“Sahibkarlara müraciət edirəm, qazanc dalınca getmək o demək deyil ki, biz unikal şəhərimizi eybəcər binalarla korlayaq”. Bunu Prezident İlham Əliyev martın 3-də Şahin Seyidzadəni “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri vəzifəsinə təyin olunması ilə əlaqədar videoformatda qəbul edərkən deyib.
Dövlət başçısı bildirib: "Dövlət tərəfindən bütün bu məsələlər tənzimlənir və icazəsiz, qanunsuz tikililərin sayı xeyli azalıbdır. Amma hələ də belə hallar var və mən bütün qurumları, dövlət qurumlarını və sahibkarları xəbərdar etmək istəyirəm ki, buna yol verilməyəcək. Xüsusilə sahibkarlara müraciət edirəm, qazanc dalınca getmək o demək deyil ki, biz unikal şəhərimizi eybəcər binalarla korlayaq. Biz buna imkan verməyəcəyik, qanunsuz tikililərə son qoyulmalıdır. Bu məsələyə nəzarət edən bütün orqanlar bu işlərə çox ciddi yanaşmalıdır - Bakı Şəhəri İcra Hakimiyyəti, Bakı şəhərində yerləşən rayonların icra başçıları. Əminəm ki, bundan sonra Bakı vahid memarlıq konsepsiya əsasında inkişaf edəcək.
Ancaq yenə də deyirəm, son vaxtlar görülmüş tədbirlər nəticəsində Bakının memarlıq ansamblı xeyli sağlamlaşdı. Bu gün bir daha demək istəyirəm, Bakı unikal şəhərdir, dünyanın ən gözəl şəhərlərindən biridir. Bunu hər kəs deyir, mənim aləmimdə Bakı dünyanın ən gözəl şəhəridir. Hamımız Bakını sevirik, Bakını qorumalıyıq və yenə də deyirəm, şəhər inkişaf etməlidir, ancaq planlı şəkildə. Bundan sonra da müasir memarlıq Bakının qədimliyini, o qədim tarixi simasını pozmamalıdır. Bu iki önəmli amil bir-birinə ziddiyyət təşkil etməməlidir, əksinə, qədimlik və müasirlik - Bakının xüsusi aurası qorunmalıdır və əminəm ki, biz buna nail olacağıq".
Prezident İlham Əliyev “qanunsuz tikililərə son qoyulmalıdır” deməklə icra başçılarına xəbərdarlıq etdi, onları bu məsələyə son qoymağa çağırdı.
Ekspertlər qeyd edir ki, Bakının görkəminin pozulması, qanunsuz tikililərə icazə verilməsi məsələsi ilə icra başçıları məşğul olub, amma indiyə qədər bu qanunsuzluqlara görə, bir icra başçısı cəzalandırılmayıb. Təcrübə göstərir ki, Bakının görkəminin pozulmasında əsas müqəssirlər icra başçılarıdır. Tikinti şirkətləri heç vaxt icra başçılarından xəbərsiz heç nə edə bilməzlər. Prezidentin də fikrindən belə aydın oldu ki, Bakının görkəminin pozulmasında əsas təqsirkar icra başçılarıdır. İcra başçılarının sahibkarlarla gizli sövdələşməsi, rüşvətxorluq olmasa, rüşvət almasalar Bakının görkəmini də pozmazlar. Bakının görkəminin pozulmasında, qanunsuz tikililərə icazə verilməsində, sahibkarlarla gizli sövdələşmələrə gedilməsində bir nəfər də olsun icra başçısı cəzalandırılmayıb. Ekspertlərin fikrincə, bu qanunsuz hərəkətlərə rəvac verən icra başçıları cəzalandırılmalıdır.
“Bu qanunsuz tikililərə əsas sərəncam verən, şərait yaradan icra hakimiyyətləri başçılarıdır”
Sosial-iqtisadi sahə üzrə ekspert İlqar Hüseynli “Bakı-Xəbər”ə şərhində bildirdi ki, Bakının görkəminə xələl gətirən binaların tikintisinə, tikinti qaydalarının pozulmasına yol verən icra başçıları, məmurlar cəzasız qalmamalıdır: “Bakı şəhərinin görkəminin itməsi, Bakı şəhərinin baş planının tamamilə görkəmsiz vəziyyətə gətirilməsi prosesi, bu ziyanlı tendensiya birinci növbədə Hacıbala Abutalıbovdan başladı. Demək olar ki, Bakıda əksər tikintilər o tikinti şirkətlərinə rəhbərlik edənlərlə Hacıbala Abutalıbovun sövdələşməsi nəticəsində inşa olunub. Həmin dövrdən başlayaraq tikintilər necə gəldi, harda gəldi, şəhərin arxitekturası nəzərə alınmadan, müəyyən sosial infrastruktur imkanları saxlanılmadan tikilməyə başladı. Binalar bir-birinin içində tikilir. Biri sağa, biri sola, biri nə bilim hara baxan kifayət qədər çoxsaylı çoxmərtəbəli binalar tikildi və bu da Bakı şəhərinin görkəminin eybəcərləşməsində rol oynayan başlanğıc faktorlardan biri idi. Ondan sonra bu eybəcərləşməni digər yerli icra hakimiyyəti qurumları davam etdirdilər. Təkcə Bakı şəhərindəki rayonların icra başçıları qanunsuz tikililərə yol verməyib, eyni zamanda tikinti və arxitektura, şəhərsalma sahəsində çalışan qurumlar da buna yol veriblər. Onlar icra hakimiyyətlərinin göstərişi ilə qanunsuz tikintilərlə bağlı sərəncamlara qol çəkib möhür vurublar. Bu probemin yaranmasında icra başçıları ilə yanaşı qanunsuz tikililərə rəvac verən digər dövlət qurumlarının da payı var. Bunlar bu problemin yaranmasında başlıca məsuliyyət daşıyan insanlardır. Bu qanunsuz tikililərə əsas sərəncam verən, şərait yaradan icra hakimiyyətləri başçılarıdır”.
İ.Hüseynli hesab edir ki, qanunsuz tiklilərlə mübarizədə müəyyən qədər gecikmişik, çünki bu problem, qanunsuz tikinti bumu 30 ilə yaxındır mövcuddur. O qeyd edir ki, qanunsuz tikililərin qarşısı çoxdan alınmalı idi. Ekspertin sözlərinə görə, indi demək olar ki, Bakıda boş yerlər qalmayıb. “O yerlər ya biznes obyektlərinin, ya çoxmərtəbəli binaların tikintisinə verilib. Bilirsiz ki, yeni projelər başlayacaq. “Xruşşovkalar” sökülüb yerlərində çoxmərtəbəli binalar tikiləcək. Heç olmasa yeni tikiləcək binaların həyətində uşaqların oynaması, yaşıllıqların salınması üçün də yerlər nəzərdə tutulsun, infrastruktur obyektlərinin tikintisinə də imkanlar yaradılsın. Heç olmasa “Xruşşovkalar”ın yerində yeni şəhərsalma zamanı bu məsələlər nəzərə alınmalıdır” - deyə İ.Hüseynli qeyd etdi.
İradə SARIYEVA
