Prezident İlham Əliyev “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı”nın təsdiq edilməsi haqqında sərəncam imzalayıb.
Sərəncamla “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” təsdiq edilib.
Dövlət Proqramının hədəf göstəricisi 2022–2026-cı illərdə, hər il 400 nəfərdən çox olmamaqla, ümumilikdə 2000 nəfərədək Azərbaycan Respublikası vətəndaşının xarici ölkələrin nüfuzlu ali təhsil müəssisələrində təhsilinin təmin edilməsidir.
Dövlət Proqramı çərçivəsində xarici ali təhsil müəssisələrində təhsil yerlərinin ən azı 80 faizi ali təhsilin magistratura səviyyəsini əhatə edəcək.
Bu, Prezident İlham Əliyevin xaricdə təhsil almaqla bağlı imzaladığı ikinci dövlət proqramıdır. Daha öncə imzalanan sərəncam 2007-2015-ci illəri əhatə edib.
2007-2015-ci illər Azərbaycan gənclərinin xarici ölkələrdə təhsili üzrə Dövlət Proqramına ümumilikdə 95 milyon manat vəsait ayrılıb.
Həmin proqramda 5000 gəncin xaricdə təhsili nəzərdə tutulub, lakin oxumağa 3500 nəfər azərbaycanlı göndərilib.
Məzahir Məmmədli: “Həmin gənclər xarici ölkələrdə təhsili başa vurandan sonra Azərbaycana faydalı bir vətəndaş olaraq geri qayıdacaqlar”
Təhsil eksperti Məzahir Məmmədli bildirdi ki, bu proqramın Azərbaycanın istedadlı gəncləri və gələcək nəsli üçün böyük faydası olacaq. Çünki həmin tələbələr dünyanın ən yaxşı ali təhsil müəssisələrində təcrübə keçib, tədris alacaqlar: “Həmin gənclər xarici ölkələrdə təhsili başa vurandan sonra Azərbaycana faydalı bir vətəndaş olaraq geri qayıdacaqlar. Sərəncama əsasən, 2022-2026-cı illər üçün dövlət proqramı təsdiq edilib. Bu kimi tədbirlər əvvəlki illərdə də olub. Sadəcə, bir neçə ildir, sözügedən məsələyə fasilə verilmişdi. Təcrübə göstərir ki, əvvəlki illərdə Avropa ölkələrinə göndərilən tələbələrin bir çoxu təhsili başa vurduqdan sonra ölkəyə qayıtmadı. Bu məsələ əsas gətirilərək, gənclərin Azərbaycandan proqram əsasında xarici ölkələrə təhsil almağa göndərilməsi prosesi dayandırılmışdı. Görünür, sosial şəbəkə və mətbuatda gedən təkliflər, müzakirələr, qınaqlar bu məsələdə rol oynadı. Ona görə də yenidən Avropa ölkələrində təhsil almağa bir zərurət yaranıb və nəticədə 2022-2026-cı illər üçün Dövlət Proqramı təsdiq olunub”.
Nizami Hüseynov: “Bu sərəncam Azərbaycanda ali təhsilin beynəlxalq rəqabətliliyinin artırılması, eyni zamanda ixtisaslı kadrların formalaşması istiqamətində böyük addımdır”
Təhsil eksperti Nizami Hüseynov qeyd etdi ki, Prezident İlham Əliyev tərəfindən imzalanan sərəncam Azərbaycanda ali təhsilin beynəlxalq rəqabətliliyinin artırılması, eyni zamanda ixtisaslı kadrların formalaşması istiqamətində böyük addımdır: “Bu, dövlət başçısı tərəfindən imzalanmış ikinci sərəncamdır. Budəfəki proqramda tamamilə fərqli və spesifik ixtisaslara yer verilib. Hansı sahədə mütəxəssislərə ehtiyac duyulursa, onların hazırlığına, yetişdirilməsinə üstünlük verilir. Hazırda neft-qaz mühəndislərinə, hüquqşünaslara o qədər də ehtiyacımız yoxdur”.
Həmsöhbətimiz onu da əlavə etdi ki, birinci dövlət proqramı çərçivəsində təhsil alan gənclər bu gün dövlət qurumlarında, elmi müəssisələrdə çalışır: “Xaricdə təhsil alıb geri qayıdan gənclərin potensialından dövlətin inkişafı naminə istifadə olunur. Azərbaycanda savadlı, bilikli gənclərdən peşəkar kadr hazırlanması çox vacibdir. Azərbaycan dövlət başçısının həyata keçirdiyi siyasətin kökündə gənclərin savadlı, bilikli olması dayanır. Yeni dövlət proqramı çərçivəsində xeyli sayda gənc xaricdə təhsil alacaq. Birinci dövlət proqramında 3500-dən çox gənc təhsil aldı. Həmin gənclərin bir qismi ali təhsilini bitirdikdən sonra ölkəyə qayıtmadı, ancaq Azərbaycanın elit diasporasının formalaşmasında xüsusi rolları oldu. Təhsil alan gənclərin Azərbaycanda dövlət müəssisələrində işlə təmin olunmasına xüsusi diqqət ayrılmalıdır. Təhsil alanlarla imzalanan müqaviləyə mütləq əlavə edilməlidir ki, həmin şəxslər Azərbaycana gələndən sonra dövlət tərəfindən müəyyənləşdirilmiş yerlərdə çalışacaqlar”.
Günel CƏLİLOVA
