Azərbaycanın ən ağır və dəhşətli faciəsi olan Xocalı soyqırımınin üstündən düz 30 il keçir. Erməni vandalların xalqımıza qarşı törətdiyi bu amansız, müdhiş vəhşilik bizim əbədi qan yaddaşımıza həkk olunubdur. Astara rayon Mərkəzi Kitabxanasında baş tutan ”Xocalı soyqırımı-Sülh və bəşəriyyət əleyhinə cinayət kimi” mövzusunda tədbir məhz faciənin otuzuncu ildönümünə həsr olunmuşdu. Tədbirin iştirakçıları M. Ə. Sabir adına şəhər 1 saylı və Z. Bünyadov adına şəhər 2 saylı orta məktəbin müəllim və şagirdləri idilər.
Soyqırımı qurbanlarının, İkinci Qarabağ müharibəsində Vətən, torpaq uğrunda canlarını fəda etmiş qəhrəman oğlanlarının əziz xatirəsi bir dəqiqəlik sükutla yad ediləndən sonra tədbiri açan Astara rayon Mərkəzi Kitabxana Sisteminin direktor əvəzi Natəvan Mədətzadə bu dəhşətli faciə haqqında fikirlərini gənc nəslə çatdırdı: - Əbədi və əzəli düşmənimiz olan ermənilərin Xocalı soyqırımı Azərbaycan tarixində iyirminci əsrın ən qanlı faciəsidir. 1992-ci il fevralın 25-dən 26-na keçən gecə 366-cı alayın və erməni qəsbkarlarının fitnəkarlığı nəticəsində tarixi torpağımız olan Xocalıda dinc əhaliyə divan tutuldu, yüzlərlə günahsız insanın qanı töküldü. Ordumuz Ali Baş Komandan İlham Əliyevin rəhbərli altında bu qanı yerdə qoymadı. Vətən müharibəsində erməniləri darmadağın edərək düşməndən bütün tökülən qanların qisas alındı.
Tədbirdə Mərkəzi kitabxananın digər əməkdaşları da mövzu ətrafında çıxış etdilər. Çıxışlarda Azərbaycanın haqq səsinin eşidəcəyi, ermənilərin mənfur əməllərinin beynəlxalq səviyyədə qınaq obyektinə çevriləcəyi, soyqırımının təqsirkarlarının haqlı cəzalarına çatacağı, əzəli doğma torpağından didərgin düşmüş insanların öz ata-baba yurdlarına qayıdacağı əminliklə bildirildi.
Çıxışlardan sonra şagirdlərin ifasında Xocalı soyqırımına həsr olunmuş şerlər səsləndi, soyqırımından bəhs edən sərgiyə baxıldı.
Zəfər ORUCOĞLU
Azərbaycan Jurnalistlər Birliyinin üzvü
