Binalarda yanğın zamanı ehtiyat çıxışların, tüstü bacalarının, bloklarda nəzərdə tutulan su xətlərinin nə dərəcədə işlək olub-olmaması ciddi müzakirə edilməkdədir. Araşdırmalar zamanı müəyyən olunub ki, paytaxtda yeni inşa edilən əksər binalarda ehtiyat çıxışı yoxdur.
Belə ki, 9 mərtəbədən hündür olan tikililərdə təxliyə zamanı insanların təhlükəsiz xilas olunması üçün tüstülənməyən pilləkənlər quraşdırılmalıdır. Ancaq nədənsə, tikinti zamanı belə normativlər qorunmur.
Halbuki, ehtiyat çıxışlar həmin binalarda yaşayan sakinlərin təhlükəsizliyinin təminatlarından biridir.
“Tikinti bumundan sonra Azərbaycanda yeni tikililərdə təhlükəsizlik qaydaları problemi çox ciddi səviyyədə oldu”
Məsələ ilə bağlı fikir bildirən təhlükəsizlik üzrə ekspert Elmin Zeynalov qeyd etdi ki, tikinti bumundan sonra Azərbaycanda yeni tikililərdə təhlükəsizlik qaydaları problemi çox ciddi səviyyədə qalxdı: “Burada da ən ciddi qaydalardan biri bilavasitə yanğın təhlükəsizliyi ilə bağlı məsələdir. Hazırda cənab Prezidentin 19 fevral 2019-cu il tarixli fərmanı nəticəsində bəzi çoxmənzilli binaların istismara qəbulunun sadələşdirilməsi ilə bağlı fərman icra olunur. Bu fərmanın icrası çərçivəsində ən ciddi yanaşılan məsələlərdən biri məhz yanğın təhlükəsizliyi ilə bağlıdır. Bu normativ və qaydaların pozulması hallarının aşkarlanması və onların aradan qaldırılması əsas məsələdir. Çoxmənzilli binalarda belə hallar aşkar olunursa, aidiyyəti qurumlar həmin binalara xəbərdarlıq edir. Ümumiyyətlə, bütün çoxmənzilli yaşayış binalarında və tikintisinə icazə tələb olunan bütün tikililərdə yanğın təhlükəsizliyi qaydalarına mütləq şəkildə əməl olunmalıdır. Binanın bütün mərtəbələri və qeyri-yaşayış sahəsi mərkəzləşdirilmiş yanğın təhlükəsizliyinə qarşı şitlə təmin olunmalıdır. Nasoslar qoyulmalıdır, yanğın hallarında həmin qurğular avtomatik işə düşməlidir. Bir sıra binalarda müəyyən cihazlar quraşdırsalar da, tam olaraq işə salmayıblar. Yəqin ki, yaxın gələcəkdə bu problemlər də aradan qalxacaq.
Yanğın zamanı binadan tüstünün sorulması üçün də xüsusi qurğu quraşdırılmalıdır. Bütün binalarda tüstü bacaları var. Bunlar binanın şaxtasına birləşdirilməmiş şəkildə qurulmalıdır. Ancaq təəssüflər olsun ki, bir sıra yeni tikililərdə tüstü bacaları bilavasitə şaxtalara birləşdirilir. Ona görə də, tüstü o bacadan xüsusi qurğu ilə boş əraziyə vurulduqda şaxta vasitəsilə mənzillərin mətbəxtlərindən çıxan havaqovucu borularla mənzillərə dolur. Belə problemlər var və ona da diqqət olunmalıdır. Əksər çoxmərtəbəli binalarda yanğın çıxışları və pilləkənləri yoxdur. Binaların böyük əksəriyyətində bilavasitə yanğın təhlükəsizliyi ilə bağlı olan pilləkən qəfəslər, demək olar ki, qurulmayıb. Hesab etmirəm ki, hazırki mərhələdə bu problem həll etmək mümkün olacaq. Çünki bu kifayət qədər böyük problemdir. Bunun üçün binanın bütün elementlərinə yenidən baxılmalıdır. Bu mənada, həmin problemin tam olaraq aradan qalxacağını düşünmək düzgün deyil. Ancaq bir sıra yeni tikililərdə problemi qismən həll etmək üçün tikinti şirkətləri pilləkən qəfəslərini binanın ümumi yaşayış üçün istifadə olunan ərazisindən və lift meydançalarından kənarda inşa ediblər. Binada liftlər başqa istiqamətdədir, pilləkən qəfəslər isə ayrıdır. Demək olar ki, bütün bloklara pilləkənlə ayrıca çıxışlar var. Bunu problemin həlli üçün, ideal olmasa da, optimal variant hesab etmək olar”.
Günel CƏLİLOVA
