Prezident İlham Əliyevin sosial-iqtisadi siyasətinin mərkəzində vətəndaş rifahının təminatı prinsipi dayanır və sosial sahədə ildən-ilə geniş miqyas alan islahatlar, rifah halının yaxşılaşdırılması üçün atılan mühüm addımlar, əldə olunan böyük sosial uğurlar da bunu bir daha təsdiq edir.
Şəhid ailələrinin, müharibə əlillərinin problemlərinin həlli, onların mənzil-məişət şəraitinin yaxşılaşdırılması Azərbaycanda dövlət siyasətinin mühüm tərkib hissəsidir. Bu qəbildən olan vətəndaşlarımızın sosial müdafiəsinin möhkəmləndirilməsi, o cümlədən mənzil, fərdi ev və avtomobillərlə təmin edilməsi istiqamətində həyata keçirilən kompleks tədbirlər bunun bariz nümunəsidir.
Bu istiqamətdə ölkəmizdə icra olunan mühüm sosial proqramlardan biri olan şəhid ailələrinin və müharibə əlillərinin mənzillə təminatı proqramı Prezident İlham Əliyevin tapşırığına əsasən ildən-ilə genişlənir.
Müharibə iştirakçılarına diqqət göstərilməsi, onların sosial problemlərinin həll olunması qarşıya qoyulan məqsədlərdən biri olsa da, hələ də bu istiqamətdə problemlər yaşanır.
Vətən müharibəsi qazisi, eyni zamanda 2016-cı il Aprel döyüşlərinin iştirakçısı olmuş Zamir Əsgərov iki ilə yaxındır ki, torpaq sahəsi üçün müraciət etdiyini, amma ala bilmədiyini deyir. Z.Əsgərov bildirir ki, Vətən müharibəsində keçmiş döyüşçü kimi təcrübəsi, könüllü müraciəti nəzərə alınaraq səfərbərliyə cəlb olunub. Tərtər, Ağdərə, Suqovuşan, Ağdam istiqamətində həyata keçirilən bütün əks-hücum əməliyyatlarında iştirak edib. Onun sözlərinə görə, müharibə zamanı yaralanıb, lakin Bərdə Rayon Mərkəzi Xəstəxanasında bir həftə müalicə aldıqdan sonra yenidən döyüşlərə qatılıb.
Qazi torpaq sahəsini əkin-biçin və ev tikmək üçün istədiyini bildirib: “Goranboy Rayon İcra Hakimiyyətindən torpaq istəmişdim. Bir neçə müraciətimdən sonra icra nümayəndəsi mənim yanımda Xoylu Kənd Bələdiyyəsi ilə əlaqə saxlayıb torpağın verilməsi ilə bağlı tapşırıq verdi. Kənd bələdiyyəsinə yaxınlaşdım, Adil adlı nümayəndə mənə torpaq yeri göstərdi. Bələdiyyə tərəfindən 8 sot torpaq təklif edildi. Bələdiyyə nümayəndəsi məndən torpağın sənədləşməsi üçün 1000 manata yaxın pul istədi. Mən də ona bildirdim ki, 1000 manat torpağa, 2000 isə onun səliqəyə salınmasına verməkdənsə, 3 minə başqa yerdə hazır torpaq alaram. Daha sonra Goranboy Rayon İcra Hakimiyyətindən bildirdilər ki, sənə başqa yerdən torpaq sahəsi verəcəyik. Bu məsələlərin üstündən iki il keçməsinə baxmayaraq, məsələ hələ də öz həllini tapmayıb”.
Qeyd edək ki, Zamir Əsgərov Prezident sərəncamları ilə "Ağdamın azad olunmasına görə”, "Suqovuşanın azad olunmasına görə”, "Cəsur döyüşçü”, "Vətən müharibəsi iştirakçısı” medalları ilə təltif olunub.
“Bələdiyyə nümayəndəsinin qazidən 1000 AZN istəməsinin səbəbi həyətyanı torpaq sahəsi ilə bağlı rüsumdur”
Məsələ ilə bağlı Goranboy Rayon İcra Hakimiyyətindən bildirildi ki, Əsgərov Zamir Abbas oğlu onlara torpaq sahəsi ilə bağlı müraciət etməyib: “Həmin şəxs Səfərbərlik və Hərbi Xidmətə Çağırış üzrə Dövlət Xidməti tərəfindən müharibəyə çağırılıb, Vətən müharibəsində iştirak edib. Əsgərov Zamir bizə - İcra Hakimiyyətinə və Xoylu kənd icra nümayəndəliyinə torpaq sahəsinin ayrılması ilə bağlı müraciət etməyib. İcra Hakimiyyəti tərəfindən də bələdiyyələrimizə tövsiyə olunub ki, bütün müharibə iştirakçıları, qazilər, şəhid ailələri torpaqla bağlı müraciət edəndə birinci dərəcəli olaraq torpaqla təmin olunsunlar. Əgər Zamir Əsgərov tərəfindən belə bir müraciət olarsa, ona dərhal cavab veriləcək.
Bələdiyyə nümayəndəsinin qazidən 1000 AZN istəməsinin səbəbi həyətyanı torpaq sahəsi ilə bağlı rüsumdur. Bu rüsum həyətyanı sahə özəlləşdiriləndə bələdiyyənin bank hesabına köçürülməli olan vəsait ola bilər”.
Günel CƏLİLOVA
