Məlum olduğu kimi, Azərbaycanda jurnalistlər güzəştli ipoteka krediti əldə edə biləcək. Bu barədə Azərbaycan Prezidentinin 2016-cı il 22 iyun tarixli 940 nömrəli Fərmanı ilə təsdiq edilmiş “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”nda dəyişiklik edilməsi haqqında Fərmanda qeyd edilir.
Fərmana əsasən, gənc ailənin üzvü olan, azı 5 il jurnalist işləyən və Media Reyestrinə daxil edilmiş şəxslər güzəştli ipoteka kreditindən istifadə etmək hüququna malikdir. Bundan əlavə, gənc ailənin üzvü olmayan, ən azı 15 il jurnalist işləyən və Media Reyestrinə daxil edilmiş şəxslər də bu imkandan yararlana biləcəklər.
Qeyd edək ki, Azərbaycanda güzəştli ipoteka krediti 4 faizlə verilir.
Bahəddin Həziyev: “Jurnalist nə yuxarının minnətini götürməli olacaq, nə də aşağının töhmətini, öz halal qazancı ilə öz mənzilini alacaq”
Jurnalistlərin güzəştli ipoteka krediti əldə etmə kateqoriyasına daxil edilməsinin əhəmiyyəti haqqında danışan “Bizimyol” saytının baş redaktoru Bahəddin Həziyev bizimlə söhbətində bildirdi ki, bu yaxşı bir yenilik oldu: “Bu barədə təklif verənlərdən biri mən olmuşam. Mənası da budur ki, jurnalistlər öz qazancı ilə, güzəştli şərtlərlə mənzil alsınlar. Xüsusilə də gənc jurnalistlər. "Media haqqında" qanundakı bu müddəa çox yerinə düşür. Bundan əvvəl jurnalistlər arasında kimə ev verilsin deyə seçim edilirdi və hədiyyə olunurdu. O seçimi dövlət məmurları öz qoyduqları qaydalarla edirdi. İndi isə seçimi qanun edəcək. Həm də hamıya şamil olunacaq. Eyni zamanda, jurnalist nə yuxarının minnətini götürməli olacaq, nə də aşağının töhmətini. Öz halal qazancı ilə öz mənzilini alacaq. Bu təklifi əsaslandıranda demişdim ki, jurnalistlərin çoxu kirayədə yaşayır. Xüsusilə peşəmizin gəncləri. Elə mexanizm tapmaq lazımdır ki, onun hər ay ödədiyi o vəsait havaya getməsin. Öz evinə ödəsin. Həm də daha az miqdarda. Ona görə bu yeniliyi müsbət dəyərləndirirəm. Başqa çox yeniliklər də var. İndi əsas məsələ qanunun tətbiq olunmasına ictimai və dövlət nəzarətinin qurulmasıdır. Jurnalist ipotekasının da icrasına, dövlətlə yanaşı, elə jurnalistlərin özü nəzarət etməlidir ki, bu müsbət qayda düşünülən faydanı versin”.
Hikmət Babaoğlu: “Jurnalistlərin güzəştli kreditlərdən yararlanmaqla mənzil problemlərini həll edə bilmələri üçün hüquqi bazanın yaradılması Azərbaycan dövlətinin jurnalistə növbəti qayğısıdır”
Millət vəkili Hikmət Babaoğlu bildirdi ki, Media haqqında qanunun tətbiq edilməsi mediamızın inkişaf tarixində tamamilə yeni bir mərhələ təşkil edəcək: “Hər şeydən öncə ona görə ki, yeni qanun bu inkişafı bütün parametrlərlə təmin edə biləcək hüquqi əsaslar və azadlıqları özündə ehtiva edir ki, bu da informasiya cəmiyyətinin zəruri tələblərindən biridir”.
