Şəkərli diabet endokrin sistemin xəstəliyi olub, tam və ya nisbi insulin çatışmazlığı nəticəsində qanda qlükozanın xroniki artımı ilə müşahidə olunur. Diabetdə karbohidratların, zülalların və yağların mübadiləsi pozulur. Diabetli xəstələrin sayı, xüsusilə də inkişaf etmiş ölkələrdə,` durmadan artır.
Ölkəmizdə də bu xəstəlikdən əziyyət çəkənlərin sayı artır. Adıçəkilən xəstəlikdən əziyyət çəkənlərə insulin verilir. Ancaq son günlər həmin preparatların verilməsi azalıb. Bu hal daha çox Quba rayonunda qeydə alınıb. Bu günlərdə sosial şəbəkələrdə şəkərli diabetdən əziyyət çəkən insanların pulsuz dərman almaq üçün xəstəxana qarşısında kütləvi növbəsini əks etdirən görüntülər yayılıb.
Kadrlardan da aydın görünür ki, xəstələr dərmanları növbəli şəkildə ala bilmir və hətta yaşlı insanlar təhlükəli vəziyyətə düşərək dəmir arakəsmədən keçməyə cəhd edirlər.
Qeyd edək ki, bundan əvvəl digər rayon xəstəxanalarında da oxşar növbələrin olması ilə bağlı görüntülər yayılmışdı. Cəlilabad Müalicə Diaqnostika Mərkəzində qeydə alınan kadrlarda xəstələr xidmətin düzgün qurulmamasından əziyyət çəkdiklərini bildirirdilər. Həmçinin Mingəçevir Rayon Mərkəzi Xəstəxanasının qarşısında diabet xəstələrinin gecə saatlarından növbəyə düzüldükləri, xəstə sayına uyğun dərmanın olmadığı iddia olunurdu.
“Şəkər xəstələri üçün istifadə olunan dərman və ya insulinin xəstələrə verilməsi limitsiz olmalıdır”
Məsələ ilə bağlı Quba Rayon Mərkəzi Xəstəxanasından bildirilib ki, şəkər xəstələri üçün nəzərdə tutulan dərman vasitələri mərhələli şəkildə verilir: "Vətəndaşların müraciəti eyni günə təsadüf etdiyindən dərman vasitəsinin verilməsində sıxlıq müşahidə olunub. Qısa müddət ərzində növbəlilik prinsipi gözlənilməklə bütün şəkər xəstələrinə dərmanların verilməsi həyata keçiriləcək".
Həkim ekspert Pərvanə Mustafayeva bildirdi ki, şəkər xəstələri üçün istifadə olunan dərman və ya insulinin xəstələrə verilməsi limitsiz olmalıdır: “Şəkərli xəstələrlə bağlı Dövlət Proqramı icbari sığortanın paketinə daxil olub. Hesab edirəm ki, şəkərli diabet xəstələrinə lazım olan dərmanların limitlə verilməsi düzgün qərar deyil. Xəstəyə dəstək olmaq əvəzinə, ona veriləcək dərmanı kəsmək düzgün deyil”.
Günel CƏLİLOVA
