Sosial şəbəkələrdə, internet platformalarında müxtəlif ölkələrdən gətirilən dərmanların satışı təklif olunur və qeyd edilir ki, bu dərmanların qiyməti apteklərdə satılan bənzər dərmanlarla müqayisədə daha ucuzdur.
Yerli apteklərdə dərmanların qiymətinin həddən artıq baha olması Azərbaycanda onlayn dərman satışının geniş vüsət almasına səbəb olub. İstifadəçilərin bildirdiyinə görə, sosial şəbəkələr vasitəsilə satılan bu dərmanlar təhlükə yaradır. İnsanlar müxtəlif ölkələrdən gətirilən bu dərmanlara apteklərdə satılan bənzər dərmanlarla müqayisədə daha ucuz olması səbəbindən maraq göstərirlər.
Əksər istifadəçilərin iddiasına görə, onlayn qaydada gətirilən bu dərmanların mənşəyi bilinmir, insanlar onları içdikdən sonra müəyyən fəsadlarla qarşılaşdıqlarını söyləyirlər.
Onlayn dərman bazarının bu qədər genişlənməsinin səbəbi nədir? Xaricdən onlayn yolla gətirilən dərmanlara hər hansısa formada nəzarət edilirmi?
“...Xəbərdarlıq etmək lazımdı ki, təbliğata aldanıb onlayn qaydada dərman almasınlar”
Professor Adil Qeybulla “Bakı-Xəbər”ə bildirdi ki, xaricdən ölkəmizə gətirilən dərmanların həm mənşəyi ciddi araşdırılmalıdır, həm də onlara ciddi nəzarət edilməlidir. “Azərbaycanda dərman maddələrinin ictimaiyyətə açıq olan dövlət qeydiyyatı məsələsi yetərli deyil. Ayrı-ayrı dərman maddələrinin istehsal olunduğu ölkə, firma, onun dünyada nə qədər tanınması, həmin dərmanların keyfiyyət parametrləri barədə müxtəlif söhbətlər var. Bunların da bəziləri əsassız deyil. Məlumdur ki, bəzi dərmanlardan istifadə edirik, amma onların müsbət təsirini görmürük. Bütün bunlar da xeyli narahatlıq doğurur. Onlayn dərman satışına gəlincə, hesab edirəm ki, insanlar buna getməməlidir. Çünki onlayn satılan dərmanların böyük əksəriyyəti insanları təlqinə hesablanan, ciddi şəkildə onları inandırmağa yönəlmiş xüsusi təbliğat üsulları ilə satışdır. Guya bir neçə dozaya diabet sağılır, yaxud başqa xəstəlik sağalır. Yəni insanların zəif yerlərini bilib onlayn dərman satışının təbliğatını qururlar. Biz sosial şəbəkələrdə belə təbliğatların şahidi çox oluruq. İnsanlara xəbərdarlıq etmək lazımdı ki, təbliğata aldanıb onlayn qaydada dərman almasınlar. Təbii, bunu dövlətin müvafiq qurumları etməlidir ki, siz mənşəyi bilinməyən, Azərbaycan ərazisində istifadəsinə icazə verilməyən, Dövlət Reyestrinə daxil edilməyən dərmanların istifadəsi məqsədəuyğun deyil, qadağandır”.
İnsanların o dərmanları müxtəlif yolla aldığını deyən A.Qeybullanın sözlərinə görə, əgər o dərmanlar onlayn alınırsa və Azərbaycanda qeydiyyatdan keçmirsə, o dərman ölkəyə idxal oluna bilməz: “Hesab edirəm ki, biz bu cür onlayn dərman satışının qarşısını ala bilərik. Çünki dərmanlar da, ölkəyə gətirilən başq vasitələr də gömrük nəzarətindən, yoxlamalardan keçir . O dərman preparatının tərkibində olan əsas maddə Azərbaycanın dövlət reyestrinə daxil edilməyibsə, o dərman, onlayn da olsa, Azərbaycana daxil olmamalıdır. Bu yolla biz problemin qarşısını ala bilərik. Çünki dərman təhlükəsizliyi konsepsiyası milli təhlükəsizlik konsepsiyasının tərkib hissəsidir”.
İradə SARIYEVA
