Yeddi il əvvəl əsaslı şəkildə təmirinə başlanılan Hövsan-Zığ avtomobil yolunda işlər yarımçıq saxlanılıb. 2015-ci ilin oktyabrından təmirə bağlanılan Zığ dairəsi-Hövsan-Türkan avtomobil yolunun təmiri illərdir ləngiyir.
Məlumat üçün bildirək ki, yolun inşasına “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqram”ına əsasən başlanılıb və ümumilikdə yolun 130 min m2 sahəsinin 3 qat olmaqla asfaltlanması planlaşdırılıb. 2017-ci ildə inşasının bitməsi planlaşdırılan 7 kilometirlik yolda təmir işləri bu gün də davam edir.
Xatırladaq ki, Prezident İlham Əliyev ötən ilin oktyabrında Zığ-Hövsan avtomobil yolunun yenidən qurulmasına 4,9 milyon manat ayırıb. Sərəncama əsasən, 58 min nəfər əhalinin yaşadığı 2 yaşayış məntəqəsini birləşdirən Zığ–Hövsan avtomobil yolunun yenidən qurulması məqsədilə 4,9 milyon manat Azərbaycan Avtomobil Yolları Dövlət Agentliyinə ayrılıb.
Qeyd olunan yolun tikintisinin ləngiməsinin səbəbi təmirin vaxtaşırı aparılmasıdır. Təmiri başa çatmayan yolda işıqlandırmanın olmaması isə sürücülərin narazılığına səbəb olur. Onlar qeyd edir ki, yolun təmirsiz olması mütəmadi olaraq yol qəza hadisələrinin sayının artmasına səbəb olur.
“Yolun konkret hansı zamanda bitəcəyini demək çətindir, işlər son mərhələ üzrə gedir”
Məsələ ilə bağlı Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirdi ki, Hövsan-Zığ avtomobil yolunda tamamlanma işləri aparılır: “Yolun konkret hansı zamanda bitəcəyini demək çətindir. İşlər son mərhələ üzrə gedir və bu il də davam etdiriləcək. İndiyə kimi yolun tikintisinə nə qədər vəsait ayrılıbsa, ona uyğun da iş görülüb”.
Günel CƏLİLOVA
