Marzəsə respublikamızın cənub qapısı Astara rayonunun ucqar kəndidir. Əhalisi 500 nəfərə yaxın olan kənd mürəkkəb dağlıq ərazidə yerləşir. Buranın təbiət mənzərələri əsl cənnət guşəsini xatırlayır. Kəndin dörd tərəfində olan füsunkarlıq göz oxşayır.
Burada yaşayan insanlarda safdırlar. Gözəl həyat naminə təmiz, ulu duyğularla yaşamağı bacarırlar. Marzəsəlilər öz doğma yurdunu, torpağını ürəkdən sevir, ölkə rəhbərinə böyük inam bəsləyir. Kənd Vətən müharibəsində torpaqların azadlığı uğrunda şəhid də veribdir. Onu da bildirim ki, dağların ətəyində yurd-yuva salan əhalinin əsas məşğuliyyəti sitrusçuluq, arıçılıq, heyvandarlıqdır. Dövlət başçısının ətrafında sıx birləşən kənd sakinləri çəkdikləri zəhmət hesabına özlərinə yaxşı gün-güzəran qura bilirlər.
Qaldı ki, kənd sakinləri yol və qaz problemləri ilə bağlı bu gün çox əziyyət çəkirlər. Buraya gələn yol olduqca bərbad haldadır. Uzun illər təmir üzü görməyən kənd yolu artıq keçilməz olub. Payız, qış aylarında günlərlə bağlanır. Yay gələndə isə yollarda toz-torpaqdan göz açmaq olmur. İndi Marzəsə camaatı yolsuzluğun əzabından bir yerə çıxa bilmir. Bununla bağlı aidiyyəti qurumlara müraciət etsələr də, problem öz həllini tapmayıb.
Marzəsə kəndində uzun illərdir mavi qaz yoxdur. Bu da böyük çətinliklər yaradır. Başqa günlər bir yana qalsın, qış mövsümün qarlı-şaxtalı havalarında soyuq otaqlarda qalmaq olmur. Uzaq meşələrdən yığılmış çürük oduncaqlarla isinmək və ehtiyacları ödəmək mümkün deyil. Başqa tərəfdən də yanacaq odunun qiymətini qaldırıblar qızı qiymətinə. Onu hər kəs alıb evini qızdıra bilmir. İllərdir kənddə vəziyyət bu cür davam edir. Səlahiyyətli şəxslər isə vədlər verməklə öz işlərini bitmiş bilirlər.
Bəli, hər iki məsələ yoluna qoyulsa Marzəsə camaatı bundan xeyli rahatlıq tapar.
Zəfər ORUCOĞLU Azərbaycan Jurnalistlər Birliyinin üzvü
