Sosial şəbəkələrdə ali təhsil müəssisələrinin və Azərbaycan Milli Elmlər Akademiyasının magistraturalarına keçirilən qəbul imtahanında bakalavrlara təqdim olunan bəzi test tapışırıqlarının şəkillərinin paylaşılması ciddi müzakirələrə yol açıb və bir sıra sualların yaranmasına səbəb olub.
Hətta bəzi iddialara görə, keçirilən qəbul imtahanında bakalavrlara təqdim olunan bəzi test tapışırıqlarının şəkilləri sosial şəbəkələrdə öncə paylaşılıb. Yəni əvvəlcədən sızdırılıb. Sosial şəbəkələrdə belə iddialar da yer alıb. Əlbəttə, bunun imtahandan əvvəl, yoxsa sonra sızdırıldığını çox güman ki, Dövlət İmtahan Mərkəzi (DİM) araşdırıb üzə çıxaracaq və bu imtahan suallarının şəkillərinin imtahanın nəticələri elan olunmamışdan öncə kimlər tərəfindən paylaşdıldığı müəyyən olunacaq. Mətbuatda və sosial şəbəkələrdə yayılan bəzi iddialara görə isə, bu şəkillər imtahan prosesi zamanı iştirakçılar tərəfindən çəkilib.
Bildirilir ki, DİM imtahana nəinki mobil telefon, hətta digər rabitə vasitələri, elektron cihazlar, kalkulyator, elektron məlumat daşıyıcısı, kitab, dəftər, jurnal, konspekt, məlumat kitabçası, lüğət, cədvəl, çanta və digər yardımçı vəsaitlərin gətirilməsini qadağan edib. İmtahana gələn bakalavrlar DİM əməkdaşları tərəfindən yoxlanıldıqdan sonra onların imtahan zalına daxil olmasına icazə verilir.
“Həmin 4 nəfərin imtahan nəticələri hazırda araşdırıldığı üçün hələ elan edilməyib”
Yayılan iddialara, səsləndirilən fikirlərə açıqlama almaq üçün DİM mətbuat xidmətinin rəhbəri Xanlar Xanlarzadə ilə əlaqə saxladıq. X.Xanlarzadə “Bakı-Xəbər”ə bildirdi ki, imtahan suallarının imtahandan öncə sızdırıldığı barədə deyilənlər doğru deyil, sualların şəkilləri imtahandan sonra paylaşılıb, həmçinin imtahan prosesində iştirakçılar hər hansı bir çəkiliş aparmayıb. O qeyd etdi ki, imtahan iştirakçıları ciddi şəkildə yoxlanıldıqdan sonra imtahan zalına buraxılır, bu səbəbdən də onların üzərində mobil telefon və sair olması mümkünsüzdür. X.Xanlarzadə qeyd etdi ki, hazırda test imtahan suallarının bəzilərinin sosial şəbəkələrə kimlər tərəfindən sızdırıldığı haqda araşdırmalar aparılır, ilkin nəticələr var, amma araşdırma tam başa çatdıqdan sonra bu barədə ictimaiyyətə daha dolğun məlumat veriləcək. Fevralın 25-də Feysbuk üzərindən DİM-in mətbuat konfransı keçirəcəyini (biz yazını hazırlayanda hələ mıtbuat konfransı başlamamışdı-L.Q) deyən X.Xanlarzədənin sözlərinə görə, orada da bəzi açıqlamalar olacaq və jurnalistlər mətbuat konfransına qoşularaq öz suallarını verəcəklər:
“Hazırda o sualların şəkillərinin kimlər tərəfindən sosial şəbəkələrdə paylaşıldığı ciddi şəkildə araşdırılır. Bu şəkilləri sual kitabçalarını özü ilə aparan bakalavrlar yayıb. Qeyd edim ki, qaydalara görə, magistraturaya qəbul imtahanının iştirakçıları cavab kartı ilə yanaşı, sual kitabçasını da nəzarətçiyə təhvil verməlidirlər. Ancaq imtahanda 3 nəfər materialların nəzarətçiyə təhvil verilməsi zamanı diqqətdən yayınıb və sual kitabçasını özü ilə aparıb. 1 nəfər isə sual kitabçasının içərisindən bir vərəqi çıxarıb və özü ilə götürüb. Sual kitabçasını, onun içrisindən vərəq çıxarıb özü ilə aparan həmin şəxslər də imtahandan sonra kitabçanın şəklini çəkərək sosial şəbəkələrdə paylaşıblar”.
Sual kitabçalarını özləri ilə aparan bakalvrlara qarşı hər hansı tədbir görülüb-görülməyəcəyinə gəlincə, X.Xanlarzadənin sözlərinə görə, həmin şəxslərim imtahan nəticələri hələ dayandırılıb, elan edilməyib: “Həmin 4 nəfərin imtahan nəticələri hazırda araşdırıldığı üçün hələ elan edilməyib. Bu şəxslərin imtahan nəticələri araşdırılır. Araşdırma başa çatdıqdan sonra nəticələr barədə məlumat verəcəyəm. Amma imtahandan çıxandan sonra bəzi sualların şəkillərini çəkib onlar paylaşıblar. İlkin versiyamız budur. Bunu imhatandan sonra yaydığımız press-relizdə də qeyd etmişdim”.
Leyla QARAXANLI
