Son zamanlar Bakıda taksi xidməti göstərən şirkətlərin fəaliyyətindən şikayətlərin ardı-arası kəsilmir. Taksi sürücülərinin xidməti və sərnişinləri ilə davranışları barədə qayda-qanun yaratmaq mümkün olmur. Bəzi taksi xidməti göstərən sürücülər qadın müştərilərə qeyri-etik davranışlar sərgiləyirlər. Taksi sürücüləri xidmət göstərdiyi müştərinin təhlükəsizliyinin qarantı olmaq əvəzinə, əxlaqsız hərəkət və ya davranışları ilə xanım müştəriləri narahat edirlər.
Bir neçə gün əvvəl sosial şəbəkələrdə taksi sürücüsünün gənc xanıma qarşı əxlaqsız hərəkəti ilə bağlı məlumat yayılıb. Xanım gecə işdən evə getmək üçün taksiyə oturub. Taksi sürücüsü "gedək şəhəri gəzək" deyərək xanımın etirazına baxmayaraq maşını sürüb. Xanım maşından güclə düşüb. Düşərkən sürücü qızın qolunu sıxıb, sonra da arxasına əl atıb. Xanım maşından düşən kimi maşının nömrəsini götürüb və yaxınlıqdakı yol polisi əməkdaşının köməyi ilə 29-cu saylı Polis Bölməsinə gedərək izahat yazaraq şikayətçi olub. Məsələ barədə DİN Mətbuat xidmətinin şöbə rəisi, polis mayoru Elşad Hacıyev məlumat yayıb. O bildirib ki, Bakıda müştərisi olduğu xanıma qarşı hörmətsizlik edən taksi fəaliyyəti ilə məşğul olan şəxs saxlanılıb: “Həmin avtomobilin sürücüsü, 1989-cü il təvəllüdlü Röyal Həsənov əməlini etiraf edib. Hazırda araşdırma aparılır. Araşdırmanın nəticəsindən asılı olaraq əmələ hüquqi qiymət veriləcək”.
“Əxlaqsızlığa yol verən taksi sürücüləri cəzalandırılmalı, ictimai qınağa məruz qalmalıdır”
Sosioloq Aytəkin Kamranqızı bildirdi ki, əxlaqsızlığa yol verən taksi sürücüləri cəzalandırılmalı, ictimai qınağa məruz qalmalıdır və digər şirkətlərə işə götürülməməlidir: “Bu cür olaylar əksər taksi şirkətləri tərəfindən qeydə alınıb. Hər bir taksi sürücüsü xidmətlə yanaşı müştərisinin təhlükəsizliyini qorumalıdır. Bu həm də taksi şirkətlərinin məsuliyyətidir. Bu cür insanlar olacaqsa, işdən kənarlaşdırılmalıdır və adları mərkəzləşdirilmiş qaydada olmalıdır ki, onları heç kəs işə götürməsin. Bu gün taksi şirkətləri çoxdur. Ciddi araşdırma etmədən taksi daşıyıcılığı ilə məşğul olmaları üçün imtiyaz verilir. Belə bir çoxluqda isə sərnişinlərin təhlükəsizliyi və komfortu ikinci plana keçir. Amma faktdır ki, nə qədər insan taksi fəaliyyətindən çörəkpulu qazanır. Bu fəaliyyət məhdudlaşdırılanda və ya qarşılarına hansısa tələb qoyulanda minlərlə insanın işini itirməsi anlamına gəlir. Əslində hökumət də qəti addımlara gedə bilmir. Yeganə yol hüquq-mühafizə orqanlarının müdaxiləsi və ictimai qınaqdır”.
Həmsöhbətimiz onu da əlavə etdi ki, indi taksi sürücüləri ilə bağlı vəziyyət çox pisdir: “Bu cür hallarla qarşılaşan xanımlara tövsiyə edərdim ki, çantalarında qoruyucu vasitələr daşısınlar. Məsələn, göz yandıran spreylər. Xaricdə, demək olar ki, bütün qadınların çantasında belə spreylər olur. Və yaxud da maşında gedərkən qışqırıb kömək istəmək də olar. Hər bir halda bu cür əməlləri olan sürücülər cəzalandırılacaqlar. Amma bununla yanaşı, belə insanların əməlləri ictimailəşdirilməlidir. Çünki onları bütün cəmiyyət tanımalıdır. Bəlkə o zaman digərlərinə görk olar, özlərini yığışdırarlar O cür sürücülərə də demək istəyirəm ki, öz şəhvət hisslərinizin qurbanına çevrilməyin. Heç yana qaçıb gizlənə bilməzsiniz. Harda olsanız, tapacaqlar, özü də ən qısa zamanda. Tapılıb mühakimə olunacaqsınız. Belə səviyyəsiz və axmaq əməllərdən uzaq durun”.
Günel CƏLİLOVA
