Dünya xalqları arasında özünəməxsus yeri olan Azərbaycan bəşəri ideyaları, adət-ənənələri, maddi və mənəvi xəzinəsi ilə zəngin irsə sahibdir. Azərbaycanın qədim, rəngarəng mənəvi dəyərləri, mədəni irsi dünyaya töhfəsini verir. Bu sahəyə dövlət qayğısının artması dəyərlərimizi dünyada tanıtmaq sahəsində əhəmiyyətli rol oynayır.
Azərbaycan dövlət müstəqilliyi əldə etdikdən sonra xalqımızın dini-mədəni irsinin qorunub saxlanması və inkişaf etdirilməsi, din və vicdan azadlığının təmin olunması, dövlət-din münasibətlərini tənzimləyən qanunvericiliyin müasir dövrün tələblərinə uyğun təkmilləşdirilməsi, dini abidələrin, məscidlərin, ibadət evlərinin təmir və bərpa olunması dövlət siyasətinin əsas istiqamətlərindən birini təşkil edib. Bu gün ölkəmizdə bütün dini abidələr dövlət tərəfindən qorunur, bərpa edilir, eləcə də bir çoxları yenidən tikilir. Lakin bəzi ərazilərdə təmir olunan məscidlər tam şəkildə başa çatdırılmır. Bu da ibadət etmək istəyən şəxsləri çətin vəziyyətə salır.
Yevlaxın Salahlı kəndində də sakinlərin ibadət etməsi, dini ayinləri yerinə yetirməsi üçün məscid binası inşa edilib. Bina 20-25 il öncə inşa edilsə də, tikintisi sona çatmadığından hələ də istifadə edilmir. Baxımsızlıqdan tikili uçub dağılır. Kənd sakinləri qeyd edir ki, məscid 20 ildən artıqdır istifadəsiz qalıb: “Kənddə məscidin olması çox yaxşı haldır. Bu bina 20 ildən çoxdu tikilib, elə istifadəsiz də qalıb. İndi də baxımsızlıqdan pəncərlərinin şüşəsi sındırılıb. Yəqin ki, burdan ötüb keçən uşaqlar sındırır. Dəqiq bilinmir niyə yarımçıq qaldı tikinti. Amma bu qədər iş görülüb, çox istərdik ki, istifadəyə verilsin. Salahlının girişində tikilib, yaxşı yerdədir. Əksər kənd sakinlərinin arzusudur tezliklə burada ibadət etmək. Yevlaxın ən iri yaşayış məntəqələrindən olan Salahlıda tikintisi yarımçıq qalan məsciddən istifadə etmək mümkün olmadığından bəzi sakinlər ibadət etməyə Mingəçevirə gedir”.
“Məscidin fəaliyyəti üçün Qafqaz Müsəlmanları İdarəsinə və Dini Qurumlarla İş üzrə Dövlət Komitəsinə müraciət olunmalıdır”
Məsələ ilə bağlı Yevlax rayon İcra Hakimiyyətindən bildirildi ki, həmin kənddə icma yaradılmalı, daha sonra məscidin fəaliyyəti üçün Qafqaz Müsəlmanları İdarəsinə və Dini Qurumlarla İş üzrə Dövlət Komitəsinə müraciət olunmalıdır.
Günel CƏLİLOVA
