Azərbaycanın ərazi bütövlüyü uğrunda şəhid olanların ailə üzvlərinə, o cümlədən qazilərə, müharibə iştirakçılarına dövlət tərəfindən hər zaman böyük diqqət və qayğı göstərilir. Onlar ev və işlə təmin olunurlar, sosial ehtiyacları dövlət tərəfindən ödənilir, müharibədə yaralanaraq əlillik və ya veteran statusu qazananlara birdəfəlik ödəmə ilə yanaşı, aylıq müavinətlər də verilir.
Lakin Qarabağ müharibəsində iştirak edən bəzi qazilər bu diqqət və qayğıdan kənarda qaldıqlarını deyirlər. Onlardan biri də II Qarabağ müharibəsi veteranı, Yeni Suraxanı qəsəbə sakini Şərif Rahim oğlu Əliyevdir. Belə ki, qaziyə ona məxsus 2 sot ərazidə ev tikməyə icazə verilmir. Veteranın sözlərinə görə, müharibədən qayıdandan sonra sözügedən ərazidə etibarnamə ilə torpaq sahəsi alıb. Ev tikilməsi üçün Suraxanı Rayon icra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Elmar Hüseynovla görüşüb. İcra hakimiyyətinin rəsmisi isə qaziyə evin tikilməsi üçün köməklik edəcəyinə söz verib. Qazinin dediyinə görə, ona məxsus torpaq sahəsində tikintiyə başlayıb və hörgünü 18 daş qaldırıb. Qısa müddər ərzində Suraxanı Rayon İcra Hakimiyyəti, yerli polis şöbəsi və Fövqəladə Hallar Nazirliyinin əməkdaşları yarımtikilini söküblər.
Xatırladaq ki, Şərif Rahim oğlu Əliyev II Qarabağ savaşında Qubadlı və Cəbrayıl uğrunda gedən döyüşlərdə qəhrəmancasına vuruşub. Ölkə başçısı İlham Əliyevin müvfiq sərəncamları ilə müharibə iştirakçısı Qubadlı və Cəbrayılın azad olunmasına görə medallarla təltif olunub.
“Vətəndaşımız Əmlak Komitəsinə, yaxud Dövlət Şəhərsalma və Arxitektura Komitəsinə müraciət etsin, icazə versələr, biz də “Allah xeyrinizi versin” deyərik”
Məsələ ilə bağlı Suraxanı qəsəbə inzibati ərazi dairəsindən bildirildi ki, məsələ onların səlahiyyətində deyil: “Sözügedən torpaq sahəsi qazinin adına deyil, etibarnamə ilə alqı-satqı edib. Həm də o ərazilər idarə, yəni kənd təsərrüfatı təyinatlı torpaqlardır. Qazimizə, əlbəttə ki, köməklik etmək istəyirik. Amma Əmlak Komitəsi icarə torpağı olduğu üçün tikintiyə icazə vermir. Bir sözlə, bu məsələ bizim səlahiyyətimizdə deyil. Qaziyə tikintinin aparılmaması üçün dəfələrlə xəbərdarlıq edilib. İlk gündən tikintiyə başlamaması üçün xəbərdarlıq etmişik. O isə qulaq asmadı və tikməyə başladı. Anlıyıq, müharibə iştirakçısıdır, bizlər üçün döyüşüb. Amma yaxşı olar ki, vətəndaşımız Əmlak Komitəsinə, yaxud Dövlət Şəhərsalma və Arxitektura Komitəsinə müraciət etsin. İcazə versələr, biz də “Allah xeyrinizi versin” deyərik. Şərif Əliyevi İcra hakimiyyətinə dəvət etdik və başçı ilə də görüşdü. Ərizə yazdı. Həmin ərizəni müvafiq qurumlara göndərəcəyik. Cavab gələn kimi vətəndaşı məlumatlandıracağıq”.
Günel CƏLİLOVA
