Bakıda “Hacı Mazanın binası” adı ilə tanınan binanın sakinləri bu günlərdə etiraz aksiyası keçiriblər. Sakinlərin etiraz aksiyası keçirməsinə səbəb həftə ərzində bir neçə dəfə binada liftlərin fəaliyyətinin dayandırılmasıdır. Həmçinin, evlərə suyun verilişində də fasilələr olur.
Bina sakinləri iddia edir ki, liftlərin fəaliyyəti həftə ərzində bir neçə dəfə qəsdən dayandırılır: “Liftləri komendant söndürür. Yaranan vəziyyətlə bağlı suallarımızı cavablandıran yoxdur. Komendanta sual verəndə isə deyir ki, Hacı Mazan göstəriş verib. İşıq pulu çox yazır. 50 manata görə lifti söndürürlər. Yaşlı qadın 17-ci mərtəbədə qalır. Necə qalxsın evinə?”.
Qeyd edək ki, son zamanlar bu tip şikayətlərin sayı artıb.
“Komendant işığa qənaət etmək üçün lifti qənaətlə işlətməməlidir, nəzərə almaq lazımdır…”
Daşınmaz əmlak məsələləri üzrə ekspert Nüsrət İbrahimli qeyd etdi ki, çoxmərtəbəli binalarda kommunal məsələlərlə bağlı problemlər son dövrlər artıb: “Çoxmərtəbəli binalarda yaşayan insanların bir qismi Sovet psixologiyasından hələ də ayrılmayıb. O insanlar fikirləşir ki, binanın kommunal problemini sakinlər deyil, dövlət ödəməlidir. Ancaq bu düzgün deyil. Əksər çoxmərtəbəli binalarda lift problemi yaşanır. Komendant işığa qənaət etmək üçün lifti qənaətlə işlətməməlidir. Bu düzgün deyil. Nəzərə almaq lazımdır ki, yuxarı mərtəbədə yaşlı nəsil, uşaq, xəstə yaşayır. Həmin insanlar yuxarı mərtəbəyə necə qalxsın? Liftdə problem varsa komendant bunu həll etmək üçün aidiyyəti qurumlara müraciət etməlidir. Yoxsa lifti qənaətlə işlətmək düzgün deyil. Sakinlər öz rahatlığını düşünmək üçün vaxtı-vaxtında kommunal ödənişləri edərsə, bu kimi problemlər yaşanmaz”.
Günel CƏLİLOVA
