Gəncə Şəhər Heydər Əliyev Mərkəzində baş tutan tədbirdə əvvəlcə rəsmilərin və idmançıların iştirakı ilə Ulu Öndər Heydər Əliyevin abidəsinin önünə gül dəstələri düzülmüşdür.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra torpaqlarımızın bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükütla yad edilib.
Mərasimdə Gəncə Şəhər İcra Hakimiyyəti başçısının müavini Adil Tağıyev çıxış edərək, Gəncə Şəhər İcra Hakimiyyətinin başçısı Niyazi Bayramovun adından bütün idmançıları təbrik edərək, onlara uğurlar arzulayıb.Türkiyənin Gəncədəki Baş konsulu Zeki Öztürk çıxış edərək, bütün idman ictimaiyyətini təbrik edib və onlara fəaliyyətlərində uğurlar arzulayıb.
Gəncə Şəhər Gənclər və İdman Baş İdarəsinin rəisi Həmid Nəsirov ilk öncə Azərbaycan Respublikası Gənclər və İdman naziri Fərid Qayıbovun və Gəncə Şəhər İcra Hakimiyyətinin başçısı Niyazi Bayramovun adından indamçıları təbrik etmiş və 2021-ci il ərzində Baş İdarənin idman sahəsində gördüyü işlər haqqında hesabat xarakterli çıxış edərək, il ərzində Baş İdarə tərəfindən keçirilən tədbirlər haqqında geniş məlumat vermiş və idmançıları bu əlamətdar gün münasibətilə təbrik edərək onlara müvəffəqqiyyətlər arzulamışdır. Sonra Baş İdarə tərəfindən hazırlanmış şəhərin idman ictimaiyyətinin nümayəndələrinin və mütəxəssislərinin təbrik videoçarxı tədbir iştirakçılarına təqdim olunmuşdur.
Tədbirin gedişatında idman ictimaiyyəti adından əməkdar məşqçi, Prezident təqaüdçüsü, Şöhrət ordenli Elçin Zeynalov və Əməkdar məşqçi-müəllim Albert Qəribov çıxış edərək idmançılara göstərilən diqqət və qayğıya görə ölkə rəhbərinə öz minnətdarlıqlarını bildiriblər və əvvəlki illərdə olduğu kimi idmançıların növbəti illərdə də yeni-yeni qələbələr qazanacaqlarını qeyd etmişlər.
Tədbirdə Bədən Tərbiyəsi və İdmanın inkişaf etdirilməsində göstərdiyi fəaliyyətinə görə, “5 mart Bədən Tərbiyəsi və İdman günü” münasibətilə idmançılar və məşqçilər təşəkkürnamələr və qiymətli hədiyyələrlə təltif olunublar.
Sonda tədbir iştirakçıları xatirə şəkli çəkdiriblər.
