Məlumatlara görə, magistratura imtahanında sual kitabçalarının təhvil verilməsi imtahan verən şəxslər arasında ciddi narazılığa səbəb olur. Qeyd edilənə görə, magistratura imtahanı ildə iki dəfə keçirilir və iştirakçılar hər imtahan üçün 50 manat ödəniş etməlidir.
Magistrlərin DİM-dən narazı olmağına əsas varmı? Sual kitabçası həqiqətənmi DİM-ə qaytarılmalıdır, qaytarılırsa bu hansı əsasla edilir?
“İmtahanlarda təkrar suallardan istifadə olunur və ona görə də müəyyən edilən 50 manat çoxdur, reallığı əks etdirmir”
Təhsil eksperti Kamran Əsədov “Bakı-Xəbər”ə şərhində bildirdi ki, Azərbaycanda magistratura pilləsinə test vasitəsilə qəbul imtahanları 2006-cı ildən etibarən keçirilməyə başlayıb və 2006-2016-cı illər ərzində imtahanda iştirak etmək üçün 3 manata yaxın vəsait tələb olunurdu. O qeyd etdi ki, əvvəllər imtahanı Tələbə Qəbulu üzrə Dövlət Komissiyası götürürdü, 2016-cı ildən sonra isə DİM yarandı və imtahanlar bu qurum tərəfindən keçirilməyə başladı. DİM tərəfindən sual kitabçalarına əvvəlki dövrlərdə 40, indi isə 50 manat qiymət qoyulub: “İmtahanda iştirak edənlər sual kitabçasına görə 50 manat ödəyir. Bu pul ona görə ödənilir ki, DİM-in imtahanların keçirilməsi, sualların hazırlanması üçün çəkdiyi bütün xərclər qarşılansın. Yəni faktiki olaraq DİM-in hər bir iştirakçısı, hər bir bakalavr üçün çap etdiyi sual kitabçasının, vəsaitin pulu ödənilir. Pulu ödənildiyinə görə birmənalı şəkildə həmin sual kitabçaları imtahan iştirakçılarına geri verilməlidir. Düzdür, DİN deyir ki, bizim kifayət qədər hazırlıq suallarımız yoxdur. Hesab edirəm ki, bu, DİM-in bəhanəsidir. Çünki indi imtahanlarda istifadə edilən suallar əvvəlki illərdəki suallardır, yeni suallar deyil, hazırlıq kurslarının sual kitabçalarında, banklarında olan işlənmiş suallardır. Birincisi, 50 manat xərcin tələb olunması düzgün deyil. DİM hər dəfə iştirakçıdan 50 manat alırsa, demək hər dəfə yeni sual sifariş verirlər, deməli köhnə sual kitabçasını verə bilərlər. Bu məntiqsizdir”.
O, hesab edir ki, DİM-in sual kitabçalarını qaytarmaması düzgün deyil. Qurumun bundan sonra çəkdiyi bütün xərcləri aldığı formatda apellyasiya keçirməsi və “hansı sualdan narazılığınız varsa apellyasiya verin deməsi də doğru sayılmır: “Sual kitabçasını mənə verməyibsən və bu halda mən nə bilim hansı sualda problem var? Mənə bir cavabları verirsən, bir də yüzə qədər rəqəmlər verirsən və burada şikayət et deyirsən, 15 dəqiqə vaxt verirsən. DİM sual kitabçalarını imtahan iştiarkçılarına geri verməlidir, çünki həmin imtahan kitabçasının xərci ödənilib. Bu sual kitabçalarının xərci tam şəkildə ödənilib. İmtahanlarda təkrar suallardan istifadə olunur və ona görə də müəyyən edilən 50 manat çoxdur, reallığı əks etdirmir”.
DİM-in mətbuat Xidmətinin rəhbəri Xanlar Xanlarzadə isə yerli mətbuata açıqlamasında bildirib ki, sual kitabçalarının imtahandan sonra iştirakçılara verilməməsinin səbəbləri var. Onun sözlərinə görə, ilk növbədə dünya təcrübəsində də kitabçaların imtahan verənlərə paylanılması nümunəsinə, demək olar ki, rast gəlinmir: “Həmin materiallar daha çox təşkilatın intellektual mülkiyyəti hesab olunur. Test tapşırıqlarının hazırlanmasına kifayət qədər vəsait və əmək sərf olunur. İmtahanda hər bir test tapşırığının biliyin qiymətləndirilməsində oynadığı rol da təhlil edilir və bütün bunlar onun pasportuna yazılır. Bu tapşırıqların bəzilərinin uzun müddət keçdikdən sonra müxtəlif imtahanlarda istifadə edilməsi də istisna edilmir. Ona görə də tapşırıqları mühafizə etmək zərurəti meydana çıxır və kütləvi yayılması məqsədəuyğun hesab olunmur”.
İradə SARIYEVA
