Bakı şəhərini tikinti bumu bürüyüb. Paytaxtda bir-birindən əzəmətli göydələnlər, hündürmərtəbəli yaşayış evləri, inzibati binalar inşa edilir, lakin çox vaxt tikinti normaları gözlənilmir. Paytaxt ərazisində hündürmərtəbəli binalarla yanaşı, fərdi yaşayış evləri də tikilir.
Təəssüf ki, bəzi ərazilərdə fərdi yaşayış evlərinin arasında hündürmərtəbəli binalar, iaşə obyektləri tikilir. Bu da həmin evlərdə yaşayan sakinlərin haqlı narazılığına səbəb olur. Belə bir xoşagəlməz mənzərə Abşeron rayonunun Masazır kəndində qeydə alınır. Belə ki, qeyd edilən ünvanda fərdi yaşayış evlərinin arasında tikinti aparılır. Əsasən hündürmərtəbəli binalar, iaşə obyektləri tikilir. Vəziyyət o həddə çatıb ki, qeyd olunan ünvada tikinti həcmi artdığı üçün həmin ərazidə insanların sərbət hərəkət edə bilməsi üçün yol daralıb. Yəni, işbazlar avtomobil yoluna belə giriblər. Sakinlər qeyd edir ki, onlar şəxsi avtomobili saxlamağa yer tapmır. Həmçinin , maşınların hərəkət etdiyi yol daraldığı üçün həmin ünvanda dəhşətli vəziyyət yaranıb. Bu yoldan istifadə edən sürücülər hər gün saatlarla probkada qalmalı olur. Eyni zamanda, uşaqların həyətdə oynaması üçü boş ərazi demək olar qalmayıb.
Sakinlər onu da vurğulayır ki, Masazır kəndində qanunsuz tikililərin sayı normadan çox olduğu üçün kanalizasiya xəttini hansı istiqamətə çıxarılması mümkünsüz vəziyyətdədir. Belə olan vəziyyətdə çirkli su yollara, küçələrə, məhəllələrə axır. Bu da həmin ərazidə antisanitariyanın yaranmasına səbəb olur.
Sakinlər dediyinə görə, bütün bu qanunsuz tikililərin müqəssiri isə keçmiş icra başçısı İradə Gülməmmədovadı. Məlumata görə, bu binaların böyük əksəriyyəti keçmiş icra başçısı İradə Gülməmmədovanın qohumları tərəfindən tikilir. Qanunsuz tikililərin qarşısının alınması istiqamətində hər hansı bir iş görülmür.
Qanunvericiliyə əsasən fərdi yaşayış evlərinin yanında hündürmərtəbəli yox, yalnız 3 mərtəbəli bina tikilə bilər. Şəhərsalma və Tikinti Məcəlləsinə əsasən tikililər arasındakı məsafələrin ölçüsü müəyyən edilib. Tikinti standartlarındakı normaya görə tikilən binalar arasındakı məsafə divarın hündürlüyünün ən azı 1/3-dən az olmamalıdır. Bu qaydalara riayət olunmadan tikilmiş bina ilə bağlı problem yalnız məhkəmə qaydasında həll oluna bilər.
Onu da bildirək ki, Abşeron rayonu Masazır kəndində qeydə tikinti bumu ilə bağlı sakinlər ölkə Prezidenti cənab İlham Əliyevə və Birinci vitse-prezident Mehriban xanıma müraciət ediblər.
Kənd sakinləri bildirir ki, uzun illər rayon icra başçısı, rayonun memarı və bələdiyyə başçısından ibarət cinayətkar dəstənin harınlığı və özbaşınalığı o həddə çatıb ki, boş sahələri bina tikintisi üçün MTK-lara satmaq bir yana qalsın, hətta həyətlərin arasında da çoxmərtəbəli tikintilərin kütləvi şəkildə aparılmasına icazə veriblər. Kəndin Yeni Bakı yaşayış massivinə təxminən bitişik Rəsul Rza küçəsində artıq başlanmış azı 9 mərtəbəli binaların tikintisini misal göstərmək olar. İlk əvvəl sakinlər aldadılır ki, guya maksimum üç mərtəbəli kiçik fərdi evlər tikilir. Lakin başlayandan sonra məlum olur ki, azı 9- 10 mərtəbəli hündür yaşayış binaları tikilir. Sakinlər bildirir ki, onların rahatlığı pozulub, ərazidə yaşayış həm də təhlükəli olmağa başlayıb, çünki artıq yaşayış olan fərdi evlərlə divar-divara yapışıq olan çoxmərtəbəli binaların yanında necə təhlükəsiz olmaq olar?
Abşeron RİH: “Qanuna əsaslanmayan hal olarsa, sakinlər məhkəməyə müraciət edib, məsələni mübahisələndirə bilərlər”
Məsələ ilə bağlı Abşeron Rayon İcra Hakimiyyətindən bildirildi ki, qurumun əməkdaşları ərazidə olub və qiymətləndirmə aparıb: “Tikintini aparan şəxslərə izah olunub ki, qonşu ilə ara məsafəsini hündürlüyə nisbətdə gözləsinlər. Orada 10 mərtəbəli tikinti olmayacaq. Çox adam çox söz deyə bilər. Normativlər pozulsa, müvafiq tədbirlər görüləcək. O tikili ilə üzbəüz Yeni Bakı qurtuluş Şəhərciyi var, 8 mərtəbədən ibarətdir və hamısı da həyət evlərinin içini görür. O məntiqlə yanaşsaq, onda Azərbaycanda hamı gərək birmərtəbə tiksin ki, heç kim heç kimin həyətini görməsin. Qanuna əsaslanmayan hal olarsa, sakinlər məhkəməyə müraciət edib, məsələni mübahisələndirə bilərlər”.
Ilqar Hüseynli: “Adətən fərdi yaşayış evlərinin arasında qanunsuz tikiliyə icazəni icra hakimiyyətlər verir, onlar bu icazəni…”
Sosial sahə üzrə ekspert İlqar Hüseynli bildirdi ki, fərdi yaşayış evlərinin arasında çoxmərtəbəli binaların tikintisi halı kütləviləşib: “Şəhərsalma və arxitektura ilə bağlı xüsusi qanunlar var. Ancaq həmin qanunlara əməl edilmir. Çoxmərtəbəli binanın tikintisi üçün sahibkar 17-18 qurumdan icazə almalıdır. Dövlət orqanları bu məsələyə səthi yanaşır. Binanın tikintisi üçün yer standarta, tələblərə uyğun olmadığı halda ona tikiliş üçün icazə verilir. Adətən fərdi yaşayış evlərinin arasında qanunsuz tikiliyə icazəni icra hakimiyyətlər verir. Onlar bu icazəni rüşvət qarşılığında verir. Qanunları pozaraq tikintiyə aparılırsa demək bunun arxasında sövdələşmə dayanır. Bu kimi xoşagəlməz hadisələrin qarşısını almaq üçün ictimai nəzarət mexanizmi yaradılmalıdır”.
Günel CƏLİLOVA
