Mətbuatda yayılan məlumatlara görə, Bakının Suraxanı rayonu, yeni Günəşli qəsəbəsi, AB massivində yerləşən “Sahil-S İnşaat" MTK-ya məxsus çoxmərtəbəli binada bir mənzil bir neçə şəxsə satılıb. Belə ki, “Sahil-S İnşaat” MTK tikinti şirkəti bir mənzili 6 nəfərə satıb, 160 ailəni evsiz qoyub. Zərərçəkmişlərin sözlərinə görə, bu azmış kimi, 2018-ci ildən inşa olunan binanın 2020-ci ildə təhvil veriləcəyi deyilsə də, hələ də yarımçıq olaraq qalıb. Deyilənlərə görə, nağd ödəniş edərək ev alan sakinlər indi nə mənzillərinə köçə bilirlər, nə də pulları qaytarılır.
Onu da vurğulayaq ki, şikayətçilər başlarına gələn bu məsələyə görə binanın qarşısına yığışaraq öz haqlarını tələb ediblər. Lakin etirazlarını eşidən yoxdur, zənglərinə də cavab verilmir.
Yalnız “Sahil-S İnşaat”ın deyil, əksər tikinti şirkətlərinin bir evi bir necə adama satması ənənəsi geniş yayılıb. Bizim bir sıra MTK-lar var ki, bu əyri yolu tutub gedirlər, nəticədə insanlar həm maddi, həm də mənəvi ziyan çəkir. Demək olar ki, tez-tez belə tikinti şirkətləri barədə məlumatlar yayılır və onlardan biri də “Sahil-S İnşaat” MTK-dır.
“Aldadılan vətəndaşların məhkəməyə müraciət etməkdən başqa yolu yoxdur...”
Daşınmaz əmlak üzrə mütəxəssis Nüsrət İbrahimov bizimlə söhbətində bildirdi ki, MTK-ların bu yola əl atmasının bir neçə səbəbi var, bundan isə insanlar əziyyət çəkir. “MTK-lar vətəndaşları müxtəlif səbəblərdən aldadırlar. Bunların çoxu bunu bilə-bilə edirlər. Niyə belə edirlər? MTK-ların ortada maliyyə problemləri olur, ya tikintini davam etdirə bilmirlər, ya külli miqdarda vergi borcları olur. Bu halda fikirləşirlər ki, mənzilləri təkrar satışa çıxarıb sataq, borcları bağlayaq, növbəti layihəni həyata keçirəndə ikinci, üçüncü dəfə satılanları mənzillə təmin edək. Yəni bəziləri pula görə edir. Bəzən isə bu problem işçilərin səhlənkarlığından, haqq-hesabı düzgün apara bilməməsindən qaynaqlanır. Səhvən də belə şeylər ola bilir, amma MTK-lar daha çox bu qanunsuzluğa, insanları aldatmaq yoluna maliyyə problemlərinə görə əl atırlar. Maliyə problemi ilə qarşılaşanda həmin tikinti şirkətləri, yaxud investor belə bir qara varianta əl atır. “Sahil-S İnşaat”a gəlincə, bu tikinti şirkətinin adını yeni eşitmişəm. İnsanlar çalışmalıdır ki, bu kimi tikinti şirkətlərinin toruna düşməsinlər. Ona görə də, vətəndaşlar çıxarışı olmayan binalardan mənzil almaqdan çəkinməlidirlər. Çıxarışı olmayan binalardan mənzil məsələsində hər zaman risq var. Yalnız o binalardan mənzil almaq məsləhətdir ki, onların Dövlət Reyestr Xidmətindən çıxarışları var. Bu risqlərdən yayınmaq lazımdır. Aldadılan vətəndaşların məhkəməyə müraciət etməkdən başqa yolu yoxdur, odur ki, vətəndaşlar məhkəmə qaydasında bu məsələnin həllinə nail olmalıdır”.
Vətəndaşları aldadan tikinti şirkətlərinin rəhbərlərinin kimə və nəyə arxayın olub bu əməlləri törətdiyinə gəlincə, N.İbrahimli qeyd etdi ki, onlar tikinti aləmində təsadüfi adamlardır və dərin düşünmədən bu hərəkətə yol verirlər. Ekspertin sözlərinə görə, tikintidə çalışanların bir hissəsi ali təhsili olmayan, təsadüfən bu sahəyə düşən adamlardır: “Belələri tikinti sektorunda var. Bu tikinti şirkətlərində sabahı düşünmədən belə variantlara əl atırlar”
Qeyd edək ki, yazını çapa hazırlarkən Baş Prokurorluğun Mətbuat xidmətindən “Sahil-S İnşaat” Mənzil Tikinti Kooperativinin vəzifəli şəxsləri barədə məlumat yayıldı. Verilən məlumata görə, “Sahil-S İnşaat” Mənzil Tikinti Kooperativinin vəzifəli şəxsləri barəsində başlanmış cinayət işinin istintaqı davam etdirilir. “Sahil-S İnşaat” Mənzil Tikinti Kooperativinin sədri Alaverdiyev Taley Şamil oğlunun digərləri ilə əlbir olaraq MTK-nın paytaxtın Suraxanı rayonu, Yeni Günəşli qəsəbəsi, “A-B” massivində inşa etdiyi yaşayış binasında eyni mənzili bir neçə şəxsə satmasına dair vətəndaşlardan Baş prokuror yanında Korrupsiyaya qarşı Mübarizə Baş İdarəsinə daxil olmuş müraciətlər əsasında Cinayət Məcəlləsinin 178.3.2 (külli miqdarda ziyan vurmaqla dələduzluq) 308.1 (vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri ilə cinayət işi açılıb.
Hazırda cinayət işi üzrə zərər çəkmiş şəxslərin dindirilməsi, cinayəti törətmiş bütün təqsirkar şəxslərin müəyyən edilərək cinayət məsuliyyətinə cəlb edilməsi istiqamətində intensiv istintaq hərəkətlərinin həyata keçirilməsi davam etdirilir.
Azərbaycan Respublikasının Baş Prokurorluğu “Sahil-S İnşaat” MTK-nın vəzifəli şəxslərinin qanunsuz əməlləri nəticəsində zərər çəkmiş şəxslərə müraciət edərək, 961 nömrəli Çağrı Mərkəzi, 161 nömrəli “Qaynar xətt” əlaqə mərkəzi, o cümlədən Baş Prokurorluğun sosial şəbəkələrdəki səhifələri vasitəsilə dərhal məlumat verilməsini xahiş edir.
İradə SARIYEVA
