Azərbaycan uşaqların sosial müdafiəsi baxımından regionun sonuncusudur. Bu barədə Beynəlxalq Əmək Təşkilatının Qlobal Sosial Müdafiəyə dair hesabatında deyilir. Hesabatda müxtəlif ölkələrdə uşaqların sosial müdafiəsinin səmərəlilik dərəcəsi müqayisə edilir.
Beynəlxalq Əmək Təşkilatı pandemiya dönəmində dünyadakı sosial müdafiə tədbirlərini yetərsiz sayır. Təşkilat bildirir ki, Azərbaycanda səhiyyə xidməti xaric, hökumətin, ən azı, bir sosial müdafiə tədbirindən vətəndaşların cəmi 39 faizi yararlanıb. Region ölkələri ilə müqayisədə Azərbaycan bu indikator üzrə ən sondadır. Ermənistanda bu göstərici 54, Gürcüstanda 97, Türkiyədə 80, Qazaxıstanda isə 100 faizdir. Hesabata görə, Azərbaycandakı uşaqların cəmi 16.9 faizi sosial müdafiə tədbirlərilə əhatə olunub. Eyni göstərici Qazaxıstanda 57 faiz, Gürcüstanda 48 faiz, Ermənistanda 30 faizdir. Bu istiqamətdə dünya ortalaması 26.4 faizdir. Bu o deməkdir ki, Azərbaycan sosial müdafiə tədbirlərilə əhatə edilən uşaqların sayına görə dünya ortalamasından da geridə qalıb. Avropa ölkələrinin əksəriyyətində bu göstərici 100 faizdir. Uşaqlarla yanaşı, analarla bağlı göstəricilər də ürəkaçan deyil. Azərbaycan burda da dünya ortalamasından geridədir. Azərbaycanda yeni övlad dünyaya gətirmiş anaların cəmi 16 faizi hökumətin sosial müdafiə proqramı ilə əhatə olunub.
“Beynəlxalq Əmək Təşkilatının Qlobal Sosial Müdafiəyə dair hesabatından açıq-aşkar aydın olur ki, onlar ölkəmizə qarşı qərəzli mövqe nümayiş etdirir”
“Vəfa” Sosial İctimai Birliyinin sədri Fatimə Hacıbəyli qeyd etdi ki, digər ölkələrdən fərqli olaraq, Azərbaycanda uşaqların qayğısına xüsusi həssaslıqla yanaşılır: “Bu gün vətəndaşlara 20-yə yaxın sosial müavinət verilir. Bunlardan 9-u uşaqların sosial müdafiəsi ilə bağlıdır. Hazırda sağlamlıq imkanları məhdud 18 yaşadək uşaqlar, ölkənin suverenliyi, ərazi bütövlüyü uğrunda həlak olanların və müharibə əlillərinin uşaqları aylıq sosial müavinətlə təmin edilirlər. Bura, habelə, çoxuşaqlı anaların (beşdən çox), müddətli həqiqi hərbi xidmət qulluqçularının uşaqları və valideyn himayəsindən məhrum olmuş uşaqlar daxildir. Üstəlik, aztəminatlı (ünvanlı dövlət sosial yardımı alan) ailələrin 1 yaşadək uşaqlarına aylıq sosial müavinət, yeni doğulan uşaqlara görə isə birdəfəlik müavinət ödənilir. Bu gün ancaq ən həssas kateqoriyadan olan 600 minə qədər uşağa müxtəlif müavinətlər ödənilir”.
Həmsöhbətimiz onu da əlavə etdi ki, ölkədə uşaqlara daim yardım edilir, onların sağlam mühitdə böyüməsi üçün hər bir iş görülür: “Beynəlxalq Əmək Təşkilatının Qlobal Sosial Müdafiəyə dair hesabatından açıq-aşkar aydın olur ki, onlar ölkəmizə qarşı qərəzli mövqe nümayiş etdirir”.
Günel CƏLİLOVA
