Son zamanlar MTK-lardan şikayətlər çoxalmaqdadır. Sakinləri narazı salan əsas məsələlərdən biri isə MTK-ların sakinlərə xəbər vermədən birdən-birə kommunal xərcləri artırmasıdır. MTK-lar qiymət artımını bəhanə gətirərək bir ucdan qiyməti qaldırırlar.
Mətbuatda Bakının Nizami rayonu, Məhsəti Gəncəvi küçəsi 130 A və 130 C ünvanlarında yerləşən yeni binanın sakinlərinin "Kristal Abşeron” MTK-dan şikayətləri yayılıb. Sakinlər sözügedən MTK-dan narazılıq edir. Onlar mətbuata deyiblər ki, "Kristal Abşeron”un nəzdindəki "Xəzər İnşaat XXI Əsr” şirkəti kommunal xidmətlərin qiymətini 7 manat artırıb. Sakinlərin dediyinə görə, sözügedən MTK onların müraciətlərinə baxmır, süründürməçilik edir: "Şirkətin Nəsimi rayonu, 2-ci mikrorayon, Hüseynbala Əliyev 32/24 ünvanında yerləşən baş ofisi ilə əlaqə saxlayırıq. Deyirlər ki, yaşadığımız yerin tikinti üzrə cavabdeh ofisinə yaxınlaşıb şikayətlərimizi bildirək. Lakin sahə üzrə ofisə təyin olunan işçi qrupu sakinlərin şikayətlərinə qeyri-ciddi yanaşır, problemlərin həllindən yayınır”.
Sakinlər bildirir ki, onlar razılıq vermədiyi halda yaşayış binasının idarəedilməsi "Nizami-9” MMMC-yə həvalə edilib. Üstəlik, tərəflər arasında xidmət müqaviləsi bağlanmadan sakinlərdən hər mənzil üzrə pul vəsaiti yığılması ciddi narazılıq yaradıb: "Halbuki, sakinlərə göstərilən xidmət səviyyəsi çox aşağıdır. Sakinlər tərəfindən istismar yığımı üzrə nəzərdə tutulan ödənişlərin hansı məqsədlər üçün xərcləndiyi barədə məlumatlar tələb edilməsinə baxmayaraq, heç kəsə bu hesabatlar verilmir. Hansısa səbəblərdən gizli saxlanılır. Binanın yanğın xəbərvermə, yanğın sulusöndürmə, yanğın tüstüsovurma sistemləri işləmir, təxliyə üçün nəzərdə tutulan giriş qapısı bağlıdır və bununla da hər hansı yanğın hadisəsi zamanı sakinlərin həyat və sağlamlığına ciddi təhlükə yaradan yüksək risqlər yaranmaqdadır”.
“Kristal Abşeron”: “MTK-nın kommunal ödənişlərin bölgüsünün aparılması və ya kommunal xərclərin müəyyənləşdirilməsi ilə bağlı hər hansı bir qərar qəbul etmək səlahiyyəti yoxdur”
Sakinlərin şikayəti ilə bağlı “Kristal Abşeron” MTK-dan bildirildi ki, “Nizami-9” Mənzil Mülkiyyətçilərinin Müştərək Cəmiyyəti ilə əlaqə saxlanılaraq, sakinlərin müraciəti araşdırılıb: “Həmin yaşayış kompleksi 2018-ci ilin aprelindən etibarən sakinlərin istifadəsinə verilib. 2019-cu ilin fevralında isə yaşayış kompleksində sakinlər tərəfindən “Nizami-9” Mənzil Mülkiyyətçilərinin Müştərək Cəmiyyəti yaradılıb. Həmin tarixdən etibarən kompleksin kommunal ödənişlərinin yığılması və xərc bölgüsünün aparılması da cəmiyyət tərəfindən təşkil olunur. Yəni “Xəzər İnşaat XXI əsr” MTK-nın kommunal ödənişlərin bölgüsünün aparılması və ya kommunal xərclərin müəyyənləşdirilməsi ilə bağlı hər hansı bir qərar qəbul etmək səlahiyyəti yoxdur. Onu da bildirək ki, aidiyyəti dövlət qurumları tərəfindən qoyulan tələb əsasında kompleks ərazisindəki park və qarajın planı yenidən işlənilib, proses yekunlaşıb. Önümüzdəki 3 ay içində sözügedən park və qaraj sakinlərin istifadəsinə veriləcək”.
