Nə qədər müstəqil respublikamız tərəqqi etsə də, dağ rayonu Lerikdə unudulmuş, problemlər içində can verən kəndlərin sayı günbəgün artır. Belə kəndlərdən biri də Qılqılovdur. Buranın sakinləri deyirlər ki, rahat həyatımız elə sovet dağılanı yoxa çıxdı. Biganəlik ucbatından yaranan acınacaqlı güzəran çox qılqılovlunu öz doğma yurdundan perik salıb. Kənddə qalanların da istər yay olsun, istər qış hər işi müşkül məsələyə dönür. Biri xəstələnəndə nə həkim tapmaq olur, nə də ki, dərman...
Qılqılov kəndində yaxşı heç nə yoxdur. Camaat artıq məmurların verdikləri yalan vədlərdən bezikib. Ən pisi odur ki, respublikada insanların rahatlığı üçün görülən yeniliklər burada daha bir problem yaradır. Məsələn, “Elektron hökumət” layihəsi çərçivəsində reallaşan bankomatların xidməti insanlar tərəfindən rəğbətlə qarşılanır. Həqiqətən mütərəqqi bir üsuldur. Qılqılov kəndində isə bu müsbət qarşılanmır. Bankomat yarandığı gündən qılqılovlular çox əziyyət çəkirlər. Yaşlı adamlar aylarla pensiya pullarına həsrət qalırlar. Səbəb kənddə bankomat yoxdur, 30 ilə yaxındır ictimai nəqliyyat işləmir. Götürək kəndə mavi qazın verməsini. İndi 7 ildir bu məsələ ortaya atılıbdır. Hələ heç bir iş görülməyib. Amma yanacaq odunun qiyməti beş qat qalxıb...
İşığın, internetin tez-tez kəsilməsi Qılqılovda artıq vərdiş halını alıb. İnsan amilindən irəli gələn başqa sosial xidmətlərdən heç danışmağa dəyməz. Kəndin xəstəsi min əziyyətlə Lənkərana qaçmalı olur.
Qılqılovlular işlərin düzələcəyinə isə o qədər də inanmırlar. Azərbaycanın hər yerində olduğu kimi, lap yaxın keçmişdə kəndin də ictimai nəqliyyatı olub. İndi həmin marşrutun yenidən bərpasından başqa camaat öz dövlətindən heç nə istəmir...
Zəfər ORUCOĞLU Azərbaycan Jurnalistlər Birliyinin üzvü
