Xəbər verdiyimiz kimi, Prezident İlham Əliyev Bakı şəhərinin inzibati ərazisində nəqliyyat sahəsində idarəetmənin təkmilləşdirilməsi haqqında Fərman imzalayıb.
Fərmana əsasən, Bakı Nəqliyyat Agentliyi (BNA) publik hüquqi şəxs statusu ilə Bakı Şəhər İcra Hakimiyyəti başçısının tabeliyinə verilib. Eyni fərmanla “Nəqliyyatı İntellektual İdarəetmə Mərkəzi” (NİİM) Məhdud Məsuliyyətli Cəmiyyəti Daxili İşlər Nazirliyinin tabeliyinə keçib.
Məlumdur ki, Bakı Nəqliyyat Agentliyi ancaq vətəndaşları soymaq, cərimələr tətbiq etmək və problem yaratmaqla məşğul idi. Bir sözlə, bu qurum öz funksiyasını normal şəkildə həyata keçirə bilmirdi. İrad bildirib tənqid edəndə isə sağlam tənqidi qəbul etmir, şikayətçilərə qarşı hörmətsiz münasibət sərgiləyirdilər.
İndi bu məsələdə konkret olaraq Bakı Şəhər İcra Hakimiyyəti böyük bir məsuliyyət daşıyacaq. Vüsal Kərimlinin komandasını görəvdən azad edəndən sonra ortaya maraqlı detal çıxdı. Bugünlər ərzində görürük ki, ictimai nəqliyyat daha sərbəst və problemsiz çalışır. Bəlli olur ki, Vüsal Kərimli və onun komandası daha çox pul qazanmaq üçün ictimai nəqliyyatın fəaliyyətini cərimə yazma prosesi ilə iflic edirdi. Çox maraqlıdır ki, Vüsal Kərimli hələ də onunla bağlı səslənən korrupsiya ittihamlarına münasibət bildirməyib. Belə çıxır ki, yazdığı saxta cərimələr və onlardan toplanan vəsaitlərin hesabatını vermədən getdi.
İqtisadçı Günay Hüseynova “Bakı-Xəbər”ə bildirdi ki, hazırda Bakı şəhəri böyük meqapolisə çevrilib, paytaxt sakinlərinin ictimai nəqliyyata tələbatı durmadan artır və buna adekvat olaraq şəhər ərazisində yüz minlərlə sərnişinə müasir nəqliyyat xidmətləri göstərmək, onların təhlükəsizliyini təmin etmək çətinləşir:
“Ümumiyyətlə, nəqliyyat sahəsində xidmətlərin keyfiyyətinin yüksəldilməsi, habelə bu sahədə idarəetmənin təkmilləşdirilməsi ölkəmizdə aparılan islahatların tələbləri kimi qarşıda duran əsas məsələlərdəndir. Ona görə də, son illər nəqliyyat sahəsində aparılan islahatların davamı olaraq şəhər nəqliyyatında da bu istiqamətdə ardıcıl və fasiləsiz tədbirlərin həyata keçirilməsi qaçılmaz reallığa çevrilib. Bu baxımdan Bakı Nəqliyyat Agentliyinin Bakı Şəhər İcra Hakimiyyətinin tabeliyinə verilməsi sərnişindaşıma xidmətlərinin vahid bir mərkəzdən idarə olunmasına xidmət edəcək.
Şəhər İcra Hakimiyyəti paytaxtın spesifikasını daha yaxşı bilir, ona görə də Bakı şəhərinin inzibati ərazisində yol hərəkətinin təşkili, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində həyata keçirilən fəaliyyətin təkmilləşdirilməsi ilə müsbət tədbirlər görəcəyinə əminlik var.
Şəhər nəqliyyatı təkcə ictimai nəqliyyat vasitələrindən ibarət deyil, paytaxt həm də geniş taksi xidməti ilə əhatə olunub. Bakıya xaricdən minlərlə turist gəlir, onların xidmət səviyyəsini daha yüksək şəkildə təmin etmək üçün taksi fəaliyyəti də təkmilləşdirilməlidir. Ümumilikdə, bütün nəqliyyat xidmətləri müasirləşməlidir.
Əminəm ki, yeni strukturda həyata keçirilən tədbirlər nəticəsində sərnişinlərin təhlükəsizliyinin, sağlamlığının və rahatlığının daha yüksək səviyyədə təmin edilməsi, bu sahəyə dövlət nəzarətinin gücləndirilməsi kimi məsələlər həllini tapacaq”.
Nəqliyyatın İntelektual İdarəetmə Mərkəzinin DİN-ə verilməsinə gəlincə, ekspert bildirdi ki, nəqliyyat axınını tənzimləmək üçün DİN yalnız BNA kameralarından deyil, sayı hədsiz çox olan, bütün şəhər üzrə videomüşahidə sisteminə malik olan özünün videomüşahidə infrastrukturundan da effektiv istifadə edəcək: “Hazırda ən ciddi tələbat olan məsələlərdən biri SMS məlumatlandırma ilə tıxac vəziyyətdən çıxış, alternativlər təqdim etmək, sürücülərin effektiv məlumatlandırılmasını təşkil etmək, bu məqsədlə mobil texnologiyalardan istiafdə etməkdir. Hiss olunur ki, artıq bu tətbiqlərdən istifadə olunduğu səbəbindən bir neçə gündür ictimai nəqliyyatın fəaliyyəti normasına düşüb. Təbiidir ki, qurumdakı maliyyə pozuntiları ilə bağlı da ətraflı araşdırmalar aparılmalıdır”.
Məhəmmədəli QƏRİBLİ
