Biz çay sevər xalqıq. Çayı isə qəndsiz təsəvvür etməyənlər var. Amma çox təəssüf ki, bəzi işbazlar qəndin başına elə oyun açır ki, nəticə etibarilə sağlamlığımız təhlükə altına düşür. Mağazalarda satılan kəllə qəndin ağardılmasında zərərli kimyəvi maddələrdən istifadə olunur
Azərbaycanda istehsal edilən bir sıra qida məhsullarının tərkibinə kimyəvi maddələr vurulması dəfələrlə gündəmə gətirilib. Son zamanlar gündəlik qida rasionumuzda əsas yer tutan qənd məhsulunun da tərkibində müəyyən kimyəvi maddələr aşkarlandığı barədə məlumatlar yayılır. Qeyd olunur ki, kəllə qəndin ağardılmasında kimyəvi maddələrdən istifadə olunur. Belə ki, kəllə qənd hazırlanarkən "blanket" adlı kimyəvi maddədən istifadə olunur. Bu maddə paltar ağartmaq üçün istifadə olunur. Azərbaycanda fəaliyyət göstərən çoxsaylı kiçik sexlər bu maddədən istifadə edir. Belə kəllə qənd insan sağlamlığı üçün ciddi təhlükədir
Qeyd edək ki, bir neçə il əvvəl Qida Təhlükəsizliyi Agentliyi Baş Prokuror yanında Korrupsiyaya Qarşı Mübarizə Baş İdarəsi ilə birgə kəllə qənd istehsalı zamanı qəndin ağardılmasında mənşəyi məlum olmayan kimyəvi maddələrdən istifadə etdiyinə görə bir sıra qənnadı məmulatlarının istehsalı müəssisələrində reydlər keçirib və qanun pozuntularına görə cinayət işi açılıb.
“Bəzi sexlər kəllə qəndi ağartmaq üçün dəri aşılamaq və paltar ağartmaq üçün istifadə olunan “blanket” adlı kimyəvi maddədən istifadə edir”
Azad İstehlakçılar Birliyinin sədri Eyyub Hüseynov bildirdi ki, ölkədə standartlara uyğun kəllə qənd istehsal edən müəssisələr öz bazarını qorumaq üçün heç bir iş aparmır. Onlar KİV-lə iş aparmalıdır ki, bazar insan sağlamlığına zərərli və təhlükəli mallardan təmizlənsin: “Bu sahədə çox ciddi problemlər var. Xüsusilə kəllə qəndlə bağlı. Kəllə qənd şəkər tozundan alınır. Şəkər tozundan kəllə qənd almaq üçün iki üsuldan istifadə olunur. Bunlardan biri standartlara uyğun olan üsuldur. Digər isə insan həyatına təhlükə gətirən üsuldur. Standartlara uyğun olan üsulda şəkər tozunu müəyyən temperaturda qaynatdıqda kəllə qəndə çevrilərkən o saralır. O sarı rəngdən ağ kəllə qənd almaq üçün xüsusi bahalı bir cihazdan istifadə edilir. Beləliklə qənd ağardılır. Digər üsulda isə dəri aşılamaq və paltar ağartmaq üçün istifadə olunan “blanket” adlı kimyəvi maddədən istifadə olunur. Azərbaycanda fəaliyyət göstərən çoxsaylı kiçik sexlər bu maddədən istifadə edir. Belə kəllə qənd insan sağlamlığı üçün ciddi təhlükədir”.
Həmsöhbətimiz onu da əlavə etdi ki, dəfələrlə bu məsələ gündəmə gəlib: “Hətta Baş Prokurorluq bununla bağlı bir neçə il öncə cinayət işi açıb, yoxlamalar keçirib. Hazırda əmtəə bazarında külli miqdarda belə qənd nümunələri var. Birliyimiz bu yaxınlarda onun bütün nümunələrini əldə edəcək. Yenidən ekspertizalar keçiriləcək. İnsan həyatı üçün təhlükəli olan qəndlərin bazardan çıxarılması və həmin təhlükəli maddənin Azərbaycana gətirilməsinin qarşısını almaq üçün müəyyən işlər görəcəyik. Təəssüflər olsun ki, ölkədə standartlara uyğun olan kəllə qənd istehsal edən müəssisələr öz bazarını qorumaq üçün heç bir iş aparmır. Onlar KİV-lə iş aparmalıdır ki, bazar təhlükəli mallardan təmizlənsin. Qanuni istehsalla məşğul olan şəxslər partizan kimi susub. Əslində bu doğru mövqe deyil. Gərək dövlət orqanları qarşısında məsələ qaldırılsın ki, bu anormal vəziyyətin qarşısı alınsın”.
Günel CƏLİLOVA
