Vətən müharibəsi zamanı Ermənistan Silahlı Qüvvələrinin bölmələri döyüş meydanından qaçaraq təmas xəttinə yaxın yerləşən kəndlərdəki mülki əhalini hədəf aldı.
Erməni silahlı terrorçularının təcavüzü nəticəsində ən çox ziyan görmüş rayonlardan biri də Tərtərdir. Burada ümumilikdə 6000-ə yaxın tikiliyə zərər dəyib. Bunlardan 57 yaşayış evi və 5 qeyri-yaşayış obyekti tamamilə dağıdılıb, digərlərinə qismən ziyan dəyib.
Dəymiş ziyanın qiymətləndirilməsi və aradan qaldırılması məqsədilə Azərbaycan Prezidenti İlham Əliyevin 6 noyabr 2020-ci il tarixli müvafiq Sərəncamı ilə yaradılmış Dövlət Komissiyası tərəfindən təşkil olunmuş fəaliyyət nəticəsində ümumilikdə 11 şəhər və rayon ərazisində 12 000-dən artıq obyektə baxış keçirilib, qiymətləndirmə və təmir-tikintinin ilkin planlaşdırılması işləri aparılıb.
Qeyd etdiyimiz kimi, 44 günlük Zəfər müharibəsində mülki əhaliyə dəymiş ziyanın ödənilməsi ilə bağlı tapşırıq verilsə də, bu işdə ləngimələr qeydə alınır. Belə ki, 44 günlük Zəfər müharibəsi zamanı Tərtər rayonundan olan evlərə dəyən ziyan hələ də tam şəkildə həll edilməyib.
Sakinlər bildirir ki, artıq aylar keçməsinə baxmayaraq, problemlə məşğul olan yoxdur, ya da görülən iş yarımçıq qalıb.
Tərtər rayonunun Düyərli kəndinin ağır atıcı silahlardan və raketlərdən atəşə tutulması nəticəsində insanların mülkiyyətinə və evlərinə xeyli ziyan dəyib. Qəzalı vəziyyətə düşən evlərdən biri də Abuzərovlar ailəsinə aiddir. Düşmən ordusu kəndi atəşə tutan zaman bir neçə top və “Qrad” mərmisi fərdi yaşayış evinin yaxınlığına düşüb. Nəticədə bir mərtəbəli, iki otaqlı evin hasarlarında çat və əyilmə yaranıb. Evin dam örtüyü isə yararsız vəziyyətə düşüb. Abuzərovlar ailəsi evin yenidən əsaslı bərpası ilə bağlı rayon İcra Hakimiyyətinə dəfələrlə müraciət etsələr də, onlara hər hansı bir cavab verilməyib. Sakinlər qeyd edir ki, həmin ərazidə ziyan çəkmiş bir neçə ev hələ də təmir olunmayıb.
“O şəxslərin evi öz günahlarından deyil, ermənilərin atdığı raket nəticəsində yararsız hala düşüb, əhaliyə dəymiş ziyanın ödənilməsi ilə bağlı Prezidentin xüsusi göstərişi var”
Məsələ ilə bağlı Tərtər Rayon İcra Hakimiyyətindən bildirildi ki, Nazirlər Kabinetinin tapşırığına əsasən ayrılmış komissiya müharibədən sonra evə baxış keçirib və dəymiş ziyanın miqdarı hesablanıb: “Abuzərovlar ailəsinə 1000 manat nağd pul və müəyyən tikinti materialları təqdim edilib. Bu isə təmir işinin aparılması üçün kifayət edir.
Sosioloq Aytəkin Kamranqızı qeyd etdi ki, İkinci Qarabağ müharibəsi zamanı zərər görmüş evlər qısa müddətdə təmir olunmalı idi. Müharibə bitsə də, bəzi vətəndaşların evi hələ də yararsız vəziyyətdədir: “Bəzi məmurlar vəziyyətdən sui-istifadə edib vətəndaşları incidir. Ancaq unutmaq lazım deyil ki, bu cür həssas məsələdə insanları incitmək olmaz. O şəxslərin evi öz günahlarından deyil, ermənilərin atdığı raket nəticəsində yararsız hala düşüb. Əhaliyə dəymiş ziyanın ödənilməsi ilə bağlı Prezidentin xüsusi göstərişi var. Aidiyyəti qurumlar insanları incitməzdən öncə Prezidentin sərəncamlarını, göstərişlərini xatırlasın”.
Günel CƏLİLOVA
