Məlum olduğu kimi, Nərimanov rayonu, Keşlə qəsəbəsində “Siti Garden” şirkətinin inşa etdiyi bina çöküb. Hadisənin baş verdiyi zaman yayılan məlumata görə, binanın çökməsi nəticəsində dörd nəfər müxtəlif dərəcəli bədən xəsarəti alıb. Faktla bağlı Baş Prokurorluğun İstintaq İdarəsində aparşdırılma aparılır. Heş şübhəsiz, binanın çökmə səbəbi istintaqın nəticələri élan edildikdən sonra bilinəcək.
“Siti Garden” şirkətinin Nərimanov rayonundan başqa Bakının daha hansı ərazilərində binalar inşa etdiyi barədə suallar yaranıb. Maraqlıdır, indi “Siti Garden”in indiyə qədər inşa etdiyi binalarda bu cür problemlər yaşanıbmı?
Bu barədə mətbuat üzərindən kiçik bir araşdırma apardıq. 2021-ci ildə mətbuatda Nərimanovda 21 hektar ərazidə iri yaşayış kompleksi inşa edildiyi yazılır. “Siti Garden”in “Kristal Abşeron” MTK-nın layihəsi olduğu qeyd edilir: “İri tikinti şirkəti “Kristal Abşeron” ölkədə ilk dəfə 21 hektar ərazidə, 17 hektar yaşıl həyətdə “Siti Garden Nərimanov” layihəsini təqdim edir”.
Araşdırmamız zamanı “Siti Garden”in “Kristal Abşeron”a aid olduğu bilindi. Onu da vurğulayaq ki, “Kristal Abşeron” MTK Bakıda barəsində ən çox qalmaqallar, narazılıqlar olan tikinti şirkətlərindən biridir və mütəmadi olaraq bu şirkətin inşa etdiyi binalarda yaşayanlar giley-güzar edirlər, tikinti şirkətinə qarşı müxtəlif iddialar irəli sürürlər. “Kristal Abşeron”un “Siti Garden” layihəsinin başı bəlalı oldu.
“Görünür, bu binanı tikənlər mötəbər dairələrə yaxın adamlardır”
Daşınmaz Əmlak üzrə ekspert Ramil Osmanlı “Bakı-Xəbər”ə bildirdi ki, “Siti Garden”in “Kristal Abşeron” MTK ilə hər hansı bir bağlılığının olub-olmadığını bilmir, “Siti Garden”in adını da bina çökdükdən sonra bilib. “Sözün düzü, bu şirkətin “Kristal Abşeron”la hər hansı bir bağlılığının olub-olmadığını bilmirəm. “Siti Garden”in adını isə ilk dəfə hadisə baş verəndən sonra eşitmişəm. Yəni əvvəl belə bir şirkətin olub-olmadığını bilmirdim”. “Siti Garden” barədə ətraflı informasiyanın olmadığını deyən mütəxəssis hesab edir ki, binanın çökmə səbəbi ətraflı araşdırılmalıdır. “Burda bir ziddiyyətli məqam var. Məsələn, ilkin informasiya verilən zaman dağıntılar altında 4 nəfərin qaldığı və onların çıxarıldığı bildirildi. Sonra Baş Prokurorluq informasiya yaydı ki, bir nəfər yüngül xəsarət alıb. Hər halda, dağıntı altında qalan 4 nəfərdən yalnız birinin yüngül xəsarət alması bir az inandırıcı görünmür. Görünür, bu binanı tikənlər mötəbər dairələrə yaxın adamlardır. Burada mənə də aydın olmayan müəyyən məqamlar var. Hadisənin hansı şəraitdə, necə baş verməsi tam aydın deyil, çünki bu barədə verilən informasiyalar bir az ziddiyyətlidir. Yəni bizim əlimizdə olan rəsmi informasiyalardır. Burada da əvvəlcə 4 nəfərin dağıntı altında qaldığı, sonra isə 1 nəfərin xəsarət aldığı deyildi. Dövlət qurumlarının çox qısa müddət ərzində ardıcıl olaraq verdiyi bir-birinə zidd informasiyalar məsələnin ciddiliyini arxa plana keçirdi. Yəni 4 nəfər insan dağıntılar altında qalıb, onların dağıntıların altında qalması ilə bağlı işlər görülüb, qısa müddətdən sonra bunun ardınca informasiyalar verildi ki, yox, dağıntılar nəticəsində ölən yoxdur, 1 nəfər yüngül xəsarət alıb”.
Bu məsələyə görə kimlərisə ittiham etməkdən uzaq olduğunu deyən R.Osmanlının sözlərinə görə, amma bu ciddi şəkildə araşdırılmalı məsələdir: “Burada təhlükəsizlik qaydalarının, tikinti qaydalarının pozulması elementləri də var və bu baxımdan da hadisə ciddi şəkildə araşdırılmalıdır”.
Əli TURABOV
