Bir millətin inkişafı, yaşaması üçün onun təhsili güclü olmalıdır. Çünki milləti məhv etmək üçün onun təhsil sistemini iflic etmək yetərlidir. Bu gün dövlətlərin ideoloji hədəflərindən biri təhsilin inkişafına kapital qoymaqdır. Çünki bura qoyulan vəsait itmir, əksinə, dövləti bərkidir.
Dünya təhsilinin inkişafının bu qədər irəlilədiyi dönəmdə ölkəmizin bəzi bölgələrində hələ də istifadəyə yararsız vəziyyətdə olan məktəblər var. Belə bir vəziyyət Lənkəranın Məhəmməd Bağırov adına Girdəni kənd tam orta məktəbində yaşanır. 94 nəfərlik pedaqoji heyətin və 630 şagirdin üz tutduğu təhsil ocağının vəziyyəti acınacaqlıdır. Məktəbin tavanı demək olar çöküb, döşəmə isə uçuq-sökük haldadır.
İmkanı olan 200 şagird qonşu məktəblərə üz tutub, imkanı olmayanlar isə qəzalı məktəbə getmək istəmirlər.
100 yaşlı məktəbin bəzi sinif otaqları tam yararsız vəziyyətdə olduğu üçün qapıları bağlanıb. Hazırda cəmi 4 otaqdan istifadə olunur. Şagirdlər bildirir ki, məktəbin tavanı uçub, sinifdə oturmaq mümkün deyil. Müəllimlər isə qeyd edir ki, məktəbdə pedaqoqlar üçün nəzərdə tutulan müəllimlər otağı belə yoxdur. Qış aylarında şagirdlərin davamiyyəti aşağı düşür.
Girdəni kənd tam orta məktəbi - Şirvan Əliyev: “Sinif otaqlarının soyuq olması şagirdlərin dərsə gəlməsinə təsir edir”
Məktəbin direktoru Şirvan Əliyev bildirdi ki, sinif otaqlarının soyuq olması şagirdlərin dərsə gəlməsinə təsir edir: “Ötən il məlum problemlə bağlı Təhsil Nazirliyinin nümayəndələri məktəbə baxış keçirib və yeni binanın tikintisi planlaşdırılıb”.
Elxan Əliyev: “Qəzalı vəziyyətdə olan məktəblərdə uşaqların təhsil alması təhlükəlidir”
Sosial sahə üzrə ekspert Elxan Əliyev bildirdi ki, bu gün ölkədə 4472 təhsil müəssisəsi fəaliyyət göstərsə də, onların 3200-ə yaxını dövlət büdcəsinin hesabına təmir olunub. Ancaq hələ də təmirə ciddi şəkildə ehtiyacı olan məktəblər var. Bu tipli məktəblərin sayı çoxdu. Söhbət ondan gedir ki, hər an qəza nəticəsində ağır faciəyə səbəb ola biləcək məktəblər kifayət qədərdi: “Qəzalı vəziyyətdə olan məktəblərdə uşaqların təhsil alması təhlükəlidir. Bu problemin aradan qaldırılması üçün modul tipli məktəblər tikmək mümkündür. Bunun üçün 2-3 ay yetərlidir. Məktəblərdə faciələrin qarşısını almaq üçün qəzalı məktəbləri modul tipli məktəblərlə əvəzləmək mümkündür. Yəni bu kimi məktəbləri 2-3 ay ərzində tam yararlı vəziyyətə salmaq olar”.
Günel CƏLİLOVA