Ramil Osmanlı: “Təkcə “Kristal Abşeron” deyil, başqa MTK-lar da qiymətləri qaldırıblar”
Daşınmaz əmlak üzrə mütəxəssis Ramil Osmanlı bizimlə söhbətində bildirdi ki, bütövlükdə MTK-ların mənzil idarə etməsi ilə bağlı yanaşması faktiki istehlakçı hüquqlarının pozulmasına yönəlib. “Çünki, birincisi, burada vətəndaşlarla ikitərəfli müqavilə bağlanmır. Eyni zamanda Azərbaycan Respublikasının Mənzil Məcəlləsinin icrası ilə bağlı qərarı, sərəncamları var və orada kommunal xərclərlə bağlı yığımların müəyyən edilməsi ilə bağlı müəyyən qaydalar da əks olunub. MTK-lar həmin qaydalara qəti şəkildə əməl etmirlər. Bu, sahə mülkiyyətçilərinin ümumi yığıncağında müəyyən olunmalıdır. Onlara bununla bağlı məlumat verilməlidir ki, binanın ümumi aylıq xərcləri bu qədərdir, həmin xərclər də sahə mülkiyyətçilərinin üzərinə düşən paylar arasında bölündükdə nə qədər vəsait düşür. Amma bunu MTK-lar etmir. Vətəndaşlarla da ikitərəfli müqavilə olmadığı üçün sonradan problemlər yaranır. Kommunal xidmətlərin qiymətinin qaldırılmasına gəldikdə isə, bu təkcə “Kristal Abşeron”la bağlı deyil, digər MTK-larda da oxşar vəziyyət yaşanır. Təkcə “Kristal Abşeron” deyil, başqa MTK-lar da qiymətləri qaldırıblar. Bilirsiz ki, bazarda istehlak məhsullarının qiymətinin sürətlə kəskin artım prosesi baş verir. İstər kommunal ödənişlərin, istərsə də digər istehlak fərdlərinə dair qiymətlərin sürətli artımı yaşanır. Ona görə də, ola bilsin, MTK-lar da düşünür ki, məsələn, çörəyin, işğın, qazın qiyməti artdısa biz niyə kommunal idarəetmə ilə bağlı rəqəmləri artırmayaq. Onlar başa düşmürlər ki, əslində, onların idarəetmədə üzərlərinə götürdükləri öhtəlik qeyri-qanunidir. MTK-lar bununla qanunvericiliyin tələblərini kobud şəkildə pozurlar. Bu da yolverilməz haldır”.
Bahalaşdırılan kommunal haqqına uyğun xidmət göstərilmədiyinə gəlincə, R.Osmanlının sözlərinə görə, MTK-lar xidmətin təşkilində daha çox mənffət götürmək məqsədi güdür: “Vətəndaşları, yaxud başqa istiqamətləri düşünmür. MTK-lar düşünür ki, necə edim daha çox mənfəət götürüm? Burada da mənfəətin çox əldə olunmaısnın yeganə yolu ondan ibrətdir ki, sən xərcləri azaldırsan və xərclərin azaldılması da əməkhaqqı fondunun, digər xərclərin hesabına başa gəlir. Bu da, təbii ki, xidmətin keyfiyyətinə təsir göstərir, xidmətin keyfiyyətini aşağı salır. Belə olduğu təqdirdə, təbii ki, əslində MTK-dan yüksək keyfiyyətli xidmət gözləmək düzgün deyil. Məni burada bir qədər düşündürən, qayğıalndıran bir məsələ var. Çox təəssüf, vətəndaşlarımız qanunvericiliklə onlara verilən hüquqlardan istifadə etmirlər. Onlar özləri yığışıb, məsələn, idarəetmə formasını seçib daha mükəmməl, daha rahat qaydada, daha yaxşı idarəetməni öz üzərlərinə götürə bilərlər, amma etmirlər. Bu məsələdə vətəndaşlar arasında birlik, vahid mövqe olmadığı üçün də belə problemlər yaranır”- deyə R.Osmanlı vurğuladı.
İradə SARIYEVA