Onun sözlərinə görə, cəmiyyətdə media münasibətləri kontekstində aktual olan mühüm məsələlərdən biri də peşəkar və məsuliyyəti media problemi idi ki, yeni qanunda bu məsələləri tənzimləyən hüquqi mexanizmlər də öz əksini tapıb: “Media reyestrinin önümüzdəki 6 ay ərzində yaradılmasının nəzərdə tutulması, jurnalistlərin tanınan hüquqlarının müdafiəsi mexanizminin təkmilləşdirilməsi və daha operativ təşkil edilməsi, tənzimlənən və tənzimlənməyən media növləri arasında dəqiq sərhədin müəyyən edilməsi, ölkəmizin informasiya məkanının təhlükəsizliyinin təmin edilməsi, yerli medianın inkişafına təkan verilməsi, informasiya mühitinin sağlamlaşdırılması və rəqabət qabiliyyətinin artırılması kimi strateji istiqamətlərin inkişafı üçün hüquqi əsasların yaradılması yeni qanunun tətbiqi sayəsində mediamızın əldə edə biləcəyi mühüm nailiyyətlər kimi xarakterizə oluna bilər. Ən başlıca məsələlərdən biri yenə də jurnalistlərin məişət problemlərinin həll edilməsi və mənzil-kommunal şəraitlərinin yaxşılaşdırılması məsələsidir. Bu mənada, jurnalistlərin güzəştli kreditlərdən yararlanmaqla mənzil problemlərini həll edə bilmələri üçün hüquqi bazanın yaradılması Azərbaycan dövlətinin jurnalistə növbəti qayğısıdır. Bu yeni yanaşma jurnalistlərin məişət problemlərini kütləvi və birbaşa həlletmə imkanları yaradır. İki kateqoriyada güzəşt hüququnun tanınması həm 5 il jurnalist kimi əmək faliyyəti olan jurnalistlərə, həm ailə statusunda digərlərinə 15 illik əmək stajı əsasında nəzərdə tutulur. Bu da, demək olar ki, davamlı jurnalistika fəaliyyəti ilə məşğul olan bütün jurnalistləri əhatə edir. Ona görə də, media qanununun tətbiqinə paralel olaraq jurnalistlərin güzəştli kreditlərdən istifadə etməsi üçün hüquqi bazanın yaradılması da mediamızın inkişafı üçün kompleks tədbirlərin həyata keçirilməsi kimi xarakterizə edilməlidir".
Vasif Həsənli: “Jurnalistlərin cəmi 4 faizlə ev ala bilməsi həm uzun illər mediada çalışmış şəxslərin, həm də gənclərin nəzərə alınması baxımından sevindiricidir”
“Demokrat.az” xəbər portalının baş redaktoru Vasif Həsənli bildirdi ki, artıq jurnalistlər də öz evlərini özləri ala biləcək: “Prezident İlham Əliyevin Fərmanı ilə gənc ailənin üzvü olan, ən azı 5 il jurnalist işləyən və Media Reyestrinə daxil edilmiş şəxslər, eləcə də gənc ailə olmayan, lakin ən azı 15 il jurnalist işləyən və Media Reyestrinə daxil edilmiş şəxslər güzəştli ipoteka şərtlərindən yararlana bilər. Beləliklə, cəmi 4 faizlə ev ala bilmək şansı yarandı və burada həm uzun illər mediada çalışmış şəxslərin, həm də gənclərin nəzərə alınması sevindiricidir. Yəni heç kim kənarda qalmır, nə narazılıq olur, nə də inciklik. 5 il jurnalist kimi işlədikdən sonra mənzil probleminin həlli imkanı yaranır.
Bu, Media Agentliyinin yaranması ilə başlanan islahatların mediaya ən böyük töhfələrindən hesab oluna bilər. Eləcə də Media Reyestrinin niyə və nə qədər vacib olduğu bir daha təsdiq olunur. Bu imkanı yaratdığı üçün Prezident İlham Əliyevə və bu işdə əməyi keçən hər kəsə təşəkkür edirik”.
Aqil Camal: “Jurnalistlərin güzəştli ipoteka əldə edən vətəndaşlar sırasına daxil edilməsi böyük uğurdur”
“Türküstan” qəzetinin baş redaktoru Aqil Camal bildirdi ki, jurnalistlərin güzəştli ipoteka əldə edən vətəndaşlar sırasına daxil edilməsi böyük uğurdur: “Məlumdur ki, indiyə qədər jurnalistlər ipoteka və ya sosial evlərdən yararlanmaq istəyərkən çətinliklə üzləşirdilər. Bu məsələnin qanunla təsbit olunması onu deməyə əsas verir ki, media əhli güzəştli ipotekadan istifadə etməklə mənzil sahibi olacaq. Məlumdur ki, gənc jurnalistlərin əksəriyyəti evsizlikdən əziyyət çəkirdi. Mənzili olmadığı üçün ailə qura bilməyən jurnalistlər yetərincədir. Bu dəyişiklik jurnalistlərin ev problemini həll edəcək”.
Günel CƏLİLOVA
