Bakı şəhəri və Abşeron rayonunda yerləşən orta ümumtəhsil məktəbləri şagird sıxlığından əziyyət çəkir. Bəzi məktəblərdə şagird sıxlığı normadan 2, bəzən 3 dəfə çox olur. Buna görə də bəzi siniflərdə şagirdlərin sayı normadan çox olur.
Belə bir hal Xırdalan şəhər 2 nömrəli tam orta məktəbdə yaşanır. Məktəbdə nə az, nə çox, düz 6177 şagird təhsil alır. Halbuki, məktəbin tutumu 1380 nəfərdir. Təhsil ocağında tutumundan dörd dəfə çox şagird təhsil alır. Qeyd edək ki, bu hal Xırdalanda əksər məktəblərdə müşahidə olunur.
Bildirək ki, 2020-ci ildə Nazirlər Kabineti “Dövlət ümumi təhsil müəssisəsində siniflər üzrə şagird sıxlığı normaları”nın təsdiq edilməsi haqqında qərarı təsdiqləyib. Həmin qərarda dövlət ümumi təhsil müəssisəsində siniflər üzrə şagird sıxlığı normaları öz əksini tapıb. Burada qeyd olunur ki, dövlət ümumi təhsil müəssisələrində bir sinifdə şagirdlərin sayı 30 nəfərdən çox olduqda və ya şagirdlərin bir sinifdə tədrisinə sinif otağının ölçüsü imkan vermədikdə, həmin sinif üzrə ikinci paralel sinif təşkil edilir. Tədris ilinin birinci yarısında hər hansı bir səbəbdən sinifdə şagirdlərin sayı 3 nəfərdən çox azaldıqda və ya artdıqda, sinif bu Normalarla müəyyən edilmiş say həddində birləşdirilir və ya paralel sinif təşkil edilir. Tam orta təhsil səviyyəsində təmayül siniflər 15 nəfərdən az və 20 nəfərdən çox olmamaqla təşkil edilir. Eyni təmayül sinfində şagirdlərin sayı 20 nəfərdən çox olduqda paralel siniflər təşkil edilir. Tədris ili ərzində təmayül sinfində şagird sayının azalması bu sinfin həmin və ya növbəti tədris ilində fəaliyyətinin davam etdirilməsinə, həmçinin tədris planı ilə müəyyən edilmiş müvafiq fənlərin tədrisində iki qrupa bölünməsinə məhdudiyyət yaratmır.
Abşeron rayon Təhsil İdarəsi: “Şagird sıxlığını aradan qaldırmaq üçün…”
Abşeron rayon Təhsil İdarəsindən bildirildi ki, şagird sıxlığını aradan qaldırmaq üçün Kristal 2 adlanan ərazidə 2000, Masazır kənd yoncalıq adlanan ərazidə isə 960 şagird tutumli bina inşa edilir. Saraydakı 2 saylı məktəbin yerində isə 2000 şagirdlik bina inşa edilir.
Nizami Hüseynov: “Bir sinifdə 30-40 şagird varsa, orada təhsilin keyfiyyətindən söhbət gedə bilməz”
Təhsil eksperti Nizami Hüseynovun fikrincə, bir sinifdə 30-40 şagird varsa, orada təhsilin keyfiyyətindən söhbət gedə bilməz. Onun sözlərinə görə, bu gün respublikada bu qədər məktəblər, korpuslar tikilsə də, sıxlıq yenə də mövcuddur. Məsələnin isə iki həll variantı var: “Ya məktəblər əlavə tədris korpusları ilə təmin olunmalıdır, ya da siniflər bölünməlidir. Bir məsələ də var ki, siniflərin bölünməsi əlavə vəsait aparacaq, otaq çatışmazlığı yaranacaq. Bununla da yeni bir problem meydana çıxacaq. 30-40 nəfərlə keyfiyyətdən danışa bilmərik”.
Ekspert onu da əlavə etdi ki, hazırda sıxlıq Bakı və Bakıətrafı yaşayış massivlərində, eləcə də Abşeron ərazisindədir: “Əvvəldən bu ərazilərdəki ümumtəhsil müəssisələrində nə qədər şagirdin təhsil alacağını proqnozlaşdırmaq çətindir. Çünki paytaxtda və Abşeronda məskunlaşma sürətlə gedir və əhalinin çoxu yaşadığı ərazidə daimi qeydiyyata düşmür. Amma yeni məskunlaşan əhali övladlarını yaşadığı ərazi üzrə məktəbə göndərir”.
Günel CƏLİLOVA
