Son illər ucqar kəndlərdə qəzalı vəziyyətdə olan ümumtəhsil məktəblərinin bir çoxu modul tipli məktəblərlə əvəz olunur. Belə təhsil ocaqlarından biri də 2020-ci ilin avqust ayında Lerik rayonu Loda kəndində inşa olunan modul tipli məktəbdir
Lerikdə tikilən modul tipli məktəbin tikintisində çalışan 10-a yaxın şəxs 2 ilə yaxındır ki, onlara ödənəcək əməkhaqlarını ala bilmədiklərini iddia edir. Pullarını nə zaman alacaqları ilə bağlı tikintini aparan şirkətə dəfələrlə müraciət etsələr də, onlara vədlərdən başqa heç nə verilməyib. Şikayətçilər qeyd edir ki, onlar razılaşma əsasında bu məktəbin tikintisində iştirak edib. Kimsə öz şəxsi maşını ilə yük daşıyıb, başqası maşına yükü yükləyib-boşaldıb, digərləri isə usta və fəhlə kimi işləyib.
Əmək haqlarını ala bilməyən işçilər dəfələrlə aidiyyəti qurumlara müraciət etsələr də, onlara hər hansı bir cavab verilməyib.
Qeyd edək ki, bu tip şikayətlərin sayı artıb. Şirkətlər işçini işlədir, onun əməyindən istifadə edir, ancaq zəhmət haqqını ödəmir.
“Bir çox dövlət sifarişi ilə həyata keçirilən tikinti-istismar işləri zamanı çalışan işçilər əmək haqqını ala bilmir”
Sosial sahə üzrə ekspert Elxan Əliyev qeyd etdi ki, bir çox dövlət sifarişi ilə həyata keçirilən tikinti-istismar işləri zamanı çalışan işçilər əmək haqqını ala bilmir. Xüsusən də modul tipli tikililərdə çalışanların maaşı verilmir: “Bu tip problemlərin yaranmasının müxtəlif səbəbləri var. Tikinti işinə cəlb olunan şirkətlərin seçimi qeyri-şəffaf formada həyata keçirilir. Tenderi udan təşkilat lazım olan vəsait üzərindən görəcəyi işi həyata keçirməkdə çətinlik çəkir, nəticədə şirkət borclanır. Belə olan halda şirkət işçilərin əmək haqqını ödəyə bilmir. Bu halın yaşanmasının əsas səbəbi tenderlərin şəffaf və açıq formada keçirilməməsi ilə bağlıdır”.
Həmsöhbətimiz hesab edir ki, əmək haqqı ala bilməyən fəhlələr haqlarını qorumaq üçün məhkəməyə müraciət edə bilər.
Günel CƏLİLOVA
