Son günlər marketlərdə unun satışı ilə bağlı məhdudiyyət tətbiq edilib. Belə ki, marketlərdə um kisə ilə deyil, yalnız çəki ilə satılır. Bu da alıcıların narazılığına səbəb olur.
Marketlərdə çalışanlar unun kisə ilə deyil, çəki ilə satılmasını unun və buğdanın qiymət artımı ilə əsaslandırır.
Ekspertlər bildirir ki, əsas buğda idxalçısı olan Rusiya ilə Ukrayna arasında olan münasibətlər unun idxalına təsir edir.
Mütəxəssislər onu da vurğulayır ki, bəzi marketlər yaranmış vəziyyətdən istifadə edib, artıq qazanc əldə etmək istəyir. Bu səbəbdən də onlar unu çəki ilə satmağa üstünlük verir.
“Vətəndaşlara un və un məmulatlarının necə və hansı ölçüdə satışı marketlərdən asılıdır, təəssüf ki…”
Məsələ ilə bağlı fikir bildirən iqtisadçı ekspert Natiq Cəfərli qeyd etdi ki, Azərbaycanın un və buğda ilə təchizatında xarici ölkələrin, xüsusilə də Rusiyanın payı böyükdür: “Məlumdur ki, Azərbaycan hər il Rusiyadan təxminən 70-80 min ton buğda idxal edir. Xatırladım ki, ölkənin illik buğda təlabatı 1.8 milyon tondur. Bunun 300-400 min tonunu daxili resurslar hesabına ödəyirik. Bu mənada deyə bilərik ki, xaricdə buğda və unun qiymətinin artması daxili bazara da təsir edir. Hazırda dünya bazarında taxılın qiymətinin yenidən artması gözlənilir. Bu həm Ukrayna-Rusiya gərginliyi, həm də Kanadadakı quraqlıq ilə əlaqədardır. Danılmaz faktdır ki, Kanada da dünyada iri taxıl istehsalçısı hesab edilən ölkədir. Mövcud Ukrayna-Rusiya gərginliyi daxili bazarda ehtiyat tədbirlərinin görülməsinə səbəb olub”.
Ekspert hesab edir ki, vətəndaşlara un və un məmulatlarının necə və hansı ölçüdə satışı marketlərdən asılıdır: “Təəssüf ki, bu məsələ qanunvericilikdə öz əksini tapmayıb. Yəni bu məsələni tənzimləyəcək nə bir mexanizm var, nə də qanun. Alınan malın satış qaydaları market sahiblərindən asılıdır”.
Günel CƏLİLOVA
