikalarından istifadə edirlər. Əksər tikinti şirkətləri isə iş adamlarından ibarətdir. Onlar tikinti işlərini aparan şirkətlərlə müqavilə bağlayırlar. Bu zaman məsuliyyət düşür həmin podratçı tikinti şirkətlərinin üzərinə. Bu baxımdan tikinti şirkətləri bəzən məsuliyyətsiz ola bilir. Amma tikintiyə nəzarət edən qurumlar buna nəzarət etməlidir. Tikintidə təhlükəsizliyə nəzarət gücləndirilməlidir".
Ekspert onu da əlavə etdi ki, Azərbaycanda 20 ildir tikinti digər sahələrdən daha sürətli inkişaf edir. Bu baxımdan bu sahədə təhlükəsizliyə nəzarət gücləndirilməlidir: “Tikintidə istifadə edilən avadanlıqlardan düzgün şəkildə istifadə edilməzsə və onlardan istifadədə təhlükəsizlik tədbirlərinə, əməyin mühafizəsi qaydalarına əməl edilməzsə, bu, insan sağlamlığına zərər yetirə bilər. Təhlükə risqli avadanlıqlardan, istifadə olunan mexanizmlərdən biri də kranlardır. Kran tikinti sahəsinə qoyulmazdan öncə yerinə baxış keçirilməlidir. Tikinti və kran üçün əlverişli yer seçilməlidir. Bəzən insanlar tikintinin aparıldığı yerlərdə krandan ehtiyat edirlər, buna görə narahatlıq keçirirlər. Bu isə, sözsüz ki, əbəs yerə deyil. İstifadə müddəti bitən kranların istismara verilməsi yolverilməzdir, onlar istismardan çıxarılmalıdır. İstər təkər üzərində, istərsə də tikintidə olan kranlar olsun, onların ətrafında kranın dönmə radiusuna uyğun barrikadalar qurulmalıdır. Buna qoruyucu sədd deyirlər, kranların ətrafına qoruyucu sədd çəkilməlidir. Bəzən görürsən ki, bir həyətdə kran işləyir, təbii, kranın dönmə radiusunda onun gövdəsi xeyli irəli çıxır. Bu da ətrafdakı insanlar üçün çox böyük təhlükə yaradır, kran operatoru yükü sağa-sola döndərəndə keçən insanlara dəyə bilər, xəsarət yetirər, hətta insanın həyatını itirməsinə səbəb ola bilər. Kranı istədikləri yerdə saxlayır, yükü boşaldırlar. Bütün bunlar təhlükəsizlik qaydalarının pozulmasıdır. Ola bilsin, bir dəfə, iki dəfə olmasın, amma sonra birdən böyük təhlükə ola bilər. Son hadisədə o kran oradan keçən çoxlu insanın, çoxlu ictimai nəqliyyatın üstünə aşsaydı, onlarla insan xəsarət ala, hətta həyatını itirə bilərdi. Təhlükəsizlik qaydalarına əməl edilməməsi görün sonda hansı faciəli nəticələrə gətirib çıxarır”
Günel CƏLİLOVA
