Bir neçə gün öncə anasından polisə şikayət edən uşağın dramı gündəmi zəbt etməsə də, sonradan məlum oldu ki, uşağı bu addımı atmağa anası vadar edib. Əslində ona şəxsiyyət olaraq hörmət qoyulmasını, digər uşaqlar kimi onun da hüquqlarının olmasını anasına sübut etmək istəyən qızcığazın bu hərəkəti hüquqları tapdanan, atası, anası, əri və ya yaxınları tərəfindən zorakılığa məruz qalanlara örnək bir addım kimi dəyərləndirilməlidir. Bu hadisədən sonra maraq üçün “Uşaq valideynlərindən polisə şikayət edib” başlığını “google”də axtarış verdik. Düzü, xəbərlərin əksəriyyəti xarici ölkələrə aid olsa da ölkəmizdə buna bənzər bir neçə fakta rast gəldik.
Faktlara nəzər saldıqda, digər qurumlarla yanaşı, polisi, QHT-ləri, eləcə də aparılan təbliğata dəstək verən vətəndaşlarımızı narahat edən bir neçə ağrılı problemin - erkən nikahın və narkotik asılılığının psixoloji təsirlərinin şahidi olduq. Mövzu ilə bağlı müraciət etdiyimiz ekspertlər uşaqlara qarşı zorakılığa yol verənlərin əksəriyyətinin təhsildən uzaq düşən və erkən yaşda ailə quran valideynlər olduğunu qeyd etdilər.
“Polis”in suallarını cavablandıran “Təmiz Dünya” Qadınlara Yardım İctimai Birliyinin sədri Mehriban Zeynalova deyir ki, azyaşlının polis bölməsinə müraciət etməsi polisin apardığı maarifləndirmənin və təbliğatın nəticəsidir. Bu prosesin davamlı olması qarşıya çıxacaq problemləri önləməklə yanaşı, qurumlar arasındakı koordinasıyanı da gücləndirəcək.
Məsələyə DİN-in Polis Akademiyasının müəllimi, polis polkovnik-leytenantı Rasif Müzəffərovun da münasibətini öyrəndik. O dedi ki, bu gün uşaqlarla iş üzrə əsas öhdəlik məktəblərdə fəaliyyət göstərən psixoloqların üzərinə düşür. Təhsil alan hər bir uşağın psixoloji xəritəsini bilməklə onlar problemlərin həllinə öz töhfələrini vermiş olurlar. Çünki məktəb psixoloqları şagirdləri daha yaxından tanıyırlar. Yetkinlik yaşına çatmayanlarla profilaktiki iş aparan həmkarlarımızın məktəblərlə işi həm də psixoloqlar üzərindən olmalıdır. Mütəmadi olaraq onlarla əlaqə saxlamalı, birgə tədbirlər planı hazırlamalı, çətin tərbiyə olunan, dərsə davamiyyəti zəif olan, zorakılıqla üzləşən uşaqlarla, həm də onların valideynləri ilə davamlı iş aparmalıdırlar.
Araşdırmalar göstərir ki, münaqişəli ailələrdə böyüyən uşaqların məktəbdə və digər ictimai yerlərdə özlərini aparması, davranış qaydaları onların yaşadıqları mühiti özündə əks etdirir. Onların gələcəkdə hər hansı bir cinəyətə ortaq olmalarının qarşısının alınmasında isə ərazi polis orqanlarının əməkdaşlarının - sahə rəislərinin və sahə inpektorlarının qətiyyət göstərməsi vacib şərtlərdəndir.
“Zorakılığa məruz qalan uşaqların polisə müraciəti ilə bağlı hər hansı statistika aparılmasa da, bu günlərdə anasının ona qarşı basqısını polisə anladan azyaşlının cəsarəti alqışa layiqdir”,- deyən BŞBP-nin İctimai Təhlükəsizlik İdarəsinin Yetkinlik Yaşına Çatmayanlarla Profilaktik İşin Təşkili Bölməsinin baş inspektoru, polis polkovnik-leytenantı Kəmalə Ələkbərova uşaqlara, qadınlara zorakılığa qarşı ictimai qınağın da yetərincə olması üçün polis və digər aidiyyəti qurumlar tərəfindən aparılan mübarizəyə cəmiyyətin dəstəyinin də vacibliyini qeyd etdi. Polis tərəfindən məktəblərdə keçirilən tədbirlərin əhəmiyyətinə toxunan K.Ələkbərova Təhsil Nazirliyində yaradılmış “Uşaq Qaynar Xətti”nin də sözügedən məsələdə önəmini xüsusi vurğuladı. Dedi ki, həmin “qaynar xətt” vasitəsilə zorakılqla üzləşən uşaqlar psixoloqa, hüquqşünasa yönləndirilir.
Polisə kömək üçün müraciət edən o qızcığaza gəlincə, demək istəyirik ki, onun taleyi artıq əmin əllərdədir və dövlət ona sahib çıxacaq. Bütün bu problemlərə baiskarlar isə XXI əsrdə erkən nikaha “adət-ənənə” donu geyindirənlər, övladlarını təhsildən yayındıranlardır. Onların qarşısını kəsmək üçün kifayət qədər imkanlar və arqumentlər var.
Gördüyü neqativlərə seyrçi qalmaq həmin suça və ya əmələ şərik olmaq deməkdir. Ancaq cəmiyyəti, uşaqlarımızı qorumaq üçün çağırışlara səs versək, bu işə birbaşa cavabdeh olan qurumlara dəstək nümayiş etdirsək, o zaman, vicdanımız da rahatlıq tapar.
Hafiz TƏMİROV polis polkovnik-leytenantı
